عمدة الأحكام من كلام خير الأنام صلى الله عليه وسلم
المؤلف: عبد الغني بن عبد الواحد بن علي بن سرور المقدسي الجماعيلي الدمشقي الحنبلي، أبو محمد، تقي الدين (المتوفى: 600هـ)
ദമ്പതികള് തമ്മിലെ ശാപ പ്രാര്ഥനയും ബന്ധം വേര്പെടുത്തലും
كتابُ اللِّعانِ
ശാപ പ്രാര്ത്ഥന
ഭർത്താവ് തന്റെ ഭാര്യ മറ്റൊരാളുമായി വ്യഭിചാരത്തിൽ ഏർപ്പെടുന്നത് നേരിട്ട് കാണുകയും, അതിന് സാക്ഷികളില്ലാതെ വരികയും ചെയ്യുന്ന ഗുരുതരമായ ഒരു സാമൂഹിക പ്രതിസന്ധിക്ക് പരിഹാരമായാണ് ഇസ്ലാം 'ലിആൻ' (لعان - ശാപപ്രാർത്ഥനയിലൂടെയുള്ള വേർപെടുത്തൽ) കൊണ്ടുവന്നത്. ഇത് കേവലം സംശയങ്ങളുടെയോ വസ്തുതയില്ലാത്ത ചിന്തകളുടെയോ (വസ്വാസ്) അടിസ്ഥാനത്തിൽ ചെയ്യേണ്ടതല്ല; മറിച്ച് സ്വന്തം കണ്ണ് കൊണ്ട് നേരിട്ട് കാണുമ്പോൾ മാത്രം ചെയ്യേണ്ടതാണ്. കാരണം ലിആനിലെ താക്കീത് അത്രമേൽ കഠിനമാണ്.
ഈ സംഭവത്തിലെ വ്യക്തിക്ക് -അത് ഹിലാലു ബ്നു ഉമയ്യ ആണെന്ന് പറയപ്പെടുന്നു- തന്റെ ഭാര്യയിൽ ചില സംശയങ്ങൾ തോന്നുകയും അവൾ വ്യഭിചാരത്തിൽ അകപ്പെടുമോ എന്ന് ഭയപ്പെടുകയും ചെയ്തിരുന്നു. തന്മൂലം അദ്ദേഹം കടുത്ത ആശയക്കുഴപ്പത്തിലായി. കാരണം, തെളിവുകളില്ലാതെ അവളെക്കുറിച്ച് അപവാദം പറഞ്ഞാൽ അദ്ദേഹത്തിന് മേൽ അപവാദത്തിനുള്ള ശിക്ഷ നടപ്പാക്കപ്പെടും; ഇനി മിണ്ടാതിരുന്നാലോ അത് അഭിമാനമില്ലായ്മയും വലിയ നാണക്കേടുമായി മാറും.
അദ്ദേഹം തന്റെ ഈ ആശങ്കകൾ നബി صلى الله عليه وسلم യോട് പങ്കുവെച്ചപ്പോൾ നബി صلى الله عليه وسلم മറുപടിയൊന്നും നൽകിയില്ല. അപ്പോൾ അതിനെക്കുറിച്ച് അല്ലാഹുവിൽ നിന്നുള്ള കൽപ്പനകൾ ഒന്നും ഇറങ്ങിയിട്ടുമുണ്ടായിരുന്നില്ല.
എന്നാൽ പിന്നീട്, താൻ ഭയപ്പെട്ടിരുന്ന ആ വ്യഭിചാരക്കുറ്റം ഈ ചോദ്യകർത്താവ് സ്വന്തം കണ്ണുകൊണ്ട് കാണാനിടയായി. അപ്പോൾ അല്ലാഹു അദ്ദേഹത്തിന്റെയും ഭാര്യയുടെയും വിധി വ്യക്തമാക്കിക്കൊണ്ട് സൂറത്തുന്നൂറിലെ 6-ാം ആയത്ത് (തങ്ങളുടെ ഭാര്യമാരുടെ മേൽ വ്യഭിചാരം ആരോപിക്കുന്നവർ...) അവതരിപ്പിച്ചു.
ആയത്തുകള് പൂര്ണ്ണ രൂപത്തില്:
وَالَّذِينَ يَرْمُونَ أَزْوَاجَهُمْ وَلَمْ يَكُنْ لَهُمْ شُهَدَاءُ إِلَّا أَنْفُسُهُمْ فَشَهَادَةُ أَحَدِهِمْ أَرْبَعُ شَهَادَاتٍ بِاللَّهِ إِنَّهُ لَمِنَ الصَّادِقِينَ (6) وَالْخَامِسَةُ أَنَّ لَعْنَتَ اللَّهِ عَلَيْهِ إِنْ كَانَ مِنَ الْكَاذِبِينَ (7) وَيَدْرَأُ عَنْهَا الْعَذَابَ أَنْ تَشْهَدَ أَرْبَعَ شَهَادَاتٍ بِاللَّهِ إِنَّهُ لَمِنَ الْكَاذِبِينَ (8) وَالْخَامِسَةَ أَنَّ غَضَبَ اللَّهِ عَلَيْهَا إِنْ كَانَ مِنَ الصَّادِقِينَ (9) وَلَوْلَا فَضْلُ اللَّهِ عَلَيْكُمْ وَرَحْمَتُهُ وَأَنَّ اللَّهَ تَوَّابٌ حَكِيمٌ - سورة النور : 6-10
6. തങ്ങളുടെ ഭാര്യമാരുടെ മേൽ (വ്യഭിചാരം) ആരോപിക്കുകയും, അവരവർ ഒഴികെ മറ്റു സാക്ഷികളൊന്നും തങ്ങൾക്ക് ഇല്ലാതിരിക്കുകയും ചെയ്യുന്നവരാരോ അവരിൽ ഓരോരുത്തരും നിർവഹിക്കേണ്ട സാക്ഷ്യം തീർച്ചയായും താൻ സത്യവാൻമാരുടെ കൂട്ടത്തിലാകുന്നു എന്ന് അല്ലാഹുവിന്റെ പേരിൽ നാലു പ്രാവശ്യം സാക്ഷ്യം വഹിക്കലാകുന്നു.
7. അഞ്ചാമതായി, താൻ കള്ളം പറയുന്നവരുടെ കൂട്ടത്തിലാണെങ്കിൽ അല്ലാഹുവിന്റെ ശാപം തന്റെ മേൽ ഭവിക്കട്ടെ എന്ന് (പറയുകയും വേണം.)
8. തീർച്ചയായും അവൻ കളവ് പറയുന്നവരുടെ കൂട്ടത്തിലാകുന്നു എന്ന് അല്ലാഹുവിന്റെ പേരിൽ അവൾ നാലു പ്രാവശ്യം സാക്ഷ്യം വഹിക്കുന്ന പക്ഷം, അതവളെ ശിക്ഷയിൽ നിന്ന് ഒഴിവാക്കുന്നതാണ്.
9. അഞ്ചാമതായി അവൻ സത്യവാൻമാരുടെ കൂട്ടത്തിലാണെങ്കിൽ അല്ലാഹുവിന്റെ കോപം തന്റെ മേൽ ഭവിക്കട്ടെ എന്ന് (പറയുകയും വേണം.)
10. അല്ലാഹുവിന്റെ അനുഗ്രഹവും കാരുണ്യവും നിങ്ങളുടെ മേൽ ഇല്ലാതിരിക്കുകയും, അല്ലാഹു ഏറെ പശ്ചാത്താപം സ്വീകരിക്കുന്നവനും, യുക്തിമാനും അല്ലാതിരിക്കുകയും ചെയ്തിരുന്നെങ്കിൽ (നിങ്ങളുടെ സ്ഥിതി എന്താകുമായിരുന്നു?)
അപ്പോൾ നബി صلى الله عليه وسلم ആ ആയത്തുകൾ അദ്ദേഹത്തിന് ഓതിക്കേൾപ്പിച്ചു. അദ്ദേഹം തന്റെ ഭാര്യക്കെതിരെ കള്ളം പറയുന്നവനാണെങ്കിൽ ഇഹലോകത്തെ ശിക്ഷ -അതായത് അപവാദത്തിനുള്ള ശിക്ഷ- പരലോകത്തെ ശിക്ഷയേക്കാൾ എത്രയോ നിസ്സാരമാണെന്ന് ഓർമ്മിപ്പിക്കുകയും ഉപദേശിക്കുകയും ചെയ്തു. എന്നാൽ താൻ ഭാര്യയുടെ മേൽ ഉന്നയിച്ച വ്യഭിചാരാരോപണത്തിൽ ഒട്ടും കള്ളം പറഞ്ഞിട്ടില്ലെന്ന് അദ്ദേഹം സത്യം ചെയ്ത് ഉറപ്പിച്ചു പറഞ്ഞു.
പിന്നീട് നബി صلى الله عليه وسلم ഭാര്യയെയും ഇതേപ്രകാരം ഉപദേശിക്കുകയും, ഇഹലോകത്തെ ശിക്ഷ- അതായത് വ്യഭിചാരത്തിനുള്ള എറിഞ്ഞുകൊല്ലൽ ശിക്ഷ- പരലോകത്തെ കഠിനശിക്ഷയേക്കാൾ എത്രയോ നിസ്സാരമാണെന്ന് ബോധ്യപ്പെടുത്തുകയും ചെയ്തു. എന്നാൽ അവളും അപ്രകാരം തന്നെ സത്യം ചെയ്തു പറഞ്ഞു: "തീർച്ചയായും അവൻ കള്ളം പറയുന്നവനാണ്."
അതിനുശേഷം അല്ലാഹു കൽപ്പിച്ച ക്രമപ്രകാരം നബി صلى الله عليه وسلم ഭർത്താവിനെക്കൊണ്ട് ആദ്യം തുടങ്ങി. താൻ സത്യം പറയുന്നവനാണ് എന്ന് അല്ലാഹുവിന്റെ നാമത്തിൽ നാല് തവണ അദ്ദേഹം സാക്ഷ്യം നൽകി. അഞ്ചാമതായി, താൻ കള്ളം പറയുന്നവനാണെങ്കിൽ അല്ലാഹുവിന്റെ ശാപം തന്റെ മേൽ ഉണ്ടാകട്ടെ എന്നും പറഞ്ഞു.
രണ്ടാമതായി ഭാര്യയെ നിർത്തി. തീർച്ചയായും അവൻ കള്ളം പറയുന്നവനാണ് എന്ന് അല്ലാഹുവിന്റെ നാമത്തിൽ നാല് തവണ അവളും സാക്ഷ്യം നൽകി. അഞ്ചാമതായി, അവൻ സത്യം പറയുന്നവനാണെങ്കിൽ അല്ലാഹുവിന്റെ കോപം തന്റെ മേൽ ഉണ്ടാകട്ടെ എന്നും അവൾ പറഞ്ഞു. ഇതിന് ശേഷം നബി صلى الله عليه وسلم അവർക്കിടയിൽ ശാശ്വതമായ (ഒരിക്കലും ഒന്നിക്കാൻ കഴിയാത്തവിധം) വിവാഹമോചനം നടത്തി.
അവരിൽ ഒരാൾ കള്ളം പറയുന്നവനാണ് എന്നത് തീർച്ചയായതിനാൽ, നബി صلى الله عليه وسلم അവർക്ക് മുന്നിൽ പശ്ചാത്താപത്തിന്റെ (തൗബയുടെ) വാതിൽ വെച്ചുനീട്ടി. ആ സമയത്ത് ഭർത്താവ് താൻ നൽകിയ മഹ്ര് തിരികെ വേണമെന്ന് ആവശ്യപ്പെട്ടു. അപ്പോൾ നബി صلى الله عليه وسلم അരുളി: "നിനക്ക് മഹ്ര് തിരിച്ചുകിട്ടുകയില്ല. അവൾ വ്യഭിചരിച്ചു എന്ന നിന്റെ വാദം സത്യമാണെങ്കിൽ, അവളുടെ ലൈംഗികത നിനക്ക് അനുവദനീയമാക്കപ്പെട്ടതിന്റെ പ്രതിഫലമായി അത് മാറിക്കഴിഞ്ഞു. ഇനി നീ അവൾക്കെതിരെ കള്ളം പറഞ്ഞതാണെങ്കിലോ, അത് നിനക്ക് അവളെക്കാൾ ഏറെ വിദൂരമായ കാര്യമാണ്; കാരണം വലിയൊരു അപവാദമാണ് നീ അവൾക്കെതിരെ കെട്ടിച്ചമച്ചത്."
1- ഭാര്യയും ഭർത്താവും തമ്മിൽ പരസ്പരം സാക്ഷ്യപ്പെടുത്തിക്കൊണ്ടുള്ള വിവാഹമോചന രീതിക്ക് (ലിആൻ) ഇസ്ലാമിൽ നിയമസാധുതയുണ്ട്.
2- ലിആൻ ആവശ്യപ്പെട്ടു വരുന്ന വ്യക്തിക്ക് ഉടൻ തന്നെ അതിനുള്ള അനുമതി നൽകാതെ, (ആലോചിക്കാനും പിന്മാറാനും സമയം നൽകിക്കൊണ്ട്) അല്പം മൗനം പാലിക്കലും സാവകാശം കാണിക്കലും സുന്നത്താണ്.4- ലിആൻ ചെയ്യുമ്പോൾ ഭർത്താവിനെക്കൊണ്ടാണ് ആദ്യം സത്യം ചെയ്യിച്ചു തുടങ്ങേണ്ടത്.
5- ലിആൻ പ്രക്രിയ പൂർത്തിയായിക്കഴിഞ്ഞാൽ ഭർത്താവിനും ഭാര്യക്കുമിടയിൽ നിർബന്ധമായും വിവാഹബന്ധം വേർപെടുത്തേണ്ടതുണ്ട് (അവർ പിന്നീട് ഒരിക്കലും ഒന്നിക്കാൻ പാടില്ലാത്തവിധം വേർപിരിയണം).
10- ഇഹലോകത്തെ ശിക്ഷ എത്ര കഠിനമായാലും അത് പരലോകത്തെ ശിക്ഷയേക്കാൾ വളരെ നിസ്സാരമാണ്.
No comments:
Post a Comment