384 ദുറൂസുല്‍ ഹദീസ് - ഉംദതുല്‍ അഹ്കാം- ഹദീസ് 124- دروس الحديث - ജനങ്ങള്‍ക്ക് ബുദ്ധിമുട്ടുണ്ടാകുന്നത് കൊണ്ട് മലക്കുകള്‍ക്കും ബുദ്ധിമുട്ടുണ്ടാകും

   

عمدة الأحكام من كلام خير الأنام صلى الله عليه وسلم
المؤلف: عبد الغني بن عبد الواحد بن علي بن سرور المقدسي الجماعيلي الدمشقي الحنبلي، 

أبو محمد، تقي الدين (المتوفى: 600هـ)  

ജനങ്ങള്‍ക്ക് ബുദ്ധിമുട്ടുണ്ടാകുന്നത് കൊണ്ട് മലക്കുകള്‍ക്കും ബുദ്ധിമുട്ടുണ്ടാകും

124 - عَنْ جَابِرِ بنِ عبدِ اللهِ رضي اللهُ عنهما أَنَّ النَّبِيَّ صلى الله عليه وسلم قَالَ: ((مَنْ أَكَلَ الثُّومَ وَالْبَصَلَ وَالْكُرَّاثَ فَلا يَقْرَبَنَّ مَسْجِدَنَا، فَإِنَّ الْمَلائِكَةَ تَتَأَذَّى مِمَّا يَتَأَذَّى مِنْهُ الإِنْسَانُ)) . وفي روايةٍ ((بني آدمَ)) .

ജാബിർ ബ്നു അബ്ദില്ലാഹ് رضي اللهُ عنهما വിൽ നിന്ന് നിവേദനം: നിശ്ചയം നബി صلى الله عليه وسلم പറഞ്ഞു: "ആരെങ്കിലും വെളുത്തുള്ളി, ഉള്ളി, "കുര്റാ‍ഥ്" (ഒരുതരം ഉള്ളിച്ചെടി) എന്നിവ കഴിച്ചാൽ, അവൻ നമ്മുടെ പള്ളിയോട് അടുക്കരുത്. കാരണം, മനുഷ്യർക്ക് ബുദ്ധിമുട്ടുണ്ടാക്കുന്ന കാര്യങ്ങൾ മലക്കുകൾക്കും ബുദ്ധിമുട്ടുണ്ടാക്കും."

    മറ്റൊരു നിവേദനത്തിൽ (രിവായത്തിൽ) "ആദം സന്തതികൾക്ക്" എന്നാണുള്ളത്.

വിവരണം

    ഇസ്‌ലാം ജീവിതത്തിന്‍റെ വിവിധ വശങ്ങളെ ഉള്‍ക്കൊള്ളുന്ന മതമാണ്‌. ഒരു വിശ്വാസി ശുചിത്വത്തിലും സുഗന്ധത്തിലും ശ്രദ്ധ ചെലുത്തുവാന്‍ മതം നിര്‍ദേശിക്കുന്നു. 

  ആരെങ്കിലും വെളുത്തുള്ളി, ഉള്ളി, അത് പോലെയുള്ളവ കഴിച്ചാൽ അവൻ പള്ളിയോട് അടുക്കരുത് എന്ന്   ഈ ഹദീസിൽ നബി صلى الله عليه وسلم തന്‍റെ അനുചരന്മാരോട് കൽപ്പിച്ചു. അത് (വെളുത്തുള്ളി) പച്ചക്ക് (വേവിക്കാതെ) കഴിച്ചവന്‍റെ കാര്യത്തിലാണ്. എന്നാൽ വേവിച്ചതിന് ശേഷം അത് കഴിച്ചവനാണെങ്കിൽ അതിന് വിലക്കില്ല. കാരണം വേവിക്കുന്നതിലൂടെ അതിന്‍റെ ഗന്ധം ഇല്ലാതാകും. 

പള്ളിയല്ലാത്ത, നമസ്കാരം ഒരുമിച്ചുകൂടുന്ന സ്ഥലങ്ങളെയും ഇതിനോട് താരതമ്യം (ഖിയാസ്) ചെയ്തിരിക്കുന്നു; ഉദാഹരണത്തിന് പെരുന്നാൾ നമസ്കാര സ്ഥലം, മയ്യിത്ത് നമസ്കാര സ്ഥലം, അതുപോലെയുള്ള ആരാധനകൾക്ക് ഒരുമിച്ചുകൂടുന്ന സ്ഥലങ്ങൾ. അതുപോലെ വിജ്ഞാന സദസ്സുകൾ, ദിക്ർ സദസ്സുകൾ തുടങ്ങിയവയും (ഇതിൽ പെടും). എന്നാൽ അങ്ങാടികളും അതുപോലുള്ള സ്ഥലങ്ങളും ഇതിനോട് ചേർക്കപ്പെടുകയില്ല.

    വിലക്കിനുള്ള കാരണം മനുഷ്യർക്ക് ബുദ്ധിമുട്ടുണ്ടാകുന്നതും മലക്കുകൾക്ക് അതിന്‍റെ ഗന്ധം കാരണം ബുദ്ധിമുട്ടുണ്ടാകുന്നതുമാണ്. ഇതിന്‍റെ അടിസ്ഥാനത്തിൽ, പള്ളിയിൽ മനുഷ്യർ ഇല്ലാതെ ഒഴിഞ്ഞതാണെങ്കിലും അതിൽ പ്രവേശിക്കുന്നത് ഈ വിലക്കിൽ ഉൾപ്പെടും; കാരണം അത് (പള്ളി) മലക്കുകളുടെ സ്ഥലമാണ്, കൂടാതെ ഹദീസുകളുടെ പൊതുവായ ആശയവും (അതാണ് വ്യക്തമാക്കുന്നത്). അതടിസ്ഥാനത്തില്‍ മലക്കുകൾ സുഗന്ധം കൊണ്ട് സന്തോഷിക്കുമെന്നും നമുക്ക് മനസിലാക്കാം. ഇക്കാരണത്താൽ, നബി صلى الله عليه وسلم സുഗന്ധം ഇഷ്ടപ്പെടുകയും അത് എപ്പോഴും ധാരാളമായി ഉപയോഗിക്കുകയും ചെയ്തിരുന്നു.

    മോശം ഗന്ധമുള്ള എല്ലാറ്റിന്‍റെയും വിധി വെളുത്തുള്ളിയുടെയും ഉള്ളിയുടെയും വിധി പോലെയാണ്. ഉദാഹരണത്തിന് പുകവലിക്കുന്നവൻ (സിഗരറ്റ് വലിക്കുന്നവൻ), തന്‍റെ കൂടെയിരിക്കുന്നവനെ ബുദ്ധിമുട്ടിക്കുന്ന രൂപത്തിൽ കക്ഷത്തിലോ മറ്റോ ദുർഗന്ധമുള്ളവൻ തുടങ്ങിയവർ. ഇങ്ങനെയുള്ളവർ ജമാഅത്തിനോടൊപ്പം നമസ്കരിക്കുന്നത് കറാഹത്താണ് (അനിഷ്ടകരമാണ്). ഈ ഗന്ധം നീക്കുന്ന ഒന്ന് ഉപയോഗിക്കുന്നത് വരെ അവനെ അതിൽ നിന്ന് വിലക്കുകയും വേണം.

    ശൈഖ് ഉസൈമീന്‍ رحمه الله പറയുന്നു: ചില ആളുകളിൽ 'ബഖർ' അഥവാ ദുര്‍ഗന്ധം ഉണ്ടാകും - നമുക്കും നിങ്ങൾക്കും അല്ലാഹുവിനോട് നാം രക്ഷ ചോദിക്കുന്നു- ഒന്നുകിൽ അവന്‍റെ മൂക്കിൽ, അല്ലെങ്കിൽ വായിൽ. അവൻ സംസാരിക്കാൻ തുടങ്ങിയാൽ അവന്‍റെ വായിൽ നിന്ന് വെറുപ്പുളവാക്കുന്ന ഗന്ധം പുറത്തുവരുന്നത് നിനക്ക് അനുഭവപ്പെടും. അവൻ ശ്വാസമെടുക്കുമ്പോൾ അവന്‍റെ മൂക്കിൽ നിന്ന് വെറുപ്പുളവാക്കുന്ന ഗന്ധം പുറത്തുവരുന്നത് നിനക്ക് അനുഭവപ്പെടും. ഇത് ഒരു രോഗമാണെന്നതിൽ സംശയമില്ല- നമ്മുടെ സഹോദരങ്ങൾക്ക് വേണ്ടി നാം അല്ലാഹുവിനോട് 'ആഫിയത്ത്' (സൗഖ്യം) ചോദിക്കുന്നു.

    അവനിൽ ഇത് ഉണ്ടെങ്കിൽ അവൻ (ജമാഅത്തായി) നമസ്കരിക്കരുത്. അതുപോലെ, ചില ആളുകൾക്ക് അവരുടെ കക്ഷങ്ങളിൽ 'ബഖർ' (ദുർഗന്ധം) ഉണ്ടാകും, വളരെ മോശമായ, അഴുകിയ ഗന്ധം. അത്  കുർറാസിനേക്കാളും ഉള്ളിയെക്കാളും ശക്തമായിരിക്കും. ഇങ്ങനെയുള്ളവനോടും നമ്മൾ പറയും, പള്ളികളിൽ ഹാജരാകരുത്. അവന് ജമാഅത്തിനോടൊപ്പം നമസ്കരിക്കാൻ ആഗ്രഹമുണ്ടാകും, (പക്ഷെ) നമ്മൾ പറയും: സാധ്യമല്ല, നീ ആളുകളെ ബുദ്ധിമുട്ടിക്കും.

    ഇതുപോലെ തന്നെയാണ് പുകവലിക്കുന്നവനും. കാരണം ആളുകൾ അവനെക്കൊണ്ട് ബുദ്ധിമുട്ടുന്നു. പ്രത്യേകിച്ചും ചില ആളുകൾ- അല്ലാഹുവിനോട് നാം സൗഖ്യം ചോദിക്കുന്നു- അവർ പുകവലി അധികരിപ്പിക്കുന്നു, പള്ളിയുടെ വാതിൽക്കൽ വെച്ച് അവൻ പുകവലിക്കുന്നത് നിനക്ക് കാണാം, എന്നിട്ട് അവൻ പള്ളിയിൽ പ്രവേശിക്കുന്നു. അതായത്, ആ ഗന്ധം അവനിൽ നിന്ന് വിട്ടുപോയിട്ടില്ല. അതിനാൽ, ആ ഗന്ധം നിലനിൽക്കുന്നിടത്തോളം കാലം അവൻ പള്ളിയിൽ പ്രവേശിക്കാൻ പാടില്ലാത്തതാണ്. (ശൈഖ് മുഹമ്മദു ബ്നു സ്വാലിഹ് അല്‍ ഉസൈമീന്‍)

    അല്ലാഹു നിർബന്ധമാക്കിയ ജമാഅത്ത് നമസ്കാരം നിർവഹിക്കാൻ വേണ്ടി, കഴിവുണ്ടെങ്കിൽ അത് (ദുർഗന്ധം നീക്കാനുള്ള മാർഗം) ചെയ്യാൻ അവൻ ബാധ്യസ്ഥനാണ്.

    എന്നാൽ പുകവലി, അത് എല്ലാ അർത്ഥത്തിലും നിഷിദ്ധമാണ്. എല്ലാ സമയത്തും അത് ഉപേക്ഷിക്കൽ നിർബന്ധവുമാണ്. കാരണം അതിൽ ദീനിലും, ശരീരത്തിലും, സമ്പത്തിലും ധാരാളം ദോഷങ്ങളുണ്ട്. 

ഹദീസില്‍ നിന്നുള്ള പാഠങ്ങള്‍

1- വെളുത്തുള്ളി, ഉള്ളി, അത് പോലെ മോശം വാസനയുള്ളവ  പച്ചയായി കഴിച്ചവർ പള്ളിയിൽ വരുന്നത് വിലക്കിയിരിക്കുന്നു.

2- ഈ വിലക്കിന് കാരണം, അതിന്‍റെ രൂക്ഷഗന്ധം അവിടെയുള്ള ആളുകളെയും മലക്കുകളെയും ബുദ്ധിമുട്ടിക്കുന്നു എന്നതാണ്.

3- മനുഷ്യർക്ക് ബുദ്ധിമുട്ടുണ്ടാക്കുന്ന കാര്യങ്ങൾ മലക്കുകൾക്കും ബുദ്ധിമുട്ടുണ്ടാക്കും എന്ന് ഈ ഹദീസ് വ്യക്തമാക്കുന്നു.

4- ഈ വിധി വെളുത്തുള്ളിക്കും ഉള്ളിക്കും മാത്രമല്ല, ദുർഗന്ധമുണ്ടാക്കുന്ന എല്ലാ വസ്തുക്കൾക്കും ബാധകമാണ്. ഉദാഹരണത്തിന്: സിഗരറ്റിന്‍റെ ഗന്ധം, വായ്‌നാറ്റം, കക്ഷത്തിലെയും മറ്റും വിയർപ്പ് നാറ്റം.

5- പള്ളി പോലെത്തന്നെ, പെരുന്നാൾ നമകാര സ്ഥലം, മയ്യിത്ത് നമസ്കാരം, വിജ്ഞാന സദസ്സുകൾ തുടങ്ങിയ മറ്റ് പുണ്യകരമായ ഒത്തുചേരലുകൾക്കും ഈ വിധി ബാധകമാണ്.

6- എന്നാൽ അങ്ങാടികൾ (മാർക്കറ്റുകൾ) പോലുള്ള സാധാരണ ഒത്തുചേരൽ സ്ഥലങ്ങൾക്ക് ഈ വിധി ബാധകമല്ല. സ്വയം ശുദ്ധി എല്ലായിടത്തും കാത്തുസൂക്ഷിക്കള്‍ അഭികാമ്യമാണ്. 

7- ഈ ഭക്ഷ്യ വസ്തുക്കള്‍ പാചകം ചെയ്യുന്നതിലൂടെയോ മറ്റോ ദുർഗന്ധം പൂർണ്ണമായും നീങ്ങിയാൽ, പള്ളിയിൽ വരുന്നതിനുള്ള വിലക്കും  ഇല്ലാതാകും.

8- വെളുത്തുള്ളിയും ഉള്ളിയും കഴിക്കുന്നത് അടിസ്ഥാനപരമായി നിഷിദ്ധമല്ല (ഹറാമല്ല), മറിച്ച് അത് അനുവദനീയമാണ് (മുബാഹ്). വിലക്ക് അത് കഴിച്ചയുടന്‍ പള്ളിയിൽ വരുന്നതിന് മാത്രമാണ്.

9- നബി صلى الله عليه وسلم അവ കഴിക്കാതിരുന്നത് അത് ഹറാമായതുകൊണ്ടല്ല, മറിച്ച് അവിടുന്ന് മലക്കുകളുമായി നിരന്തരം സംഭാഷണം നടത്തുന്ന പ്രത്യേക സാഹചര്യമുള്ളതുകൊണ്ടാണ്.

10- ഇസ്‌ലാം വ്യക്തി ശുചിത്വത്തിനും, സുഗന്ധം ഉപയോഗിക്കുന്നതിനും, നല്ല മര്യാദകൾ പാലിക്കുന്നതിനും വലിയ പ്രാധാന്യം നൽകുന്നു.

11-മറ്റുള്ളവരുടെ അവകാശങ്ങളെയും വികാരങ്ങളെയും മാനിക്കേണ്ടതിന്‍റെ പ്രാധാന്യം ഇത് പഠിപ്പിക്കുന്നു. മുസ്ലീങ്ങളെ (ഗന്ധം കൊണ്ടോ വാക്കുകൊണ്ടോ) ബുദ്ധിമുട്ടിക്കാൻ പാടില്ല.

12- മോശം ഗന്ധമുള്ളവർ, നിർബന്ധമായ ജമാഅത്ത് നമസ്കാരത്തിൽ പങ്കെടുക്കാൻ വേണ്ടി കഴിവനുസരിച്ച് ആ ഗന്ധം നീക്കം ചെയ്യാൻ ബാധ്യസ്ഥനാണ്.

14- പള്ളിയിലെ ജമാഅത്തിൽ പങ്കെടുക്കാതിരിക്കാനുള്ള ഒരു അടവായി മനഃപൂർവ്വം ഇവ കഴിക്കുന്നത് നിഷിദ്ധമാണ്. 

15- പള്ളികൾ മനുഷ്യരിൽ നിന്ന് ഒഴിഞ്ഞ് നിൽക്കുന്ന സമയത്തും മലക്കുകളുടെ സാന്നിധ്യമുള്ള അനുഗ്രഹീത സ്ഥലങ്ങളാണ്.