356 ദുറൂസുല്‍ ഹദീസ് - ഉംദതുല്‍ അഹ്കാം- ഹദീസ് 96- دروس الحديث - സുജൂദില്‍ കൈകള്‍ അകറ്റി വെക്കല്‍

 

 

عمدة الأحكام من كلام خير الأنام صلى الله عليه وسلم
المؤلف: عبد الغني بن عبد الواحد بن علي بن سرور المقدسي الجماعيلي الدمشقي الحنبلي، 

أبو محمد، تقي الدين (المتوفى: 600هـ)  

സുജൂദില്‍ കൈകള്‍ 

അകറ്റി വെക്കല്‍

96 - عَنْ عَبْدِ اللَّهِ بْنِ مَالِكٍ بْنِ بُحَيْنَةَ رضي الله عنه: ((أَنَّ النَّبِيَّ صلى الله عليه وسلم كَانَ إذَا صَلَّى فَرَّجَ بَيْنَ يَدَيْهِ، حَتَّى يَبْدُوَ بَيَاضُ إبْطَيْهِ)) .

അബ്ദുല്ലാഹി ബ്നു മാലിക് ബ്നു ബുഹൈന رضي الله عنه യിൽ നിന്ന് നിവേദനം:"നബി صلى الله عليه وسلم നമസ്കരിക്കുമ്പോൾ, അവിടുത്തെ കക്ഷത്തിന്‍റെ വെളുപ്പ് വെളിവാകുന്നതുവരെ തന്‍റെ കൈകൾ (ശരീരത്തിൽ നിന്ന്) അകത്തി വെക്കാറുണ്ടായിരുന്നു."

വിവരണം

    നബി ﷺ സുജൂദ് ചെയ്യുന്ന വേളയിൽ തൻ്റെ രണ്ട് കൈകളും അകറ്റിപ്പിടിക്കാറുണ്ടായിരുന്നു. തൻ്റെ പാർശ്വങ്ങളിൽ നിന്ന് രണ്ട് കൈകളും -ചിറകുകൾ വിടർത്തിയത് പോലെ- അകറ്റുമായിരുന്നു.  അവിടുത്തെ കക്ഷത്തിലെ വെളുപ്പ് കാണുന്നവിധം  നബി ﷺ തൻ്റെ രണ്ട് മുഴം കൈകളും പാർശ്വങ്ങളിൽ നിന്ന് അകറ്റിപ്പിടിക്കുകയും, അവ ചിറകുകൾ പോലെ വിരിക്കുകയും ചെയ്യാറുണ്ടായിരുന്നു.

    നമസ്കാരം ഒരു 'തൗഖീഫിയ്യായ' (നിശ്ചയിക്കപ്പെട്ട പ്രമാണങ്ങൾ പ്രകാരം മാത്രം അനുഷ്ഠിക്കേണ്ട) ആരാധനാകർമ്മമാണ്. നബി ﷺ അതിൻ്റെ രൂപവും, ഘടകങ്ങളും (അർകാനുകൾ), മര്യാദകളും, അവസ്ഥകളും നമ്മെ പഠിപ്പിച്ചിട്ടുണ്ട്. അതിൽപ്പെട്ടതാണ് സുജൂദിൻ്റെ രൂപവും ആ സമയത്ത് കൈകൾ വെക്കേണ്ട രീതിയും.

    ഈ ഹദീസ് നബി ﷺ യുടെ സുജൂദിന്‍റെ രൂപം വ്യക്തമാക്കുന്നു. അബ്ദുല്ലാഹി ബ്നു മാലിക് ഇബ്നു ബുഹൈന رضي الله عنه  റിപ്പോർട്ട് ചെയ്യുന്നു - 'ബുഹൈന' എന്നത് അബ്ദുല്ലയുടെ മാതാവാണ്. നബി ﷺ സുജൂദ് ചെയ്യുമ്പോൾ തൻ്റെ ഇരുകൈകളും അകറ്റി വെക്കുമായിരുന്നു. ഓരോ കൈയ്യും അതിനടുത്തുള്ള ശരീരഭാഗത്ത് നിന്ന് ചിറകുകൾ പോലെ അകറ്റി വെക്കും, അങ്ങനെ അവിടുത്തെ കക്ഷത്തിന്‍റെ വെളുപ്പ് വെളിവാകുമായിരുന്നു. കൈകൾ പാർശ്വങ്ങളിൽ നിന്ന് എത്രത്തോളം അകറ്റിയിരുന്നു എന്ന് ഇത് വ്യക്തമാക്കുന്നു. കക്ഷത്തിന്‍റെ 'വെളുപ്പ്' എന്ന് ഉദ്ദേശിക്കുന്നത് അവിടെ രോമം ഉണ്ടായിരുന്നില്ല എന്നതാണ്, അതിനാൽ അത് അവിടുത്തെ ശരീരത്തിന്‍റെ അതേ നിറമായിരുന്നു. 

ഹദീസില്‍ നിന്നുള്ള പാഠങ്ങള്‍

1-നമസ്കാരത്തിലെ സുജൂദിന്‍റെ രൂപം എങ്ങനെയായിരിക്കണമെന്നും, അല്ലാഹുവിനോടുള്ള കീഴ്വണക്കവും വിനയവും അതിൽ എങ്ങനെ പ്രകടമാകണമെന്നും ഇത് വ്യക്തമാക്കുന്നു.

2- സുജൂദിൽ പാലിച്ചിരിക്കേണ്ട സുന്നത്തായ രൂപം ഈ ഹദീഥിൽ വിവരിക്കപ്പെട്ടിരിക്കുന്നു. രണ്ട് കൈകളുടെ മുട്ടുകളുടെ മുകളിലുള്ള ഭാഗം തൻ്റെ പാർശ്വങ്ങളിൽ നിന്ന് അകറ്റിപ്പിടിക്കുക എന്നതാണത്.

3-ജമാഅത്തായി നിസ്കരിക്കുമ്പോൾ തൻ്റെ അടുത്തുള്ള വ്യക്തിക്ക് പ്രയാസമുണ്ടാക്കുമെങ്കിൽ ഈ രൂപം പ്രയോഗവത്കരിക്കേണ്ടതില്ല.

4- സുജൂദിൽ രണ്ട് കൈകളും അകറ്റിപ്പിടിക്കുന്നതിന് പിന്നിൽ പല യുക്തികളും പ്രയോജനങ്ങളുമുണ്ട്. നിസ്കരിക്കുന്ന വ്യക്തിക്ക് തൻ്റെ പ്രവർത്തിയിലുള്ള താൽപ്പര്യവും ഉന്മേഷവും പ്രകടിപ്പിക്കുന്ന രൂപമാണ് അത്, ഈ രൂപം സ്വീകരിക്കുമ്പോൾ സുജൂദ് എന്ന ആരാധനാ കർമത്തിൽ എല്ലാ അവയവങ്ങളും ഒരു പോലെ പങ്കുചേരുന്നുണ്ട്.  നിസ്കാരത്തിൽ അല്ലാഹുവിൻ്റെ മുൻപിൽ വിനയം കൂടുതൽ പ്രകടമാക്കുന്ന രൂപവും, സുജൂദിൻ്റെ വേളയിൽ മൂക്കും നെറ്റിയും ഭൂമിയിൽ കൂടുതൽ പതിയാൻ സഹായകമായ രീതിയും, ഓരോ അവയവങ്ങളും വേറിട്ടു നിൽക്കാൻ വഴിയൊരുക്കുന്നതുമാണ് ഈ രീതി എന്നും ചില പണ്ഡിതന്മാർക്ക് അഭിപ്രായമുണ്ട്.