351 ദുറൂസുല്‍ ഹദീസ് - ഉംദതുല്‍ അഹ്കാം- ഹദീസ് 91- دروس الحديث - നമസ്കാരത്തിലെ തക്ബീറുകള്‍

 

عمدة الأحكام من كلام خير الأنام صلى الله عليه وسلم
المؤلف: عبد الغني بن عبد الواحد بن علي بن سرور المقدسي الجماعيلي الدمشقي الحنبلي، 

أبو محمد، تقي الدين (المتوفى: 600هـ)  

നമസ്കാരത്തിലെ തക്ബീറുകള്‍

91 - عَنْ مُطَرِّفِ بْنِ عَبْدِ اللَّهِ قَالَ: ((صَلَّيْتُ أَنَا وَعِمْرَانُ بْنُ حُصَيْنٍ خَلْفَ عَلِيِّ بْنِ أَبِي طَالِبٍ. فَكَانَ إذَا سَجَدَ كَبَّرَ، وَإِذَا رَفَعَ رَأْسَهُ كَبَّرَ، وَإِذَا نَهَضَ مِنْ الرَّكْعَتَيْنِ كَبَّرَ، فَلَمَّا قَضَى الصَّلاةَ أَخَذَ بِيَدِي عِمْرَانُ بْنُ حُصَيْنٍ، وَقَالَ: قَدْ ذَكَّرَنِي هَذَا صَلاةَ مُحَمَّدٍ صلى الله عليه وسلم، أَوْ قَالَ: صَلَّى بِنَا صَلاةَ مُحَمَّدٍ صلى الله عليه وسلم)) .

മുത്വരിഫു ബ്നി അബ്ദില്ല പറഞ്ഞു: ഞാനും ഇംറാനു ബ്നു ഹുസ്വൈനും അലിയ്യു ബ്നി അബീ ത്വാലിബിന്‍റെ പിന്നില്‍ നിന്നു നമസ്കരിച്ചു, അദ്ദേഹം സുജൂദ് ചെയ്‌താല്‍ തക്ബീര്‍ ചൊല്ലുമായിരുന്നു, (സുജൂദില്‍ നിന്ന്) തല ഉയര്‍ത്തിയാലും, രണ്ട് റക്അത്തുകളില്‍ നിന്ന് ഉയരുമ്പോഴും തക്ബീര്‍ ചൊല്ലുമായിരുന്നു. നമസ്കാരം കഴിഞ്ഞപ്പോള്‍ ഇംറാനു ബ്നുല്‍ ഹുസ്വൈന്‍ എന്‍റെ കൈപിടിച്ചു പറഞ്ഞു: മുഹമ്മദ് നബി صلى الله عليه وسلم യുടെ നമസ്കാരം  ഇദ്ദേഹം എന്നെ ഓര്‍മപ്പെടുത്തി. അല്ലെങ്കില്‍ അദ്ദേഹം ഞങ്ങളെയും കൊണ്ട് നബി صلى الله عليه وسلم യുടെ നമസ്കാരം നിര്‍വ്വഹിച്ചു എന്ന് അദ്ദേഹം പറഞ്ഞു. 

വിവരണം

    ഈ ഹദീസിൽ നമസ്കാരത്തിൻ്റെ അടയാളത്തെ (ശിആറിനെ)ക്കുറിച്ചുള്ള  വിവരണമാണ്,  തക്ബീറിലൂടെ സർവ്വശക്തനും മഹാനുമായ അല്ലാഹുവിൻ്റെ മഹത്വവും ഗാംഭീര്യവും സ്ഥിരീകരിക്കലാണ് അത്. 

    മുത്വരിഫ് ബ്നു അബ്ദില്ല ബ്നു ശിഖീര്‍ നിവേദനം ചെയ്യുന്നു: ഒരിക്കല്‍ അദ്ദേഹവും ഇംറാൻ ബ്നു ഹുസ്വൈന്‍ رضي الله عنه വും അലിയ്യുബ്നി അബീത്വാലിബ് رضي الله عنه വിൻ്റെ പിന്നിൽ നിന്ന് നമസ്കരിച്ചു. അദ്ദേഹം സുജൂദിലേക്ക് പോകുമ്പോഴും സുജൂദിൽ നിന്ന് തല ഉയർത്തുമ്പോഴും തക്ബീർ ചൊല്ലുമായിരുന്നു. രണ്ട് തശഹ്ഹുദുള്ള നമസ്കാരത്തിൽ ആദ്യത്തെ തശഹ്ഹുദിൽ നിന്ന് എഴുന്നേൽക്കുമ്പോഴും അദ്ദേഹം തക്ബീർ ചൊല്ലി. എന്നാൽ ഒരുപാട് ആളുകൾ ഈ സ്ഥാനങ്ങളിൽ ഉറക്കെ തക്ബീർ ചൊല്ലുന്നത് ഉപേക്ഷിച്ചിരുന്നു. നമസ്കാരം കഴിഞ്ഞപ്പോൾ ഇംറാൻ رضي الله عنه മുത്വരിഫിൻ്റെ കൈപിടിച്ച് അദ്ദേഹത്തോട് പറഞ്ഞു, അലി رضي الله عنه തൻ്റെ ഈ നമസ്കാരത്തിലൂടെ നബി صلى الله عليه وسلم യുടെ നമസ്കാരത്തെയാണ് ഓർമ്മിപ്പിച്ചത്, കാരണം നബി صلى الله عليه وسلم ഈ സ്ഥാനങ്ങളിൽ തക്ബീർ ചൊല്ലുമായിരുന്നു.

    ഈ ഹദീസ് നമസ്കാരത്തിലെ സുപ്രധാനമായ ഒരു കാര്യത്തെയാണ് ഓർമ്മപ്പെടുത്തുന്നത്. നമസ്കാരത്തിലെ ഓരോ ചലനങ്ങളിലും അല്ലാഹുവിൻ്റെ മഹത്വം പ്രകീർത്തിക്കുക എന്നത് അതിൻ്റെ ആത്മാവാണ്. "അല്ലാഹു അക്ബർ" (അല്ലാഹു ഏറ്റവും വലിയവനാകുന്നു) എന്ന് അർത്ഥം വരുന്ന തക്ബീർ, ഈ മഹത്വത്തെയാണ് അടയാളപ്പെടുത്തുന്നത്.

    അലി رضي الله عنه തൻ്റെ നമസ്കാരത്തിൽ, സുജൂദിലേക്ക് പോകുമ്പോഴും അതിൽ നിന്ന് ഉയരുമ്പോഴും, അതുപോലെ ഒന്നാം തശഹ്ഹുദിൽ നിന്ന് എഴുന്നേൽക്കുമ്പോഴും ഉറക്കെ തക്ബീർ ചൊല്ലിയിരുന്നത് നബി صلى الله عليه وسلم യുടെ നമസ്കാരത്തിൻ്റെ രീതിയായിരുന്നുവെന്ന് ഇംറാൻ ബ്നു ഹുസൈൻ رضي الله عنه സാക്ഷ്യപ്പെടുത്തുന്നത്. 

ഹദീസില്‍ നിന്നുള്ള പാഠങ്ങള്‍

1- ഖിയാമിൽ (നിറുത്തത്തിൽ) നിന്ന് സുജൂദിലേക്ക് പോകുമ്പോൾ തക്ബീർ ചൊല്ലുക.

2- സുജൂദിൽ നിന്ന് രണ്ട് സുജൂദുകൾക്കിടയിലുള്ള ഇരുത്തത്തിലേക്ക് ഉയരുമ്പോൾ തക്ബീർ ചൊല്ലുക.

3- ഈ തക്ബീറുകള്‍ എല്ലാ റക്അത്തുകളിലും ചെയ്യുക.

4- രണ്ട് തശഹ്ഹുദുള്ള നമസ്കാരത്തിൽ, ഒന്നാം തശഹ്ഹുദിൽ നിന്ന് നിറുത്തത്തിലേക്ക് ഉയരുമ്പോൾ തക്ബീർ ചൊല്ലുക.

5- മഅ്മൂമിന് (തുടർന്ന് നമസ്കരിക്കുന്നയാൾക്ക്) ഇമാമിനെ (നമസ്കാരത്തിന് നേതൃത്വം നൽകുന്നയാളെ) പിന്തുടരാൻ സാധിക്കുന്നതിനായി, ഇമാം അത് ഉറക്കെ ചൊല്ലേണ്ടതിൻ്റെ ആവശ്യകത.

6- അലിയ്യു ബ്നി അബീത്വാലിബ് رضي الله عنه സുന്നത്തിനെ മുറുകെ പിടിച്ചതിലുള്ള അദ്ദേഹത്തിൻ്റെ ശ്രേഷ്ഠത.

7- സുന്നത്ത് പ്രവർത്തിക്കുന്നയാൾക്ക് പിന്തുണ നൽകേണ്ടതിൻ്റെ പ്രാധാന്യം.

8- രണ്ടുപേരാണെങ്കിൽ ഇമാമിൻ്റെ പിന്നിലാണ് നിൽക്കേണ്ടത് എന്ന വിധി.

9- ഹദീസ് റിപ്പോര്‍ട്ട് ചെയ്യുന്നതില്‍ നമ്മുടെ മുന്‍ഗാമികള്‍ക്ക് ഉണ്ടായിരുന്ന സൂക്ഷ്മത. അതാണ്‌ ഹദീസിന്‍റെ അവസാനത്തില്‍ മുത്വരിഫ് അറിയിക്കുന്നത്. ഇംറാനു ബ്നു ഹുസ്വൈന്‍ رضي الله عنه പറഞ്ഞ വാക്യത്തില്‍ സംശയം വന്നപ്പോള്‍ അത് ഇവിടെ വ്യക്തമാക്കുകയാണ് ഹദീസ് റിപ്പോര്‍ട്ട് ചെയ്ത മുതരിഫ് ചെയ്തത്.