618 ദുറൂസുല്‍ ഹദീസ് - ഉംദതുല്‍ അഹ്കാം- ഹദീസ് 358 دروس الحديث - ഒളിഞ്ഞുനോട്ടക്കാരന്‍റെ കണ്ണ് പൊട്ടിച്ചാല്‍

 

 

    

عمدة الأحكام من كلام خير الأنام صلى الله عليه وسلم
المؤلف: عبد الغني بن عبد الواحد بن علي بن سرور المقدسي الجماعيلي الدمشقي الحنبلي، أبو محمد، تقي الدين (المتوفى: 600هـ) 

ഇസ്‌ലാമിക ശിക്ഷാ വിധികള്‍

ഒളിഞ്ഞുനോട്ടക്കാരന്‍റെ 

കണ്ണ് പൊട്ടിച്ചാല്‍

358 - عَنْ أَبِي هُرَيْرَةَ رضي الله عنه: أَنَّ رَسُولَ اللَّهِ صلى الله عليه وسلم قَالَ: (لَوْ أَنَّ رَجُلاً - أَوْ قَالَ: امْرَأً - اطَّلَعَ عَلَيْكَ بِغَيْرِ إذْنِكَ، فَحَذَفْتَهُ بِحَصَاةٍ، فَفَقَأْتَ عَيْنَهُ: مَا كَانَ عَلَيْك جُنَاحٌ) .

അബൂഹുറൈറ رضي الله عنه നിവേദനം ചെയ്യുന്നു: അല്ലാഹുവിന്‍റെ റസൂൽ صلى الله عليه وسلم അരുളി: "നിന്‍റെ അനുവാദമില്ലാതെ വല്ലവനും നിന്‍റെ (വീട്ടിലേക്ക്) ഒളിഞ്ഞുനോക്കുകയും, അപ്പോൾ നീ അവനെ ഒരു ചെറിയ കല്ലെടുത്ത് എറിയുകയും അതുവഴി അവന്‍റെ കണ്ണ് പൊട്ടിപ്പോവുകയും ചെയ്താൽ നിന്‍റെ മേൽ യാതൊരു കുറ്റവുമില്ല (ശിക്ഷയോ നഷ്ടപരിഹാരമോ ഇല്ല)."

• حَذَفْتَهُ : നീ അവനെ എറിഞ്ഞു എന്നാണ് അർത്ഥം.
• جُنَاحٌ: പ്രശനം, കുറ്റം. (പ്രതികാര ശിക്ഷയോ നഷ്ടപരിഹാരമോ ഇല്ല എന്നാണ് അർത്ഥം.)

വിവരണം

 മറ്റുള്ളവരുടെ സ്വകാര്യതകളിലേക്ക് ഒളിഞ്ഞുനോക്കുന്നതും, അവരുടെ രഹസ്യങ്ങൾ-പ്രത്യേകിച്ച് മറച്ചുവെക്കപ്പെട്ടവ- അറിയാനുള്ള ആകാംക്ഷയും ശരീഅത്ത് കർശനമായി വിലക്കിയ കാര്യങ്ങളിൽ പെട്ടതാണ്. കാരണം അത് സമൂഹത്തിൽ വലിയ തോതിലുള്ള നാശത്തിന് കാരണമാകുന്നു. 

 ഒരു അപരിചിതനായ വ്യക്തി വാതിലിന്‍റെ വിടവിലൂടെയോ മറ്റോ, വീട്ടുപുടമസ്ഥന്‍റെ അനുവാദമില്ലാതെ അകത്തെ മറക്കപ്പെട്ട കാര്യങ്ങളിലേക്ക് ഒളിഞ്ഞുനോക്കിയാല്‍ ആ വീട്ടുടമസ്ഥൻ അവനെ ഒരു ചെറിയ കല്ലെടുത്ത് എറിയുകയും, ആ കല്ല് കണ്ണിനെ തകര്‍ക്കുകയോ കണ്ണിന്‍റെ കാഴ്ച നഷ്ടപ്പെടുത്തുകയോ ചെയ്താൽ, അതിന് യാതൊരു നഷ്ടപരിഹാരവുമില്ല. ആ വീട്ടുടമസ്ഥന്‍റെ മേൽ യാതൊരുവിധ കുറ്റമോ, പ്രതിക്രിയയോ ഉണ്ടായിരിക്കുന്നതല്ല. കാരണം ആ നോക്കിയവൻ അനുവാദമില്ലാതെയാണ് ഒളിഞ്ഞുനോക്കിയത്. വീടുകളുടെ സ്വകാര്യതകൾ വെളിപ്പെടാതിരിക്കാനും അകത്തുള്ളവ മറ്റുള്ളവർ കാണാതിരിക്കാനുമാണ് ഇസ്‌ലാം അനുവാദം ചോദിക്കൽ നിർബന്ധമാക്കിയത്.

ഹദീസില്‍ നിന്നുള്ള പാഠങ്ങള്‍

1- മറ്റുള്ളവരുടെ വീടുകളിലെ സ്വകാര്യ വിവരങ്ങളിലേക്ക് ഒളിഞ്ഞുനോക്കുന്നതും, അവരുടെ സംസാരങ്ങൾ ഒളിഞ്ഞു കേൾക്കുന്നതും ഹറാമാണ്.

2- വീട്ടുടമസ്ഥന് ഒളിഞ്ഞുനോക്കിയവന്‍റെ കണ്ണ് പൊട്ടിക്കാനുള്ള അവകാശമുണ്ട്; അതിലൂടെ അദ്ദേഹത്തിന് യാതൊരുവിധ കുറ്റമോ പ്രതികാര ശിക്ഷയോ (ഖിസാസ്) ഉണ്ടായിരിക്കുന്നതല്ല.

3- ഈ ഹദീസിന്‍റെ ബാഹ്യാർത്ഥം സൂചിപ്പിക്കുന്നത്, ഒളിഞ്ഞുനോക്കുന്നവന് വീട്ടുടമ മുൻകൂട്ടി താക്കീത് നൽകേണ്ടതില്ല എന്നതാണ്. 

4- ഒളിഞ്ഞുനോക്കുന്നതിന് തുല്യമായി ഒളിഞ്ഞു കേൾക്കുന്നതിനെ കണക്കാക്കാനാവില്ല; കാരണം കാഴ്ച തടയുന്നത് പോലെ (വാതിൽ അടച്ചോ കണ്ണ് പൊത്തിയോ) കേൾവിയെ പ്രതിരോധിക്കുക എളുപ്പമല്ല.

5- നോക്കിയവന്‍റെ കണ്ണിന് നഷ്ടപരിഹാരമില്ല എന്ന് വിധിക്കുന്നതിന് മുമ്പ്, വീട്ടുടമസ്ഥൻ തന്‍റെ വീട്ടിൽ ആവശ്യമായ മറകൾ (മതിൽ, വാതിൽ, വിരികൾ പോലുള്ളവ) ഒരുക്കി മുൻകരുതൽ എടുത്തിട്ടുണ്ടായിരിക്കണം എന്നത് നിബന്ധനയാണ്.

6- അനുവാദം ചോദിച്ചു വരുന്ന വ്യക്തി വാതിലിന് നേരെ മുന്നിലായി നിൽക്കാതെ, വാതിലിന്‍റെ ഒരു വശത്തായി മാറി നിൽക്കേണ്ടതാണ് (വാതിൽ തുറക്കുമ്പോൾ അകത്തെ കാഴ്ചകൾ പെട്ടെന്ന് കാണാതിരിക്കാൻ ആണ് ഇങ്ങനെ മാറി നില്‍ക്കുന്നത്).