576 ദുറൂസുല്‍ ഹദീസ് - ഉംദതുല്‍ അഹ്കാം- ഹദീസ് 316 دروس الحديث - മൂന്ന് ത്വലാക്വ് പൂര്‍ത്തിയാക്കിയതിന് ശേഷം ദമ്പതികള്‍ക്ക് ഒന്നിച്ച് ജീവിക്കണമെങ്കില്‍ ചെയ്യേണ്ടത്

 

عمدة الأحكام من كلام خير الأنام صلى الله عليه وسلم
المؤلف: عبد الغني بن عبد الواحد بن علي بن سرور المقدسي الجماعيلي الدمشقي الحنبلي، أبو محمد، تقي الدين (المتوفى: 600هـ) 

മൂന്ന് ത്വലാക്വ് പൂര്‍ത്തിയാക്കിയതിന് ശേഷം ദമ്പതികള്‍ക്ക് ഒന്നിച്ച് ജീവിക്കണമെങ്കില്‍ ചെയ്യേണ്ടത്

316 - عَنْ عَائِشَةَ رضي الله عنها قَالَتْ: (جَاءَتْ امْرَأَةُ رِفَاعَةَ الْقُرَظِيِّ إلَى النَّبِيِّ صلى الله عليه وسلم فَقَالَتْ: كُنْتُ عِنْدَ رِفَاعَةَ الْقُرَظِيِّ فَطَلَّقَنِي فَبَتَّ طَلاقِي. فَتَزَوَّجْتُ بَعْدَهُ عَبْدَ الرَّحْمَنِ بْنَ الزُّبَيْرِ وَإِنَّمَا مَعَهُ مِثْلُ هُدْبَةِ الثَّوْبِ. فَتَبَسَّمَ رَسُولُ اللَّهِ صلى الله عليه وسلم وَقَالَ: أَتُرِيدِينَ أَنْ تَرْجِعِي إلَى رِفَاعَةَ؟ لا، حَتَّى تَذُوقِي عُسَيْلَتَهُ، وَيَذُوقَ عُسَيْلَتَكِ، قَالَتْ: وَأَبُو بَكْرٍ عِنْدَهُ، وَخَالِدُ بْنُ سَعِيدٍ بِالْبَابِ يَنْتَظِرُ أَنْ يُؤْذَنَ لَهُ، فَنَادَى أَبَا بَكْرٍ: أَلا تَسْمَعُ إلَى هَذِهِ: مَا تَجْهَرُ بِهِ عِنْدَ رَسُولِ اللَّهِ صلى الله عليه وسلم ) . 

ആഇശ رضي الله عنها പറഞ്ഞു: രിഫാഅത്തുൽ ഖുറദ്വിയുടെ ഭാര്യ നബി صلى الله عليه وسلم യുടെ അടുക്കൽ വന്നിട്ട് പറഞ്ഞു: "ഞാൻ രിഫാഅത്തുൽ ഖുറദ്വിയുടെ ഭാര്യയായിരുന്നു. അദ്ദേഹം എന്നെ വിവാഹമോചനം (ത്വലാഖ്) ചെയ്യുകയും, ആ ത്വലാഖ് പൂർണ്ണമാക്കുകയും ചെയ്തു. അതിനുശേഷം ഞാൻ അബ്ദുറഹ്മാനു ബ്നു സ്സുബൈറിനെ വിവാഹം കഴിച്ചു. എന്നാൽ അദ്ദേഹത്തിന്‍റെ പക്കലുള്ളത് വസ്ത്രത്തിന്‍റെ ഒരു നൂൽക്കഷ്ണം (തുമ്പിലെ നൂൽ) പോലെ മാത്രമാണ് (അദ്ദേഹത്തിന് ലൈംഗികശേഷിയില്ല)." അപ്പോൾ റസൂൽ صلى الله عليه وسلم പുഞ്ചിരിച്ചുകൊണ്ട് ചോദിച്ചു: "നീ വീണ്ടും രിഫാഅത്തിലേക്ക് തന്നെ മടങ്ങാൻ ആഗ്രഹിക്കുന്നുണ്ടോ? ഇല്ല, നീ അദ്ദേഹത്തിന്‍റെ (അബ്ദുറഹ്മാന്‍റെ) 'തേൻതുള്ളി' (ലൈംഗിക സുഖം) രുചിക്കുകയും, അദ്ദേഹം നിന്‍റെ 'തേൻതുള്ളി'  (ലൈംഗിക സുഖം) രുചിക്കുകയും ചെയ്യുന്നത് വരെ (അതായത് നിങ്ങൾക്കിടയിൽ ലൈംഗികബന്ധം നടക്കുന്നത് വരെ) അത് സാധ്യമല്ല."

ആഇശ رضي الله عنها പറയുന്നു: ആ സമയത്ത് അബൂബക്കർ رضي الله عنه  നബിയുടെ അരികിലുണ്ടായിരുന്നു. ഖാലിദ് ഇബ്നു സഈദ് رضي الله عنه അകത്തേക്ക് പ്രവേശിക്കാൻ അനുവാദം കാത്ത് വാതിലക്കൽ നിൽക്കുന്നുണ്ടായിരുന്നു. അപ്പോൾ ഖാലിദ്, അബൂബക്കര്‍ رضي الله عنه വിനെ വിളിച്ചുപറഞ്ഞു: "നിങ്ങൾ ഇതൊന്നും കേൾക്കുന്നില്ലേ? ഇവർ അല്ലാഹുവിന്‍റെ റസൂല്‍ صلى الله عليه وسلم യുടെ അടുക്കൽ വെച്ച് ഇങ്ങനെ പരസ്യമാക്കി സംസാരിക്കുന്നത്!"

• بَتَّ طَلاقِي: പിന്നീട് മടക്കിയെടുക്കാൻ സാധിക്കാത്ത വിധം പൂർണ്ണമായ വിവാഹമോചനം (ബായിനായ ത്വലാഖ്) ചെയ്തു.
• هُدْبَةِ الثَّوْبِ: വസ്ത്രത്തിന്‍റെ അറ്റത്തുള്ള നൂൽക്കഷ്ണം. (ഇവിടെ ഭർത്താവിന്‍റെ ലൈംഗിക ശേഷിക്കുറവിനെ ഉപമിച്ചതാണ്).
• عُسَيْلَتَهُ: ലൈംഗികബന്ധത്തെ സൂചിപ്പിക്കുന്ന വാക്കാണിത്. അതിന്‍റെ ആനന്ദത്തെ തേനിന്‍റെ മധുരത്തോട് ഉപമിച്ചതാണ്.

വിവരണം

 ഇസ്‌ലാമിലെ 'ത്വലാഖ്' (വിവാഹമോചനം), 'ഹലാലാക്കൽ' (തഹ്‌ലീൽ) എന്നിവയുമായി ബന്ധപ്പെട്ട വളരെ പ്രധാനപ്പെട്ട ഒരു നിയമമാണ് ഈ ഹദീസ് വ്യക്തമാക്കുന്നത്. ഒരാൾ തന്‍റെ ഭാര്യയെ മൂന്ന് ത്വലാഖും ചൊല്ലി പൂർണ്ണമായി ബന്ധം വേർപെടുത്തിയാൽ (ത്വലാഖുൽ ബായിൻ), അവൾക്ക് വീണ്ടും പഴയ ഭർത്താവിലേക്ക് മടങ്ങണമെങ്കിൽ ചില കർശനമായ നിബന്ധനകളുണ്ട്. വെറുമൊരു ഔദ്യോഗിക വിവാഹം മാത്രം പോരാ, മറിച്ച് പുതിയ ഭർത്താവുമായി യഥാർത്ഥ രീതിയിലുള്ള ദാമ്പത്യ-ലൈംഗിക ബന്ധം നടന്നിരിക്കണം എന്ന് ഈ ഹദീസ് പഠിപ്പിക്കുന്നു. ഇസ്‌ലാമിക നിയമപ്രകാരം മൂന്ന് ത്വലാഖ് കഴിഞ്ഞാൽ പിന്നീട് ആ ദമ്പതികൾക്ക് പരസ്പരം ഒന്നിക്കാൻ സാധിക്കില്ല.

 രിഫാഅത്തുൽ ഖുറദ്വിയുടെ ഭാര്യ തന്‍റെ അവസ്ഥയെക്കുറിച്ച് പരാതിപ്പെട്ടുകൊണ്ട് നബി صلى الله عليه وسلم യുടെ അടുക്കൽ വന്നു. താൻ രിഫാഅത്തിന്‍റെ ഭാര്യയായിരുന്നുവെന്നും, അദ്ദേഹം തന്‍റെ അവസാനത്തെ (മൂന്നാമത്തെ) ത്വലാഖ് വഴി വിവാഹമോചനം പൂർണ്ണമാക്കിയെന്നും അവർ നബി صلى الله عليه وسلم യെ അറിയിച്ചു. അതിനുശേഷം അവർ അബ്ദുറഹ്മാനുബ്നുസ്സുബൈറിനെ വിവാഹം കഴിച്ചുവെങ്കിലും അദ്ദേഹത്തിന് അവരുമായി ലൈംഗികബന്ധത്തിൽ ഏർപ്പെടാൻ കഴിഞ്ഞില്ല, തുടർന്ന് അദ്ദേഹം അവരെ വിവാഹമോചനം ചെയ്യുകയും ചെയ്തു. ആ സ്ത്രീക്ക് ന്‍റെ ആദ്യ ഭർത്താവിലേക്ക് തന്നെ മടങ്ങാനാണ് ആഗ്രഹമെന്ന് നബി  صلى الله عليه وسلم ക്ക് മനസ്സിലായി.

 ഇതിനെക്കുറിച്ച് അവർ നബി صلى الله عليه وسلم യോട് ചോദിച്ചപ്പോൾ, നബി صلى الله عليه وسلم അത് തടയുകയും വിലക്കുകയും ചെയ്തു. അവർക്ക് വീണ്ടും രിഫാഅത്തിലേക്ക് തന്നെ മടങ്ങുന്നത് അനുവദനീയമാകണമെങ്കിൽ, അവളുടെ അവസാനത്തെ ഭർത്താവ് (അബ്ദുറഹ്മാൻ) അവരുമായി ലൈംഗികബന്ധത്തിൽ ഏർപ്പെടൽ അനിവാര്യമാണെന്ന് നബി صلى الله عليه وسلم അവരെ അറിയിച്ചു.

  ആ സ്ത്രീ വളരെ സ്വകാര്യമായ ഒരു വിഷയം പ്രവാചക സന്നിധിയിൽ വെച്ച് ഉറക്കെ സംസാരിച്ചപ്പോൾ അവിടെയുണ്ടായിരുന്ന അബൂബക്കർ رضي الله عنه, വാതിലിനരികെ നിന്ന ഖാലിദ് ഇബ്നു സഈദ് رضي الله عنه എന്നിവർക്ക് അത് പ്രയാസമുണ്ടാക്കി. ഇത്രയും ലജ്ജാകരമായ കാര്യം റസൂല്‍ صلى الله عليه وسلم യുടെ അടുക്കൽ ഉച്ചത്തിൽ പറയുന്നതിനെ ഖാലിദ് رضي الله عنه ചോദ്യം ചെയ്യുന്നുണ്ട്. എന്നാൽ ദീനീപരമായ ഒരു സംശയം ദൂരീകരിക്കാനും നീതി തേടാനും വേണ്ടിയാണ് ആ സ്ത്രീ അവിടെ വന്നത്. 

 സ്വകാര്യമായ വിഷയങ്ങൾ തുറന്നുപറഞ്ഞ സ്ത്രീയെ നബി صلى الله عليه وسلم ശകാരിച്ചില്ല, മറിച്ച് പുഞ്ചിരിയോടെ കാര്യം ലളിതമായി മനസ്സിലാക്കിക്കൊടുക്കുകയാണ് ചെയ്തത്. ദീനിലെ കാര്യങ്ങൾ പഠിക്കാൻ ലജ്ജ വിചാരിക്കരുത് എന്നതും ഇതിൽ നിന്ന് വ്യക്തമാകുന്നു.

 ഒരാൾ ഭാര്യയെ മൂന്ന് തവണയും ത്വലാഖ് ചൊല്ലിയാൽ അവർ തമ്മിലുള്ള വിവാഹബന്ധം പൂർണ്ണമായി അവസാനിച്ചു. പിന്നീട് അവർക്ക് ഒന്നിച്ച് ജീവിക്കണമെങ്കിൽ ആ സ്ത്രീ മറ്റൊരാളെ വിവാഹം കഴിക്കുകയും, ആ ബന്ധം വേർപിരിയുകയും ചെയ്യേണ്ടതുണ്ട്.

 ആദ്യ ഭർത്താവിലേക്ക് മടങ്ങാൻ വേണ്ടി മാത്രം താല്‍ക്കാലികമായി മറ്റൊരാളെ വിവാഹം കഴിച്ചാൽ അത് സാധുവാകില്ല. പുതിയ ഭർത്താവുമായി യഥാർത്ഥ രീതിയിലുള്ള ലൈംഗികബന്ധം നടന്നിരിക്കണം. ഹദീസിലെ 'തേൻതുള്ളി രുചിക്കുക' (عُسَيْلَتَهُ) എന്ന പ്രയോഗം ലൈംഗിക ആനന്ദത്തെയാണ് സൂചിപ്പിക്കുന്നത്.

 ദാമ്പത്യപരമായ പ്രയാസങ്ങളോ ഭർത്താവിന്‍റെ ശാരീരിക ശേഷിക്കുറവോ ഉണ്ടെങ്കിൽ സ്ത്രീകൾക്ക് അത് ഭരണാധികാരിക്ക് മുന്നിലോ മതവിധി നല്‍കുന്നവര്‍ക്ക് മുന്നിലോ ബോധിപ്പിക്കാനും വിവാഹമോചനം തേടാനും അവകാശമുണ്ട്.

ഹദീസില്‍ നിന്നുള്ള പാഠങ്ങള്‍

1- മൂന്ന് തവണ ത്വലാഖ് ചൊല്ലപ്പെട്ട സ്ത്രീയെ ആദ്യ ഭർത്താവിന് വീണ്ടും വിവാഹം കഴിക്കാൻ അനുവാദമില്ല. അവൾ മറ്റൊരു പുരുഷനെ വിവാഹം കഴിക്കുകയും, അവർ തമ്മിൽ ലൈംഗികബന്ധം നടക്കുകയും, പിന്നീട് അവൻ അവളെ (ആദ്യ ഭർത്താവിന് ഹലാലാക്കിക്കൊടുക്കുക എന്ന ഉദ്ദേശമില്ലാതെ) വിവാഹമോചനം ചെയ്യുകയും, അവളുടെ ഇദ്ദ കാലയളവ് കഴിയുകയും ചെയ്താൽ മാത്രമേ ആദ്യ ഭർത്താവുമായുള്ള പുനർവിവാഹം സാധ്യമാകൂ. (അൽ-ബഖറ: 230 സൂക്തം ഇതാണ് വ്യക്തമാക്കുന്നത്).

2- രണ്ടാമത്തെ വിവാഹം യഥാർത്ഥ ജീവിതം നയിക്കാനുള്ള ആഗ്രഹത്തോടെയുള്ളതായിരിക്കണം. ആദ്യ ഭർത്താവിന് അവളെ ഹലാലാക്കിക്കൊടുക്കാൻ വേണ്ടി മാത്രമുള്ള താല്‍ക്കാലിക വിവാഹം ഇസ്‌ലാമിൽ ബാത്വിലും (അസാധുവും) ഹറാമുമാണ്. അത് വഴി അവൾ ആദ്യ ഭർത്താവിന് ഹലാലാവുകയുമില്ല.

3- കേവലം വിവാഹക്കരാറോ, ഒന്നിച്ചിരിക്കലോ, ബാഹ്യമായ സ്പർശനങ്ങളോ മതിയവില്ല. രണ്ടാമത്തെ ഭർത്താവുമായി ശരിയായ രീതിയിലുള്ള ലൈംഗികബന്ധം നടന്നിരിക്കണം (ബീജസ്ഖലനം ഉണ്ടായില്ലെങ്കിലും). ഈ വിവാഹക്കരാർ ഇസ്‌ലാമിക നിയമപ്രകാരം പൂർണ്ണമായും ശരിയായതുമായിരിക്കണം.

4- ഇസ്‌ലാമിക നിയമങ്ങൾ മനുഷ്യന്‍റെ നന്മയെ ലക്ഷ്യം വെച്ചുള്ളതാണ്. രണ്ടുതവണ ത്വലാഖ് ചൊല്ലിയ ശേഷവും ദമ്പതികൾക്ക് ഒന്നിക്കാൻ ഇസ്‌ലാം അവസരം നൽകുന്നുണ്ട്. എന്നാൽ മൂന്നാമതും ത്വലാഖ് ചൊല്ലിയാൽ ആ അവകാശം നഷ്ടപ്പെടുന്നു. രണ്ടാമതൊരു വിവാഹത്തിലൂടെ മാത്രമേ പിന്നീട് ആദ്യ ഭർത്താവിലേക്ക് മടങ്ങാനാകൂ എന്നത് മനുഷ്യന്‍റെ തന്നിഷ്ടങ്ങളെ തടയാനുള്ള വലിയൊരു അനുഗ്രഹമാണ്.

5- പരസ്യമായി പറയാൻ ലജ്ജ തോന്നുന്ന ലൈംഗികബന്ധം പോലുള്ള കാര്യങ്ങളെ സൂചിപ്പിക്കാൻ മാന്യമായ സൂചനാ പദപ്രയോഗങ്ങൾ  ഉപയോഗിക്കാവുന്നതാണ്. 

6- ഒരാൾ ഒരു കാര്യം ശരിയാണെന്ന് വിചാരിച്ച് ചെയ്താൽ പോലും, അത് ഇസ്‌ലാമിക നിയമത്തിന് വിരുദ്ധമാണെങ്കിൽ അതിന് യാതൊരു വിലയുമില്ല. രണ്ടാമത്തെ ഭർത്താവ് ത്വലാഖ് ചൊല്ലിയ ഉടനെ (ലൈംഗികബന്ധം നടക്കാതെ തന്നെ) ആദ്യ ഭർത്താവിലേക്ക് മടങ്ങാമെന്ന് ആ സ്ത്രീ വിചാരിച്ചെങ്കിലും, ശരീഅത്ത് നിയമപ്രകാരം അത് തെറ്റാണെന്ന് നബി صلى الله عليه وسلم വ്യക്തമാക്കി കൊടുത്തു.