ദുറൂസുല്‍ ഹദീസ് - ഭാഗം 2 دروس الحديث ക്വുര്‍ആന്‍ പാരായണ മര്യാദകള്‍

 

عَنْ عُثْمَانَ رَضِيَ اللَّهُ عَنْهُ، عَنِ النَّبِيِّ صَلَّى اللهُ عَلَيْهِ وَسَلَّمَ قَالَ: «خَيْرُكُمْ مَنْ تَعَلَّمَ القُرْآنَ وَعَلَّمَهُ»-صحيح البخاري

ഉഥ്മാന്‍ رضي الله عنه നിവേദനം. നബി صلى الله عليه وسلم പറഞ്ഞു: ക്വുര്‍ആന്‍ പഠിക്കുകയും അത് പഠിപ്പിക്കുകയും ചെയ്യുന്നവനാണ് നിങ്ങളില്‍ ഉത്തമന്‍.

 പാഠങ്ങള്‍:

1-വിശുദ്ധ ക്വുര്‍ആന്‍ പഠിക്കുന്നതും, പഠിപ്പിക്കുന്നതും ശ്രേഷ്ഠമായ കാര്യമാണ്. 

2-വിശുദ്ധ ക്വുര്‍ആന്‍ പാരായണം ചെയ്താല്‍ ഒരു അക്ഷരത്തിന് തന്നെ പത്ത് വീതം പ്രതിഫലം ലഭിക്കുമെന്ന് റസൂല്‍ صلى الله عليه وسلم പഠിപ്പിച്ചിട്ടുണ്ട്. 

3-ജീവിതത്തിലെ എല്ലാ സന്ദര്‍ഭങ്ങളിലും വിശുദ്ധ ക്വുര്‍ആനുമായുള്ള ബന്ധം സുദൃഢമാക്കുക.

ക്വുര്‍ആനുമായി ബന്ധപ്പെട്ട് ശ്രദ്ധിക്കേണ്ട മര്യാദകള്‍

 1- ക്വുര്‍ആന്‍ പഠിക്കുമ്പോഴും അത് പാരായണം ചെയ്യുമ്പോഴും ഇഖ്ലാസ്വ്  ഉള്ളവനാകല്‍. കാരണം ക്വുര്‍ആന്‍ പാരായണം ഇബാദത്ത് ആണ്. ഇബാദത്തുകള്‍ സ്വീകരിക്കുന്നതിന്‍റെ നിബന്ധനകളില്‍ പെട്ടതാണ് ഇഖ്ലാസ്വ്.

2- ക്വുര്‍ആന്‍ കൊണ്ട് കര്‍മം ചെയ്യല്‍.  ജീവിതം ക്വുര്‍ആന്‍ കൊണ്ട് പ്രകാശപൂരിതമാക്കല്‍. അതിലെ വിധിവിലക്കുകളെ യഥാവിധി നടപ്പില്‍ വരുത്തലാണ് ഇത് കൊണ്ടര്‍ത്ഥമാക്കുന്നത്.

3- ക്വുര്‍ആന്‍ പാരായണത്തിലും അതിനെ പരിഗണിക്കുന്നതിലും ശ്രദ്ധ കൊടുക്കല്‍. പ്രത്യേകിച്ചും മനഃപ്പാഠം ഉള്ളവര്‍ അത് നിലനിര്‍ത്താന്‍ ഈ കാര്യം കൃത്യമായി ശ്രദ്ധിക്കേണ്ടതുണ്ട്.

4- ക്വുര്‍ആന്‍ മനഃപ്പാഠമുള്ളത് മറക്കാതിരിക്കാന്‍ ശ്രദ്ധ കൊടുക്കല്‍. അഥവാ മറന്ന് പോയാല്‍ തന്നെ ഞാന്‍ മറന്നു എന്ന് പറയരുത്. ഞാന്‍ നഷ്ടപ്പെടുത്തി, ഞാന്‍ മറപ്പിച്ചു കളഞ്ഞു എന്നാണ് പറയേണ്ടത്.

5- ക്വുര്‍ആന്‍ പാരായണം ചെയ്യുമ്പോള്‍ അതില്‍ ഉറ്റാലോചിക്കല്‍.

6- ക്വുര്‍ആന്‍ നിന്നോ, ഇരുന്നോ, നടന്നോ പാരായണം ചെയ്യാം. എന്നാല്‍ ഏറ്റവും നല്ല രൂപത്തില്‍ ആയിക്കൊണ്ട് പാരായണം ചെയ്യാന്‍ നാം ശ്രദ്ധിക്കണം.

7- ശുദ്ധിയോട് കൂടി (അഥവാ വുദ്വൂഓടെ) ക്വുര്‍ആന്‍ സ്പര്‍ശിക്കല്‍.

8- ആര്‍ത്തവം, പ്രസവരക്തം എന്നിവയുള്ളവര്‍ക്ക് مصحف തൊടാതെ അത് പാരായണം ചെയ്യാവുന്നതാണ്.

9- ക്വുര്‍ആന്‍ പാരായണത്തിന് മുമ്പായി വായ ശുദ്ധീകരിക്കല്‍.

10- ക്വുര്‍ആന്‍ പാരായണത്തിന് മുമ്പായി ഇസ്തിആദത്തും, ബസ്മലയും (الاستعاذة والبسملة) ചൊല്ലല്‍.

11- അര്‍ത്ഥങ്ങള്‍ തെറ്റിച്ച് കൊണ്ട് ധൃതിയില്‍ പാരായണം ചെയ്യാതിരിക്കല്‍. സാവകാശം അര്‍ത്ഥം മനസ്സിലാക്കി പാരായണം ചെയ്യലാണ് ഏറ്റവും ഉത്തമം.

12- നീട്ടേണ്ട സ്ഥലങ്ങളില്‍ നീട്ടി ഓതല്‍.

13- സ്വരം നന്നാക്കി ഓതല്‍.

14- ക്വുര്‍ആന്‍ പാരായണം ചെയ്യുമ്പോഴും, കേള്‍ക്കുമ്പോഴും കരയല്‍.

15- മറ്റുള്ളവര്‍ക്ക് ശല്യമില്ലാത്ത വിധം അത്യാവശ്യ ശബ്ദത്തില്‍ ഓതല്‍.

16- മടുപ്പുള്ള സമയങ്ങളില്‍ പാരായണം ചെയ്യാതിരിക്കല്‍.

17- അനാവശ്യമായി ക്വുര്‍ആന്‍ പാരായണം മുറിക്കാതിരിക്കല്‍.

18- റഹ്മത്തിന്‍റെ ആയത്തുകള്‍ പാരായണം ചെയ്യുമ്പോള്‍ റഹ്മത്ത് ചോദിക്കലും, തസ്ബീഹിന്‍റെ ആയത്ത് പാരായണം ചെയ്യുമ്പോള്‍ തസ്ബീഹ് ചൊല്ലലും, അഭയം തേടുന്നതിനെ അറിയിക്കുന്ന ആയത്തുകള്‍ പാരായണം ചെയ്യുമ്പോള്‍ അഭയം തേടേണ്ടവയില്‍ നിന്ന് അഭയം തേടുകയും ചെയ്യല്‍.

19- സുജൂദുത്തിലാവത്തിന്‍റെ ആയത്തുകള്‍ പാരായണം ചെയ്യുമ്പോള്‍ സുജൂദ് ചെയ്യല്‍.

20- ക്വുര്‍ആന്‍ പാരായണം കഴിഞ്ഞാല്‍ مصحف ചുംബിക്കാതിരിക്കല്‍.

21- ആയത്തുകളും സൂറത്തുകളും ചുമരുകളിലും മറ്റും തൂക്കിയിടാതിരിക്കല്‍.