626 ദുറൂസുല്‍ ഹദീസ് - ഉംദതുല്‍ അഹ്കാം- ഹദീസ് 366 دروس الحديث - അല്ലാഹുവിനെ കൊണ്ട് മാത്രം സത്യം ചെയ്യുക

 

 

    

عمدة الأحكام من كلام خير الأنام صلى الله عليه وسلم
المؤلف: عبد الغني بن عبد الواحد بن علي بن سرور المقدسي الجماعيلي الدمشقي الحنبلي، أبو محمد، تقي الدين (المتوفى: 600هـ) 

അല്ലാഹുവിനെ കൊണ്ട് മാത്രം സത്യം ചെയ്യുക

366 - عَنْ عُمَرَ بْنِ الْخَطَّابِ رضي الله عنه قَالَ: قَالَ رَسُولُ اللَّهِ صلى الله عليه وسلم: (إنَّ اللَّهَ يَنْهَاكُمْ أَنْ تَحْلِفُوا بِآبَائِكُمْ) .

وَلِمُسْلِمٍ: (فَمَنْ كَانَ حَالِفاً فَلْيَحْلِفْ بِاَللَّهِ أَوْ لِيَصْمُت) .
وَفِي رِوَايَةٍ قَالَ عُمَرُ «فَوَاَللَّهِ مَا حَلَفْتُ بِهَا مُنْذُ سَمِعْتُ رَسُولَ اللَّهِ صلى الله عليه وسلم يَنْهَى عَنْهَا، ذَاكِراً وَلا آثِراً»

ഉമറു ബ്നുല്‍ ഖത്താബ് رضي الله عنه നിവേദനം ചെയ്യുന്നു: അല്ലാഹുവിന്‍റെ റസൂൽ صلى الله عليه وسلم പറഞ്ഞു: "തീർച്ചയായും നിങ്ങളുടെ പിതാക്കന്മാരെക്കൊണ്ട് സത്യം ചെയ്യുന്നത് അല്ലാഹു നിങ്ങളോട് വിലക്കിയിരിക്കുന്നു."

 മുസ്‌ലിമിന്‍റെ റിപ്പോർട്ടിൽ ഇപ്രകാരമാണുള്ളത്: "അതിനാൽ, ആരെങ്കിലും സത്യം ചെയ്യുകയാണെങ്കിൽ അവൻ അല്ലാഹുവിനെക്കൊണ്ട് സത്യം ചെയ്യട്ടെ, അല്ലെങ്കിൽ മൗനം പാലിക്കട്ടെ."

 മറ്റൊരു റിപ്പോർട്ടിൽ ഉമർ رضي الله عنه  പറഞ്ഞു: "അല്ലാഹുവാണെ സത്യം, അല്ലാഹുവിന്‍റെ റസൂൽ صلى الله عليه وسلم അത് വിലക്കുന്നത് കേട്ടതിനുശേഷം, ഞാൻ അറിഞ്ഞുകൊണ്ട് സ്വന്തമായി സത്യം ചെയ്യുകയോ, മറ്റൊരാളിൽ നിന്ന് ഉദ്ധരിച്ചു പറയുകയോ (പറഞ്ഞു കേട്ടത് നിവേദനം ചെയ്യുകയോ) ചെയ്തിട്ടില്ല."

ذَاكِراً: ഉദ്ദേശ്യപൂർവ്വം/അറിഞ്ഞുകൊണ്ട് സ്വന്തമായി സത്യം ചെയ്യൽ).

 آثِراً: മറ്റൊരാൾ അങ്ങനെ സത്യം ചെയ്തു എന്ന് ഉദ്ധരിച്ച് പറയൽ

വിവരണം

 പിതാക്കന്മാരെക്കൊണ്ട് സത്യം ചെയ്യുക എന്നത് അറബികളുടെ ഒരു രീതിയായിരുന്നു. ഒരു വസ്തുവിനെക്കൊണ്ട് സത്യം ചെയ്യുക എന്നത് അതിനോടുള്ള ബഹുമാനത്തെയും ആദരവിനെയുമാണ് കാണിക്കുന്നത്. അതുകൊണ്ടാണ് അല്ലാഹു അല്ലാത്തവരെക്കൊണ്ട് സത്യം ചെയ്യുന്നത് അല്ലാഹു വിലക്കിയത്. കാരണം യഥാർത്ഥ മഹത്വം അല്ലാഹുവിന് മാത്രം അവകാശപ്പെട്ടതാണ്, അതിൽ മറ്റൊന്നിനെയും അവനോട് സമമാക്കാൻ പാടുള്ളതല്ല.

 ഈ ഹദീസിൽ അബ്ദുല്ലാഹി ബ്നു ഉമർ رضي الله عنهما നിവേദനം ചെയ്യുന്നു: ഉമറു ബ്നുൽ ഖത്താബ് رضي الله عنه മറ്റുള്ളവരോടൊപ്പം വാഹനത്തിൽ സഞ്ചരിച്ചുകൊണ്ടിരിക്കെ, തൻ്റെ പിതാവിനെക്കൊണ്ട് സത്യം ചെയ്യുന്നത് നബി صلى الله عليه وسلم കേൾക്കാനിടയായി. അപ്പോൾ നബി صلى الله عليه وسلم അവരെ ഉറക്കെ വിളിക്കുകയും, പിതാക്കന്മാരെക്കൊണ്ട് സത്യം ചെയ്യുന്നത് അല്ലാഹു വിലക്കിയിട്ടുണ്ടെന്ന് അറിയിക്കുകയും ചെയ്തു. അതിനാൽ, ആരെങ്കിലും സത്യം ചെയ്യാൻ ഉദ്ദേശിക്കുന്നുവെങ്കിൽ അവൻ അല്ലാഹുവിനെക്കൊണ്ട് സത്യം ചെയ്യട്ടെ; അല്ലാത്തപക്ഷം മൗനം പാലിക്കട്ടെ, അല്ലാഹുവല്ലാത്തവരെക്കൊണ്ട് സത്യം ചെയ്യരുത് എന്ന് റസൂല്‍ صلى الله عليه وسلم പറഞ്ഞു.

  അല്ലാഹുവല്ലാത്തവരെക്കൊണ്ട് സത്യം ചെയ്യുന്നത് ഇസ്‌ലാമിക ശരീഅത്ത് വിലക്കിയിട്ടുള്ളത് അത് ചെറിയ ശിർക്കിലേക്ക് നയിക്കുന്ന ഒരു വഴിയും മാർഗ്ഗവുമായതുകൊണ്ടാണ്. ചെറിയ ശിർക്ക് അതിൽ അകപ്പെടുന്ന വ്യക്തിയെ ഇസ്‌ലാമിൽ നിന്ന് പുറന്തള്ളുകയില്ലെങ്കിലും, വലിയ ശിർക്കിന് ശേഷം ഏറ്റവും വലിയ വൻപാപങ്ങളിൽ ഒന്നാണത്. അതുകൊണ്ടാണ് അബ്ദുല്ലാഹി ബ്നു മസ്ഊദ് رضي الله عنه പ്രസ്താവിച്ചത് (ഇബ്നു അബീ ശൈബയുടെ മുസ്വന്നഫിൽ ഉള്ളതുപോലെ): "അല്ലാഹുവിന്‍റെ പേരിൽ കള്ള സത്യം ചെയ്യുന്നതാണ്, സത്യസന്ധനായിക്കൊണ്ട് അല്ലാഹുവല്ലാത്തവരുടെ പേരിൽ സത്യം ചെയ്യുന്നതിനേക്കാൾ എനിക്ക് കൂടുതൽ ഇഷ്ടം."

 അല്ലാഹു അല്ലാത്തവരെ കൊണ്ട് സത്യം ചെയ്യാതെ മിണ്ടാതിരിക്കലാണ് അവര്‍ക്ക് നല്ലത് എന്നും ഹദീസില്‍ ഉണ്ട്. 

 ഈ വിവരം ഉമര്‍ رضي الله عنه വിനു ലഭിച്ചത് മുതല്‍ അദ്ദേഹം സ്വന്തമായി സത്യം ചെയ്യുകയോ മറ്റാരെങ്കിലും സത്യം ചെയ്തത് ഉദ്ധരിച്ച് പറയുകയോ ചെയ്തിട്ടില്ല. 

ഹദീസില്‍ നിന്നുള്ള പാഠങ്ങള്‍

1- അല്ലാഹുവല്ലാത്തവരെക്കൊണ്ട് സത്യം ചെയ്യൽ ഹറാമാണ്. ജാഹിലിയ്യാ കാലഘട്ടത്തിലെ (അജ്ഞാന കാലത്തെ) ശീലങ്ങളിൽ ഒന്നായതുകൊണ്ടാണ് പിതാക്കന്മാരെക്കൊണ്ട് സത്യം ചെയ്യുന്നതിനെ പ്രത്യേകം എടുത്തു പറഞ്ഞത്.

2- ഒരു കാര്യം ഉറപ്പിച്ചു പറയുന്നതിനായി അല്ലാഹുവിൻ്റെ നാമത്തിലോ, അവൻ്റെ പേരുകളിലോ, അവൻ്റെ ഗുണവിശേഷങ്ങളിലോ സത്യം ചെയ്യലാണ് അത് സത്യം ചെയ്യല്‍.

3- കൽപ്പനകൾ പെട്ടെന്ന് അനുസരിക്കുന്നതിലും, മികച്ച ധാരണയിലും, സൂക്ഷ്മതയിലുമുള്ള (തഖ്‌വ) ഉമർ رضي الله عنه വിൻ്റെ മഹത്വം ഇത് വ്യക്തമാക്കുന്നു.