467 ദുറൂസുല്‍ ഹദീസ് - ഉംദതുല്‍ അഹ്കാം- ഹദീസ് 207 دروس الحديث - വെള്ളിയാഴ്ച്ച മാത്രമായി നോമ്പെടുക്കരുത്

 

 

عمدة الأحكام من كلام خير الأنام صلى الله عليه وسلم
المؤلف: عبد الغني بن عبد الواحد بن علي بن سرور المقدسي الجماعيلي الدمشقي الحنبلي، 

أبو محمد، تقي الدين (المتوفى: 600هـ) 

വെള്ളിയാഴ്ച്ച മാത്രമായി നോമ്പെടുക്കരുത് 

207 - عَنْ أَبِي هُرَيْرَةَ رضي الله عنه قَالَ: سَمِعْتُ رَسُولَ اللَّهِ صلى الله عليه وسلم يَقُولُ: ((لا يَصُومَنَّ أَحَدُكُمْ يَوْمَ الْجُمُعَةِ، إلاَّ أَنْ يَصُومَ يَوْماً قَبْلَهُ، أَوْ يَوْماً بَعْدَهُ)) .

അബൂഹുറൈറ رضي الله عنه നിവേദനം ചെയ്യുന്നു: അല്ലാഹുവിൻ്റെ റസൂൽ صلى الله عليه وسلم ഇപ്രകാരം പറയുന്നത് ഞാൻ കേട്ടു: "നിങ്ങളിലാരും വെള്ളിയാഴ്ച ദിവസം നോമ്പ് അനുഷ്ഠിക്കരുത്; അതിന് തൊട്ടുമുമ്പുള്ള ദിവസമോ (വ്യാഴം), അല്ലെങ്കിൽ അതിന് തൊട്ടുപിന്നാലെയുള്ള ദിവസമോ (ശനി) നോമ്പ് നോൽക്കുന്നുണ്ടെങ്കിലല്ലാതെ."

വിവരണം

    വെള്ളിയാഴ്ച ദിവസം മാത്രമായി നോമ്പ് അനുഷ്ഠിക്കുന്നത് പ്രവാചകൻ صلى الله عليه وسلم വിലക്കിയിട്ടുണ്ട്. എന്നാൽ താഴെ പറയുന്ന സാഹചര്യങ്ങളിൽ വെള്ളിയാഴ്ച നോമ്പ് നോൽക്കാവുന്നതാണ്:

• വെള്ളിയാഴ്ചയോടൊപ്പം അതിന് തൊട്ടുമുമ്പുള്ള ദിവസമോ (വ്യാഴം) അല്ലെങ്കിൽ തൊട്ടുപിന്നാലെയുള്ള ദിവസമോ (ശനി) നോമ്പ് നോൽക്കുക.

• ഒരാൾ പതിവായി നോൽക്കാറുള്ള നോമ്പിന്‍റെ ഭാഗമായി അത് വെള്ളിയാഴ്ച വരിക.

• പ്രത്യേക പുണ്യമുള്ള ദിവസങ്ങളിലെ നോമ്പ് വെള്ളിയാഴ്ച വരിക (ഉദാഹരണത്തിന്: അറഫാ ദിനം അല്ലെങ്കിൽ ആശൂറാഅ് ദിനം).

  വെള്ളിയാഴ്ച മാത്രം നോമ്പ് നോൽക്കുന്നതിലെ കറാഹത്ത് (അഭികാമ്യമല്ലാത്ത അവസ്ഥ) ഇല്ലാതാകുന്നത് അതിനോടൊപ്പം മറ്റൊരു ദിവസം കൂടി ചേർക്കുമ്പോഴാണ്. ഇതിന് തെളിവാണ് അബൂഹുറൈറ رضي الله عنه നിവേദനം ചെയ്ത ഹദീസും ജുവൈരിയ رضي الله عنها യുടെ ചരിത്രവും. ജുവൈരിയ رضي الله عنها വെള്ളിയാഴ്ച നോമ്പ് നോറ്റപ്പോൾ നബി صلى الله عليه وسلم ചോദിച്ചു: "നീ ഇന്നലെ നോമ്പ് നോറ്റിരുന്നോ?" അവർ 'ഇല്ല' എന്ന് പറഞ്ഞു. "നാളെ നോമ്പ് നോൽക്കാൻ ഉദ്ദേശിക്കുന്നുണ്ടോ?" എന്ന് ചോദിച്ചപ്പോഴും അവർ 'ഇല്ല' എന്ന് പറഞ്ഞു. അപ്പോൾ നോമ്പ് മുറിക്കാൻ നബി صلى الله عليه وسلم കൽപ്പിച്ചു. (ബുഖാരി).

    ഐച്ഛികമായ നോമ്പുകളിലോ (തത്വവ്വുഅ്) നഷ്ടപ്പെട്ട നോമ്പുകൾ വീട്ടുന്നതിലോ (ഖദാഅ്) വെള്ളിയാഴ്ച ഉൾപ്പെടുന്നത് കൊണ്ട് കുഴപ്പമില്ല. എന്നാൽ വെള്ളിയാഴ്ചയെ മാത്രം നോമ്പിനായി പ്രത്യേകം തെരഞ്ഞെടുക്കുന്നത് അനുവദനീയമല്ല. മറ്റൊരു ദിവസത്തോടൊപ്പം ചേർത്തോ, അല്ലെങ്കിൽ പതിവായി നോൽക്കുന്ന നോമ്പുകളുടെ (ഖദാഅ് ആയാലും സുന്നത്തായാലും) ഭാഗമായോ വെള്ളിയാഴ്ച നോമ്പ് നോൽക്കുന്നതിൽ തെറ്റില്ല.

ഹദീസില്‍ നിന്നുള്ള പാഠങ്ങള്‍

1- വെള്ളിയാഴ്ച ദിവസം മാത്രമായി നോമ്പ് അനുഷ്ഠിക്കുന്നത് കറാഹത്താണ് (അഭികാമ്യമല്ല). 

2- എന്നാൽ ഒരാൾ പതിവായി നോൽക്കാറുള്ള നോമ്പിന്‍റെ ഭാഗമായി അത് വെള്ളിയാഴ്ച വരികയാണെങ്കിൽ അതിൽ കറാഹത്തില്ല. 

3- വെള്ളിയാഴ്ച നോമ്പ് വിലക്കിയതിലെ കാരണങ്ങൾ പണ്ഡിതന്മാർ വിശദീകരിക്കുന്നു:

1. വെള്ളിയാഴ്ച മുസ്‌ലിംകൾക്ക് ആഴ്ചയിലെ പെരുന്നാൾ ദിവസമാണ്. പെരുന്നാൾ ദിനങ്ങളിൽ നോമ്പ് നോൽക്കാൻ പാടില്ല.

2. വെള്ളിയാഴ്ച ദിവസം ചെയ്യേണ്ട ജുമുഅ, ദിക്റുകൾ, ദുആകൾ തുടങ്ങിയ പ്രധാന ആരാധനകളിൽ നോമ്പ് കാരണം ക്ഷീണമോ ആലസ്യമോ വരാതിരിക്കാൻ വേണ്ടിയാണിത്.

3. വെള്ളിയാഴ്ചയെ അമിതമായി മഹത്വപ്പെടുത്തി അതിൽ കുഴപ്പങ്ങളിൽ അകപ്പെടാതിരിക്കാൻ വേണ്ടിയാണിത്.