582 ദുറൂസുല്‍ ഹദീസ് - ഉംദതുല്‍ അഹ്കാം- ഹദീസ് 322 دروس الحديث - വിവാഹ സദ്യ

 

عمدة الأحكام من كلام خير الأنام صلى الله عليه وسلم
المؤلف: عبد الغني بن عبد الواحد بن علي بن سرور المقدسي الجماعيلي الدمشقي الحنبلي، أبو محمد، تقي الدين (المتوفى: 600هـ) 

വിവാഹ സദ്യ

322 - عَنْ أَنَسِ بْنِ مَالِكٍ رضي الله عنه:(أَنَّ رَسُولَ اللَّهِ صلى الله عليه وسلم رَأَى عَبْدَ الرَّحْمَنِ بْنَ عَوْفٍ، وَعَلَيْهِ رَدْعُ زَعْفَرَانٍ. فَقَالَ النَّبِيُّ صلى الله عليه وسلم: مَهْيَمْ؟ فَقَالَ: يَا رَسُولَ اللَّهِ تَزَوَّجْتُ امْرَأَةً، فَقَالَ: مَا أَصْدَقْتَهَا؟  قَالَ: وَزْنَ نَوَاةٍ مِنْ ذَهَبٍ قَالَ: فَبَارَكَ اللَّهُ لَكَ، أَوْلِمْ وَلَوْ بِشَاةٍ) .

അനസു ബ്നു മാലിക് رضي الله عنه വിൽ നിന്ന് നിവേദനം: അല്ലാഹുവിന്‍റെ റസൂൽ صلى الله عليه وسلم അബ്ദുറഹ്മാനു ബ്നു ഔഫ് رضي الله عنه വിനെ കാണാനിടയായി. അദ്ദേഹത്തിന്‍റെ ശരീരത്തിൽ (വസ്ത്രത്തിൽ) കുങ്കുമത്തിന്‍റെ അടയാളം (കറ) ഉണ്ടായിരുന്നു. അപ്പോൾ നബി صلى الله عليه وسلم ചോദിച്ചു: "എന്താണിത് വിശേഷം?" അദ്ദേഹം പറഞ്ഞു: "അല്ലാഹുവിന്‍റെ റസൂലേ, ഞാൻ ഒരു സ്ത്രീയെ വിവാഹം കഴിച്ചു." നബി صلى الله عليه وسلم ചോദിച്ചു: "നീ അവൾക്ക് എന്താണ് മഹറായി നൽകിയത്?" അദ്ദേഹം പറഞ്ഞു: "ഒരു ഈന്തപ്പഴക്കുരുവിന്‍റെ തൂക്കമുള്ള സ്വർണം." അപ്പോൾ നബി صلى الله عليه وسلم പറഞ്ഞു: "അല്ലാഹു നിനക്ക് ബറകത്ത് (അനുഗ്രഹം) നൽകട്ടെ. ഒരു ആടിനെ അറുത്താണെങ്കിലും നീ വലീമ (വിവാഹസദ്യ) നടത്തുക."

• رَدْعُ زَعْفَرَانٍ : കുങ്കുമത്തിന്‍റെ മഞ്ഞനിറത്തിന്‍റെ അടയാളം
• مَهْيَمْ : നിനക്ക് എന്തുപറ്റി? / എന്താണ് വിശേഷം?
• نَوَاةٍ مِنْ ذَهَبٍ : അഞ്ച് ദിർഹം തൂക്കം വരുന്ന സ്വർണത്തിന്‍റെ അളവ്.
• أَوْلِمْ : നീ സദ്യ ഒരുക്കുക (വിവാഹവുമായി ബന്ധപ്പെട്ടുണ്ടാക്കുന്ന ഭക്ഷണമാണ് വലീമ).

വിവരണം

  നബി صلى الله عليه وسلم അബ്ദുറഹ്മാനു ബ്നു ഔഫ് رضي الله عنه വിന്‍റെ ശരീരത്തിൽ കുങ്കുമത്തിന്‍റെ (മഞ്ഞനിറത്തിന്‍റെ) അടയാളം കാണാനിടയായി. എന്നാൽ പുരുഷന്മാർ സുഗന്ധം ഉപയോഗിക്കുമ്പോൾ മണം പ്രകടമാകുന്നതും നിറം പുറത്തുകാണാത്തതുമായ സുഗന്ധങ്ങളാണ് ഉപയോഗിക്കേണ്ടത് (എന്നതായിരുന്നു ഉചിതം). അതിനാൽ, അദ്ദേഹത്തിന്‍റെ മേലുള്ള ആ അടയാളത്തെക്കുറിച്ച് (അത് പുരുഷന്മാർക്ക് അനുയോജ്യമല്ലാത്തതിനാൽ) റസൂല്‍ صلى الله عليه وسلم അല്പം വിസമ്മതത്തോടെയെന്നോണം ചോദിച്ചു. അപ്പോൾ താൻ ഈയടുത്താണ് വിവാഹിതനായതെന്നും, തന്‍റെ ഭാര്യയിൽ നിന്നാകാം ആ നിറം ശരീരത്തിൽ പടർന്നതെന്നും അദ്ദേഹം നബി صلى الله عليه وسلم യെ അറിയിച്ചു. അതോടെ നബി صلى الله عليه وسلم അദ്ദേഹത്തിന് അതിൽ ഇളവ് നൽകി.

 അല്ലാഹുവിന്‍റെ റസൂൽ صلى الله عليه وسلم സ്വഹാബികളോട് അങ്ങേയറ്റം ആർദ്രതയും കാരുണ്യവുമുള്ള ആളായിരുന്നതിനാലും, അവരുടെ കാര്യങ്ങൾ നിരന്തരം അന്വേഷിച്ചറിഞ്ഞ് അതിലെ നല്ല കാര്യങ്ങളെ പ്രോത്സാഹിപ്പിക്കാനും ചീത്ത കാര്യങ്ങളെ വിലക്കാനും താല്പര്യപ്പെട്ടിരുന്നതിനാലും, അദ്ദേഹം ഭാര്യക്ക് നൽകിയ മഹറിനെക്കുറിച്ച്  ചോദിച്ചു. അപ്പോൾ ഒരു ഈന്തപ്പഴക്കുരുവിന്‍റെ തൂക്കത്തിന് തുല്യമായ സ്വർണമാണ് നൽകിയതെന്ന് അദ്ദേഹം മറുപടി പറഞ്ഞു. ഉടനെ നബി صلى الله عليه وسلم അദ്ദേഹം ബറകത്തിനായി പ്രാർത്ഥിക്കുകയും, ഒരു ആടിനെ അരുത്തിട്ടാണെങ്കിലും തന്‍റെ വിവാഹത്തോടനുബന്ധിച്ച് വലീമ (വിവാഹസദ്യ) നടത്താൻ കൽപ്പിക്കുകയും ചെയ്തു.

ഹദീസില്‍ നിന്നുള്ള പാഠങ്ങള്‍

1- പുരുഷന്മാർ കുങ്കുമം കൊണ്ടോ നിറം പ്രകടമാകുന്ന മറ്റു സുഗന്ധദ്രവ്യങ്ങൾ കൊണ്ടോ സുഗന്ധം ഉപയോഗിക്കുന്നത് കറാഹത്ത് ആണ്.  

2- ഭരണാധികാരിയോ നേതാവോ തന്‍റെ അനുയായികളുടെയും കൂട്ടാളികളുടെയും കാര്യങ്ങൾ അന്വേഷിച്ചറിയലും, അവരെയും തന്നെയും ബാധിക്കുന്ന കാര്യങ്ങളെക്കുറിച്ചും അവരുടെ അവസ്ഥകളെക്കുറിച്ചും ചോദിച്ചറിയലും.

3- മഹർ (വിവാഹമൂല്യം) ലളിതമാക്കൽ സുന്നത്താണ് (ഉത്തമമാണ്). അതിനാലാണ് അബ്ദുറഹ്മാനു ബ്നു ഔഫ് رضي الله عنه തന്‍റെ ഭാര്യക്ക് അഞ്ച് ദിർഹം തൂക്കം വരുന്ന സ്വർണം മാത്രം മഹറായി നൽകിയത്.

4- വിവാഹത്തിൽ മഹറിന്‍റെ അടിസ്ഥാനപരമായ പ്രാധാന്യത്തിലേക്കുള്ള സൂചന.

5- വിവാഹിതരാകുന്നവർക്ക് വേണ്ടി ബറകത്തിനായി (അനുഗ്രഹത്തിനായി) പ്രാർത്ഥിക്കൽ. വിവാഹിതർക്ക് വേണ്ടി ഇപ്രകാരം പ്രാർത്ഥിക്കാമെന്ന് വന്നിട്ടുണ്ട്:

"بَارَكَ اللهُ لَكَ وَبَارَكَ عَلَيْكَ وَجَمَعَ بَيْنَكُمَا فِي خَيْرٍ" 

(അല്ലാഹു നിനക്ക് അനുഗ്രഹം ചൊരിയട്ടെ, നിന്‍റെ മേൽ അനുഗ്രഹം വർഷിക്കട്ടെ, നിങ്ങൾ ഇരുവർക്കുമിടയിൽ നന്മയിൽ ഒരുമിച്ചുകൂട്ടട്ടെ).

6- ഭർത്താവിന്‍റെ വശത്തുനിന്നുള്ള വലീമയുടെ (വിവാഹസദ്യ) നിയമസാധുത. സാമ്പത്തിക ശേഷിയുള്ളവനാണെങ്കിൽ കുറഞ്ഞത് ഒരു  ആടിനെ എങ്കിലും അറുത്തിട്ടാവല്‍ ഉചിതമാണ്.

7- ഇബ്‌നു ദഖീഖ് അൽ-ഈദ് رحمه الله പറഞ്ഞു: "വലീമ എന്നാൽ വിവാഹത്തോട് അനുബന്ധിച്ച് ഒരുക്കുന്ന ഭക്ഷണമാണ്. അത് ശരീഅത്ത് ആവശ്യപ്പെട്ടിട്ടുള്ള കാര്യങ്ങളിൽ പെട്ടതാണ്. ജനങ്ങൾ വലീമക്കായി ഒത്തുകൂടുന്നതിലൂടെ വിവാഹത്തെ പരസ്യപ്പെടുത്തുക (പ്രസിദ്ധപ്പെടുത്തുക) എന്നത് ഇതിന്‍റെ ഗുണങ്ങളിൽ പെട്ടതായിരിക്കാം."

8- പരസ്പരം പരിചയപ്പെടാനും, ഇണക്കത്തിനും, ബറകത്ത് ലഭിക്കാനുമായി വലീമയിലേക്ക് ദമ്പതികളുടെ ബന്ധുക്കളെയും, അയൽവാസികളെയും, പാവപ്പെട്ടവരെയും, സദ്‌വൃത്തരായ ആളുകളെയും ക്ഷണിക്കേണ്ടതുണ്ട്. കൂടാതെ ധൂർത്ത്, അഹംഭാവം, പൊങ്ങച്ചം എന്നിവ ഇതിൽ നിന്ന് ഒഴിവാക്കുകയും വേണം.

9- ലോകമാന്യം, കീർത്തി എന്നിവ ലക്ഷ്യം വെച്ച് മഹർ അമിതമാക്കുന്നതും അതിൽ അതിരുുകടക്കുന്നതും കറാഹത്താണ് (വെറുക്കപ്പെട്ടതാണ്). കാരണം, ഒരാൾക്ക് അത് താങ്ങാൻ കഴിയുന്നതിലപ്പുറം ബാധ്യത വരുത്തിവെക്കുകയാണെങ്കിൽ അത് ശരീഅത്ത് വിലക്കിയ കാര്യങ്ങളിൽ പെട്ടതാണ്.