عمدة الأحكام من كلام خير الأنام صلى الله عليه وسلم
المؤلف: عبد الغني بن عبد الواحد بن علي بن سرور المقدسي الجماعيلي الدمشقي الحنبلي،
أبو محمد، تقي الدين (المتوفى: 600هـ)
ഭാര്യയുടെ മാതൃ സഹോദരിയെയും പിതൃസഹോദരിയെയും
ഒരേ സമയം വിവാഹം കഴിക്കാവതല്ല
311 - عَنْ أَبِي هُرَيْرَةَ رضي الله عنه قَالَ: قَالَ رَسُولُ اللَّهِ صلى الله عليه وسلم: (لا يُجْمَعُ بَيْنَ الْمَرْأَةِ وَعَمَّتِهَا، وَلا بَيْنَ الْمَرْأَةِ وَخَالَتِهَا) .
അബൂഹുറൈറ رضي الله عنه വിൽ നിന്ന് നിവേദനം: റസൂല് صلى الله عليه وسلم അരുളി: ഒരു സ്ത്രീയെയും അവളുടെ പിതൃസഹോദരിയെയും, അതുപോലെ ഒരു സ്ത്രീയെയും അവളുടെ മാതൃസഹോദരിയെയും ഒരാളുടെ കീഴിൽ ഒരേസമയം വിവാഹം കഴിച്ചു കൂട്ടാൻ പാടുള്ളതല്ല.
വിവരണം
പരിശുദ്ധമായ ഈ ഇസ്ലാമിക ശരീഅത്ത് നന്മയും സൽപ്രവർത്തികളും അടങ്ങിയ എല്ലാ കാര്യങ്ങളുമായാണ് വന്നിട്ടുള്ളത്. ദോഷകരവും നാശമുണ്ടാക്കുന്നതുമായ എല്ലാ കാര്യങ്ങളെയും അത് എതിർക്കുകയും ചെയ്തിരിക്കുന്നു. അതിന്റെ ഭാഗമായി, പരസ്പരമുള്ള ഇണക്കത്തെയും സ്നേഹത്തെയും സൗഹൃദത്തെയും അത് പ്രോത്സാഹിപ്പിക്കുകയും; അകൽച്ച, കുടുംബബന്ധം മുറിക്കൽ, പരസ്പര വിദ്വേഷം എന്നിവയെ വിലക്കുകയും ചെയ്തു.
വിവാഹം, വിവാഹമോചനം എന്നിവയുമായി ബന്ധപ്പെട്ട കുടുംബ നിയമങ്ങൾ ഇസ്ലാമിക ശരീഅത്ത് കൃത്യമായി നിർണ്ണയിച്ചിട്ടുണ്ട്. അതിൽ അനുവദനീയമായതും നിഷിദ്ധമായതും എന്തൊക്കെയെന്നും, എല്ലാ കക്ഷികൾക്കുമുള്ള അവകാശങ്ങളും ബാധ്യതകളും എന്തൊക്കെയാണെന്നും അത് വ്യക്തമാക്കിയിട്ടുണ്ട്. ഖുർആൻ വിശദീകരിച്ചതും നബിചര്യ (സുന്നത്ത്) വ്യക്തമാക്കിയതുമായ കാര്യങ്ങളിലൂടെ ഇക്കാര്യത്തിൽ വ്യക്തത വന്നിട്ടുള്ളതാണ്. അതിനാൽ തന്നെ, അസന്നിഗ്ദ്ധവും വ്യക്തവുമായ പ്രമാണങ്ങൾ നിലവിലിരിക്കെ, ആർക്കും സ്വന്തം അഭിപ്രായപ്രകാരം അതിൽ മാറ്റം വരുത്താൻ അവകാശമില്ല.
ഈ ഹദീസിലൂടെ അബൂഹുറൈറ رضي الله عنه നിവേദനം ചെയ്യുന്നു: ഒരു സ്ത്രീയെയും അവളുടെ പിതൃസഹോദരിയെയും (അമ്മായി), അതുപോലെ ഒരു സ്ത്രീയെയും അവളുടെ മാതൃസഹോദരിയെയും ഒരേസമയം ഒരു വിവാഹത്തിൽ ഒരുമിച്ചുകൂട്ടുന്നത് നബി صلى الله عليه وسلم വിലക്കിയിരിക്കുന്നു.
ഒരാൾ ഇവരെ രണ്ടുപേരെയും ഒരേസമയം വിവാഹം കഴിച്ചാൽ രണ്ടുപേരുമായുള്ള വിവാഹവും ബാത്വിലാകും (അസാധുവാകും). കാരണം അവരിൽ ഒരാളുടെ വിവാഹം മാത്രം അസാധുവാക്കാൻ മറ്റേയാളേക്കാൾ പ്രത്യേക മുൻഗണനയൊന്നുമില്ല. എന്നാൽ ഒന്നിനു പുറകെ മറ്റൊന്നായി (വ്യത്യസ്ത സമയങ്ങളിൽ) ആണ് വിവാഹം കഴിച്ചതെങ്കിൽ, രണ്ടാമത്തെ വിവാഹം ബാത്വിലാകും. കാരണം രണ്ടാമത്തെ വിവാഹത്തോടെയാണ് ഇവിടെ (വിലക്കപ്പെട്ട) ഒരുമിച്ചുകൂട്ടൽ സംഭവിച്ചത്.
ഒരു ഭർത്താവിന്റെ ഭാര്യമാർ തമ്മിൽ അസൂയ കാരണം ഉണ്ടാകാനിടയുള്ള വിദ്വേഷവും തിന്മകളും വഴി, അടുത്ത കുടുംബബന്ധങ്ങൾ മുറിഞ്ഞുപോകാൻ ഈ ഒരുമിച്ചുകൂട്ടൽ കാരണമാകും എന്നതുകൊണ്ടാണ് ഈ വിലക്ക് വന്നിട്ടുള്ളത്.
തുടർന്ന്, ഈ ഹദീസിന്റെ നിവേദകരിൽ ഒരാളായ മുഹമ്മദ് ബിൻ ശിഹാബ് അസ്സുഹ്രി رحمه الله വ്യക്തമാക്കുന്നു: ഉർവത്തുബ്നുസ്സുബൈർ ആഇശ رضي الله عنها യെ ഉദ്ധരിച്ച് തന്നോട് പറഞ്ഞു: "രക്തബന്ധത്തിലൂടെ (നസബ്) ഏതൊക്കെ ബന്ധങ്ങളാണ് നിഷിദ്ധമാകുന്നത്, അതൊക്കെ മുലകുടി ബന്ധത്തിലൂടെയും നിഷിദ്ധമാകും." അതിനാൽ, ഒരു സ്ത്രീയെയും അവളുടെ രക്തബന്ധത്തിലുള്ള മാതൃസഹോദരിയെയും ഒരേസമയം വിവാഹം കഴിക്കാൻ പാടില്ലാത്തതുപോലെ തന്നെ, മുലകുടി ബന്ധത്തിലുള്ള മാതൃസഹോദരിയുമായും അവളെ ഒരേസമയം വിവാഹം കഴിക്കാൻ പാടില്ല. (മുലകുടി ബന്ധത്തിലുള്ള മാതൃസഹോദരി എന്നാൽ അവൾക്ക് മുലപ്പാൽ നൽകിയ ഉമ്മയുടെ സഹോദരിയാണ്). പിതൃസഹോദരിയുടെ കാര്യവും ഇതുപോലെത്തന്നെയാണ്. ഒരു സ്ത്രീയെയും അവളുടെ രക്തബന്ധത്തിലുള്ള പിതൃസഹോദരിയെയും ഒരേസമയം വിവാഹം കഴിക്കാൻ പാടില്ലാത്തതുപോലെ, മുലകുടി ബന്ധത്തിലുള്ള പിതൃസഹോദരിയുമായും അവളെ ഒരുമിച്ചുകൂട്ടാൻ പാടില്ല. അതുപോലെ, മുലകുടി ബന്ധത്തിലൂടെയുള്ള പിതാവിന്റെ മാതൃസഹോദരിയും രക്തബന്ധത്തിലുള്ള പിതാവിന്റെ മാതൃസഹോദരിയെപ്പോലെത്തന്നെയാണ് (വിലക്കപ്പെട്ടവളാണ്). മുലകുടി ബന്ധത്തിലൂടെ നിഷിദ്ധമാകുന്ന മറ്റെല്ലാ ബന്ധങ്ങളുടെയും വിധി ഇതുതന്നെയാണ്.
വിവിധ നന്മകൾ മുൻനിർത്തിയാണ് ഒരു പുരുഷന് ഒന്നിലധികം വിവാഹം കഴിക്കാനുള്ള അനുവാദം ശരീഅത്ത് നൽകിയത്. എന്നാൽ, ഒരു പുരുഷന്റെ കീഴിൽ ഭാര്യമാർ ഒന്നിച്ച് ജീവിക്കുമ്പോൾ അവർക്കിടയിൽ അസൂയ കാരണം ശത്രുതയും വിദ്വേഷവും ഉണ്ടാകാൻ സാധ്യതയേറെയാണ്. അതുകൊണ്ട്, അടുത്ത ബന്ധുക്കളായ സ്ത്രീകൾക്കിടയിൽ കുടുംബബന്ധം മുറിഞ്ഞുപോകുമോ എന്ന ഭയം മുൻനിർത്തിയാണ് അങ്ങനെയുള്ളവരെ ഒരേസമയം ഒരൊറ്റ പുരുഷൻ വിവാഹം കഴിക്കുന്നത് ശരീഅത്ത് വിലക്കിയത്.
അതനുസരിച്ച്, ഒരു സ്ത്രീ നിലവിലിരിക്കെ അവളുടെ സഹോദരിയെ വിവാഹം കഴിക്കുന്നതും (രണ്ട് സഹോദരിമാരെ ഒരേസമയം ഒന്നിച്ചു കൂട്ടൽ), അമ്മായിയുടെ കൂടെ അവളുടെ സഹോദരപുത്രിയെയും, ജ്യേഷ്ഠത്തിയുടെയോ അനിയത്തിയുടെയോ മകളുടെ കൂടെ മാതൃസഹോദരിയെയും വിവാഹം കഴിക്കുന്നതും ശരീഅത്ത് വിലക്കിയിരിക്കുന്നു. ഇതിന്റെ പൊതുവായ മാനദണ്ഡം ഇതാണ്: അവരിൽ ഒരാളെ പുരുഷനായും മറ്റേയാളെ സ്ത്രീയായും സങ്കൽപ്പിച്ചാൽ, അവർ തമ്മിൽ രക്തബന്ധം വഴി വിവാഹം നിഷിദ്ധമാകുമായിരുന്നോ, അങ്ങനെയുള്ള രണ്ട് സ്ത്രീകളെ ഒരേസമയം ഒരാൾക്ക് വിവാഹം കഴിച്ചു കൂട്ടാൻ പാടുള്ളതല്ല.
പരിശുദ്ധ ഖുർആനിലെ "(വിലക്കപ്പെട്ടവരായി പറഞ്ഞവർക്ക്) പുറമെയുള്ളവരെ നിങ്ങൾക്ക് അനുവദിച്ചിരിക്കുന്നു" [സൂറത്തുന്നിസാഅ്: 24] എന്ന പൊതുവിധിയെ വ്യക്തമാക്കുന്നതാണ് ഈ ഹദീസ്.
ഖുർആനുമായി താരതമ്യം ചെയ്യുമ്പോൾ സുന്നത്തിന് മൂന്ന് അവസ്ഥകളാണുള്ളത്:
ഒന്ന്: ഖുർആനിലുള്ള അതേ നിയമങ്ങൾക്ക് സമാനമായ നിയമങ്ങളുമായി സുന്നത്ത് വരിക. ഖുർആൻ നമസ്കാരം നിർബന്ധമാക്കിയതുപോലെ സുന്നത്തും നമസ്കാരം നിർബന്ധമാക്കി; അതുപോലെ സകാത്ത്, ഹജ്ജ്, നോമ്പ് എന്നിവ നിർബന്ധമാക്കിയതിലും ഇരു പ്രമാണങ്ങളും ഒരുപോലെ വന്നിരിക്കുന്നു.
രണ്ട്: ഖുർആനിലെ നിയമങ്ങളെ പ്രത്യേകമാക്കുന്ന വിധികളുമായി സുന്നത്ത് വരിക. അതായത്, ഖുർആനിലെ പൊതുവായ വിധികൾക്ക് പ്രത്യേക നിബന്ധന വെക്കുക, ചുരുക്കിപ്പറഞ്ഞ കാര്യങ്ങളെ വിശദീകരിക്കുക, അല്ലെങ്കിൽ പരിധികളില്ലാതെ പറഞ്ഞ കാര്യങ്ങളെ നിബന്ധനകൾക്ക് വിധേയമാക്കുക എന്നിവയാണവ.
മൂന്ന്: ഈ ഹദീസിലുള്ളതുപോലെ തികച്ചും പുതിയ നിയമങ്ങളുമായി സുന്നത്ത് വരിക. ഒരു സ്ത്രീയെ അവളുടെ പിതൃസഹോദരിയോടൊപ്പമോ (അമ്മായി) മാതൃസഹോദരിയോടൊപ്പമോ ഒരേസമയം വിവാഹം കഴിക്കുന്നത് നിഷിദ്ധമാക്കിയത് ഇതിന് ഉദാഹരണമാണ്.
ഹദീസില് നിന്നുള്ള പാഠങ്ങള്
1- ഒരു സ്ത്രീയെയും അവളുടെ പിതൃസഹോദരിയെയും (അമ്മായി) അല്ലെങ്കിൽ മാതൃസഹോദരിയെയും (ഇളയുമ്മ/മൂത്തമ്മ) ഒരേസമയം വിവാഹം കഴിച്ചു കൂട്ടൽ ഒരു പുരുഷന് അനുവദനീയമല്ല.
No comments:
Post a Comment