520 ദുറൂസുല്‍ ഹദീസ് - ഉംദതുല്‍ അഹ്കാം- ഹദീസ് 260 دروس الحديث - കച്ചവടത്തിലെ വ്യക്തതയും സത്യസന്ധതയും

عمدة الأحكام من كلام خير الأنام صلى الله عليه وسلم
المؤلف: عبد الغني بن عبد الواحد بن علي بن سرور المقدسي الجماعيلي الدمشقي الحنبلي، 

أبو محمد، تقي الدين (المتوفى: 600هـ) 

കച്ചവടത്തിലെ 

വ്യക്തതയും സത്യസന്ധതയും

260 - حَكِيمِ بْنِ حِزَامٍ رضي الله عنه قَالَ: قَالَ رَسُولُ اللَّهِ صلى الله عليه وسلم: (الْبَيِّعَانِ بِالْخِيَارِ مَا لَمْ يَتَفَرَّقَا - أَوْ قَالَ: حَتَّى يَتَفَرَّقَا - فَإِنْ صَدَقَا وَبَيَّنَا بُورِكَ لَهُمَا فِي بَيْعِهِمَا. وَإِنْ كَتَمَا وَكَذَبَا مُحِقَتْ بَرَكَةُ بَيْعِهِمَا) . 

ഹകീം ബിൻ ഹിസാം رضي الله عنه നിവേദനം ചെയ്യുന്നു: റസൂൽ صلى الله عليه وسلم പറഞ്ഞു: "വിൽക്കുന്നവനും വാങ്ങുന്നവനും അവർ പരസ്പരം പിരിയുന്നതുവരെ (കച്ചവടം ഉറപ്പിക്കാനോ വേണ്ടെന്നു വെക്കാനോ ഉള്ള) തിരഞ്ഞെടുക്കാനുള്ള അധികാരമുണ്ട്. അവർ രണ്ടുപേരും സത്യം പറയുകയും (ഇടപാടിലെ കാര്യങ്ങൾ) വ്യക്തമാക്കുകയും ചെയ്താൽ അവരുടെ കച്ചവടത്തിൽ ബറക്കത്ത് (അനുഗ്രഹം) നൽകപ്പെടും. എന്നാൽ അവർ (കാര്യങ്ങൾ) ഒളിപ്പിക്കുകയും കള്ളം പറയുകയും ചെയ്താൽ അവരുടെ കച്ചവടത്തിലെ ബറക്കത്ത് നശിപ്പിക്കപ്പെടും."

• الخِيَارُ:: കച്ചവടം സ്ഥിരപ്പെടുത്തുന്നതാണോ അതോ റദ്ദാക്കുന്നതാണോ ഉചിതം എന്ന് തീരുമാനിക്കാനുള്ള അവസരം.

• الْبَيِّعَانِ: വിൽക്കുന്നവനും വാങ്ങുന്നവനും.

• حِقَتْ: നഷ്ടപ്പെട്ടു, ഇല്ലാതായി.

വിവരണം

  വിൽക്കുന്നവനും വാങ്ങുന്നവനും അവർ പരസ്പരം പിരിയുന്നതുവരെ തിരഞ്ഞെടുക്കാനുള്ള അധികാരമുണ്ട്. അതായത്, കച്ചവടം നടന്ന സ്ഥലത്തുനിന്ന് ശാരീരികമായി വേർപിരിയുന്നതുവരെ വിൽക്കുന്നയാൾക്കും വാങ്ങുന്നയാൾക്കും ആ കരാർ റദ്ദാക്കാൻ അനുവാദമുണ്ട്. തൊട്ടു മുമ്പത്തെ ഹദീസില്‍ ഇത് വ്യക്തമാക്കിയിട്ടുണ്ട്. 

    ഇനി വിലയെക്കുറിച്ചോ വിൽക്കുന്ന വസ്തുവിന്‍റെ ഗുണഗണങ്ങളെക്കുറിച്ചോ ഒക്കെയുള്ള കാര്യങ്ങളിൽ അവർ രണ്ടുപേരും സത്യസന്ധത പുലർത്തുകയും, ചരക്കിലോ വിലയിലോ ഉള്ള പോരായ്മകളും വൈകല്യങ്ങളും  വെളിപ്പെടുത്തുകയും ചെയ്താൽ അവരുടെ കച്ചവടത്തിൽ ബറക്കത്ത് (അനുഗ്രഹം) നൽകപ്പെടും. തൽഫലമായി വിറ്റ സാധനത്തിലും ലഭിച്ച വിലയിലും ഉപകാരം വർദ്ധിക്കുകയും ഇരുവിഭാഗത്തിനും അത് അനുഗ്രഹമായി മാറുകയും ചെയ്യും.

  എന്നാൽ, വിൽക്കുന്നവൻ ചരക്കിന്‍റെ തകരാറുകളും വാങ്ങുന്നവൻ പണത്തിന്‍റെ (വിലയുടെ) പോരായ്മകളും മറച്ചുവെക്കുകയും പരസ്പരം കള്ളം പറയുകയും ചെയ്താൽ - അതായത്, സാധനത്തിന്‍റെ ഗുണത്തെക്കുറിച്ച് വിൽക്കുന്നവൻ നുണ പറയുകയോ, വില നൽകുന്ന കാര്യത്തിൽ വാങ്ങുന്നവൻ ചതി കാണിക്കുകയോ, അല്ലെങ്കിൽ സമ്മതിച്ചതിനേക്കാൾ കുറഞ്ഞ വിലക്കാണ് കരാർ ഉറപ്പിച്ചതെന്ന് കള്ളം പറഞ്ഞ് വിൽക്കുന്നവനെ വഞ്ചിക്കുകയോ ചെയ്താൽ - അവരുടെ കച്ചവടത്തിലെ ബറക്കത്ത് അല്ലാഹു നശിപ്പിക്കും. 

    ഇതിന് ഉദാഹരണമായി: ഒരാൾ പള്ളി പണിയാനാണെന്ന് പറഞ്ഞ് ഒരു ഭൂമിക്ക് വില കുറച്ചുവാങ്ങുകയും, കച്ചവടം കഴിഞ്ഞാൽ അത് സ്വന്തം ആവശ്യത്തിന് ഉപയോഗിക്കുകയും ചെയ്യുന്നത് അത്തരത്തിലുള്ള വഞ്ചനയാണ്. ഇത്തരം നുണകളും ചതികളും കാരണം ആ കച്ചവടത്തിലൂടെ ലഭിക്കേണ്ട വർദ്ധനവും ഗുണവും ഇല്ലാതായിപ്പോകുന്നു.

ഹദീസില്‍ നിന്നുള്ള പാഠങ്ങള്‍

1- വിൽക്കുന്നവനും വാങ്ങുന്നവനും കച്ചവടം സ്ഥിരപ്പെടുത്താനോ റദ്ദാക്കാനോ ഉള്ള അധികാരം ഈ ഹദീസ് സ്ഥിരീകരിക്കുന്നു.

2- കച്ചവട കരാർ ഉണ്ടാകുന്നത് മുതൽ അവർ ആ സ്ഥലത്തുനിന്ന് ശാരീരികമായി വേർപിരിയുന്നത് വരെയാണ് ഈ അധികാരം നിലനിൽക്കുന്നത്.

3- വിൽക്കുന്നവനും വാങ്ങുന്നവനും കച്ചവടം നടന്ന സ്ഥലത്തുനിന്ന് ശാരീരികമായി അകന്നുപോകുമ്പോഴാണ് കച്ചവടം അന്തിമമായി സ്ഥിരപ്പെടുന്നത്.

4- കച്ചവടത്തിലും ഇടപാടുകളിലും സത്യം പറയുക എന്നത് നിർബന്ധമാണെന്ന് ഇത് പഠിപ്പിക്കുന്നു.

5- സൽക്കർമ്മങ്ങളിലൂടെ മാത്രമേ ദുനിയാവിലെ കാര്യങ്ങൾ പൂർണ്ണമായി ലഭിക്കുകയുള്ളൂ എന്നും, പാപങ്ങളുടെ ദോഷഫലം ഇഹലോകത്തെയും പരലോകത്തെയും നന്മകളെ ഇല്ലാതാക്കുമെന്നും ഇത് വ്യക്തമാക്കുന്നു.

6- സത്യസന്ധത പുലർത്തുന്നത് ഒരാളുടെ സമ്പാദ്യത്തിൽ ബറക്കത്ത് (അനുഗ്രഹം) ഉണ്ടാകാൻ കാരണമാകുന്നു.

7- ഇടപാടുകളില്‍ കള്ളം പറയുന്നതിനെ ഇത് ശക്തമായി എതിർക്കുന്നു; കള്ളം പറയുന്നത് സമ്പാദ്യത്തിലെ ബറക്കത്ത് നഷ്ടപ്പെടാൻ കാരണമാകുന്നു.

8- പരലോകത്തെ ലക്ഷ്യം വെച്ചുള്ള പ്രവർത്തനങ്ങൾ ഇഹലോകത്തും പരലോകത്തും ഒരുപോലെ നന്മകൾ നൽകുന്നു.