480 ദുറൂസുല്‍ ഹദീസ് - ഉംദതുല്‍ അഹ്കാം- ഹദീസ് 220 دروس الحديث - ഇഹ്റാമില്‍ പ്രവേശിച്ചവന് ധരിക്കാന്‍ പാടില്ലാത്തവ

 

 

عمدة الأحكام من كلام خير الأنام صلى الله عليه وسلم
المؤلف: عبد الغني بن عبد الواحد بن علي بن سرور المقدسي الجماعيلي الدمشقي الحنبلي، 

أبو محمد، تقي الدين (المتوفى: 600هـ) 

ഇഹ്റാമില്‍ പ്രവേശിച്ചവന് ധരിക്കാന്‍ പാടില്ലാത്തവ 

باب ما يلبس المُحْرِمُ من الثيابِ

ഇഹ്‌റാം ചെയ്തവർ ധരിക്കേണ്ട വസ്ത്രങ്ങൾ

220 - عَنْ عَبْدِ اللَّهِ بْنِ عُمَرَ رضي الله عنهما: (أَنَّ رَجُلاً قَالَ يَا رَسُولَ اللَّهِ، مَا يَلْبَسُ الْمُحْرِمُ مِنْ الثِّيَابِ؟ قَالَ رَسُولُ اللَّهِ صلى الله عليه وسلم: لايَلْبَسُ الْقَمِيصَ، وَلا الْعَمَائِمَ، وَلا السَّرَاوِيلاتِ، وَلا الْبَرَانِسَ، وَلا الْخِفَافَ، إلاَّ أَحَدٌ لا يَجِدُ نَعْلَيْنِ فَلْيَلْبَسْ خُفَّيْنِ وَلْيَقْطَعْهُمَا أَسْفَلَ مِنْ الْكَعْبَيْنِ، وَلا يَلْبَسْ مِنْ الثِّيَابِ شَيْئاً مَسَّهُ زَعْفَرَانٌ أَوْ وَرْسٌ) .
وَلِلْبُخَارِيِّ: (وَلا تَنْتَقِبِ الْمَرْأَةُ. وَلا تَلْبَسِ الْقُفَّازَيْنِ) .

അബ്ദുല്ലാഹിബ്‌നു ഉമർ رضي الله عنهما വിൽ നിന്ന് നിവേദനം: ഒരാൾ ചോദിച്ചു: "അല്ലാഹുവിന്‍റെ റസൂലേ, ഇഹ്‌റാം ചെയ്തവർ ഏതുതരം വസ്ത്രങ്ങളാണ് ധരിക്കേണ്ടത്?" റസൂല്‍ صلى الله عليه وسلم മറുപടി പറഞ്ഞു: "ഇഹ്‌റാം ചെയ്തവർ കുപ്പായങ്ങൾ, തലപ്പാവുകൾ, പൈജാമകൾ, തൊപ്പിയുള്ള വസ്ത്രങ്ങൾ, ഷൂസുകൾ/സോക്സുകള്‍ എന്നിവ ധരിക്കരുത്. എന്നാൽ ചെരുപ്പ് ലഭിക്കാത്തവർക്ക് ഷൂസ് ധരിക്കാവുന്നതാണ്, പക്ഷേ അവ കണങ്കാലിന് താഴെയായി മുറിക്കണം. കുങ്കുമമോ വറസ് എന്ന ചെടിയോ പുരട്ടിയ വസ്ത്രങ്ങളും ധരിക്കരുത്."

    ബുഖാരിയുടെ നിവേദനത്തിൽ ഇപ്രകാരം കൂടിയുണ്ട്: "സ്ത്രീകൾ മുഖപടം (നിഖാബ്) ധരിക്കരുത്, കൈയുറകളും (ഗ്ലൗസ്) ധരിക്കരുത്."

• القميص: തുന്നിയ സാധാരണ വസ്ത്രങ്ങൾ.

• السراويلات: ശരീരത്തിന്‍റെ താഴ്ഭാഗം മറയ്ക്കാൻ ഉപയോഗിക്കുന്ന തുന്നിയ വസ്ത്രങ്ങൾ (പൈജാമ, പാന്റ്സ് തുടങ്ങിയവ).

• البرانس: തലയുമായി ചേർന്ന് തൊപ്പി രൂപത്തില്‍ തുന്നിയിട്ടുള്ള തരം പ്രത്യേക വസ്ത്രങ്ങൾ.

• الخفاف: പകുതി കാലുവരെ മറയുന്ന വിധത്തിലുള്ള സോക്സുകൾ അല്ലെങ്കിൽ ഷൂസുകൾ.

• الوَرْس: വസ്ത്രങ്ങൾക്ക് നിറവും മണവും നൽകാൻ ഉപയോഗിക്കുന്ന ഒരുതരം മഞ്ഞച്ചെടി.

• النقاب: മുഖം മറക്കുകയും കണ്ണുകൾ കാണാനായി രണ്ട് ദ്വാരങ്ങൾ ഉണ്ടാവുകയും ചെയ്യുന്ന മുഖപടം.

• القفازين: സ്ത്രീകൾ കൈകളിൽ ധരിക്കുന്ന ഗ്ലൗസുകൾ.

വിവരണം

    ഇഹ്‌റാമില്‍ പ്രവേശിച്ച ഒരാൾക്ക് എന്തെല്ലാം അനുവദനീയമാണെന്നും എന്തെല്ലാം നിഷിദ്ധമാണെന്നും അല്ലാഹുവും അവന്‍റെ റസൂല്‍ صلى الله عليه وسلم യും വ്യക്തമായി വിവരിച്ചു തന്നിട്ടുണ്ട്. മഹത്തുക്കളായ സ്വഹാബികൾ അത് നമുക്ക് കൈമാറിത്തരികയും ചെയ്തിരിക്കുന്നു.

    അബ്ദുല്ലാഹിബ്‌നു ഉമർ رضي الله عنهما നിവേദനം ചെയ്യുന്ന ഈ ഹദീസിൽ, ഹജ്ജിനോ ഉംറക്കോ വേണ്ടി ഇഹ്‌റാമില്‍ പ്രവേശിച്ചാല്‍ ഏതുതരം വസ്ത്രങ്ങളാണ് ധരിക്കേണ്ടതെന്ന് ഒരാൾ നബി صلى الله عليه وسلم യോട് ചോദിക്കുന്നു. ഇതിന് മറുപടിയായി ഏതൊക്കെ വസ്ത്രങ്ങൾ ധരിക്കാൻ പാടില്ല എന്നാണ് നബി صلى الله عليه وسلم വ്യക്തമാക്കിയത്. കാരണം, അനുവദനീയമായ വസ്ത്രങ്ങൾ എണ്ണമറ്റതാണ്, എന്നാൽ നിഷിദ്ധമായവ പരിമിതമാണ്. അതിനാൽ നിഷിദ്ധമായവയെ എടുത്തു പറയുന്നതിലൂടെ "ഇവ ഒഴിവാക്കുക, ബാക്കിയുള്ളവ ധരിക്കാം" എന്ന സന്ദേശമാണ് നബി صلى الله عليه وسلم നൽകിയത്.

വിലക്കപ്പെട്ട വസ്ത്രങ്ങൾ:

1. കുപ്പായം (ഖമീസ്): ശരീരത്തിന്‍റെ അളവിനനുസരിച്ച് തുന്നിയതും കൈകളുള്ളതും തലയിലൂടെ ധരിക്കുന്നതുമായ വസ്ത്രം. 

2. സറാവീൽ (പൈജാമ/പാന്റ്സ്): സാധാരണയായി നാഭിക്കും മുട്ടിനുമിടയിൽ/കണങ്കാലിനുമിടയില്‍ മറക്കുന്നതും രണ്ട് കാലുകളെയും പ്രത്യേകം വേർതിരിച്ച് തുന്നിയതുമായ വസ്ത്രം.

3. തലപ്പാവുകൾ: തലയിൽ ചുറ്റിക്കെട്ടുന്ന വസ്ത്രങ്ങൾ, തൊപ്പികള്‍ എന്നിവ.

4. ബറാനിസ്: തലയും ഉടലും ഒരേപോലെ മറക്കുന്നതും തലഭാഗം വസ്ത്രത്തോടൊപ്പം ചേർന്ന് തുന്നിയതുമായ വസ്ത്രം.

5. ഖുഫ്ഫുകൾ (കാലുകൾ പൂർണ്ണമായി മറയ്ക്കുന്ന തുകൽ സോക്സുകൾ/ഷൂസുകൾ). 

  സാധാരണ ചെരുപ്പുകൾ കാലിന്‍റെ മുകൾഭാഗം പൂർണ്ണമായി മറക്കാത്തവയാണ്. നബി صلى الله عليه وسلم പറഞ്ഞു: "ഒരാൾക്ക് ചെരുപ്പുകൾ ലഭ്യമല്ലെങ്കിൽ അയാൾ ഖുഫ്ഫുകൾ ധരിക്കട്ടെ, എന്നാൽ അവ കണങ്കാലിന് (രണ്ട് ഭാഗത്തെയും മുഴച്ചുനിൽക്കുന്ന അസ്ഥികൾ) താഴെയായി മുറിക്കണം." ഇത് അവയെ സാധാരണ ചെരുപ്പുകളോട് സാദൃശ്യമുള്ളതാക്കാൻ വേണ്ടിയാണ്. മുകളിൽ പറഞ്ഞ ഈ നിബന്ധനകളെല്ലാം പുരുഷന്മാർക്ക് മാത്രമുള്ളതാണ്.

    തുടർന്ന് നബി صلى الله عليه وسلم പറഞ്ഞു: "കുങ്കുമമോ (സഅ്ഫറാൻ) വറസോ പുരട്ടിയ വസ്ത്രങ്ങൾ നിങ്ങൾ ധരിക്കരുത്." കുങ്കുമം പണ്ട് കാലത്ത് സുഗന്ധമായും നിറം നൽകാനും ഉപയോഗിച്ചിരുന്നു. 'വറസ്' വസ്ത്രങ്ങളിൽ നിറം നൽകാൻ ഉപയോഗിക്കുന്ന മഞ്ഞനിറമുള്ള സുഗന്ധസസ്യമാണ്. ഈ വിലക്ക് പുരുഷന്മാർക്കും സ്ത്രീകൾക്കും ഒരുപോലെ ബാധകമാണ്.

    കൂടാതെ നബി صلى الله عليه وسلم പറഞ്ഞു: "ഇഹ്‌റാം ചെയ്ത സ്ത്രീ മുഖപടം (നിഖാബ്) ധരിക്കരുത്, കൈയുറകളും (ഗ്ലൗസ്) ധരിക്കരുത്." മുഖം മറക്കുകയും കണ്ണുകൾ കാണാൻ ദ്വാരങ്ങൾ ഉണ്ടാവുകയും ചെയ്യുന്നതാണ് നിഖാബ്. വിരലുകളും കൈപ്പടങ്ങളും മറക്കുന്നതാണ് കൈയുറകൾ.

    ഇവിടെ നിരോധിച്ചത് നിഖാബും കൈയുറകളുമാണ്. എന്നാൽ നിഖാബ് അല്ലാത്ത വസ്ത്രങ്ങൾ (ഉദാഹരണത്തിന് തട്ടത്തിന്‍റെ ഭാഗം മുഖത്തേക്ക് താഴ്ത്തിയിടുക) ഉപയോഗിച്ച് അന്യപുരുഷന്മാരുടെ മുന്നിൽ മുഖവും കൈകളും മറക്കാവുന്നതാണ്. അസ്മാ ബിൻത് അബീബക്കർ رضي الله عنها ഇഹ്‌റാമിൽ മുഖം മറച്ചിരുന്നതായി ഇമാം ഹാക്കിം رحمه الله നിവേദനം ചെയ്തിട്ടുണ്ട്. ചുരുക്കത്തിൽ, നിഖാബ്, കൈയുറകൾ എന്നിവക്കാണ് പ്രത്യേക വിലക്കുള്ളത്, മുഖവും കൈകളും മറയ്ക്കുന്നതിനല്ല.

ഹദീസില്‍ നിന്നുള്ള പാഠങ്ങള്‍

1- അറിവ് നേടാൻ ആഗ്രഹിക്കുന്ന വിഷയത്തെക്കുറിച്ച് വ്യക്തമായി ചോദ്യങ്ങൾ ചോദിക്കേണ്ടതിന്‍റെ പ്രാധാന്യം ഇതിൽ നിന്നും മനസ്സിലാക്കാം.

2- ചോദിച്ച ചോദ്യത്തേക്കാൾ കൂടുതൽ വിവരങ്ങൾ നൽകി ഉപദേശിക്കുന്നത് ഉപകാരം പൂർണ്ണമാകാൻ നല്ലതാണെന്ന് ഈ ഹദീസ് പഠിപ്പിക്കുന്നു.

3- പൊതുവായ നന്മക്കായി പള്ളികളിൽ വെച്ച് ഉറക്കെ ചോദ്യങ്ങൾ ചോദിക്കുന്നത് അനുവദനീയമാണ്.

4- ചോദ്യം ഉചിതമല്ലെങ്കിൽ അതിനെ ശരിയായ അർത്ഥത്തിലേക്ക് തിരിച്ചുവിടുന്നത് അധ്യാപനത്തിന്‍റെ ഉത്തമ മാതൃകയാണ്. അനുവദനീയമായ വസ്ത്രങ്ങൾ ധാരാളമുള്ളതിനാൽ, ഏതൊക്കെ പാടില്ല എന്ന് വ്യക്തമാക്കിയ നബി صلى الله عليه وسلم യുടെ രീതി അദ്ദേഹത്തിന്‍റെ സംസാര വൈദഗ്ധ്യത്തെ കാണിക്കുന്നു.

5- ഇഹ്റാമില്‍ പുരുഷന്മാർക്ക് കുപ്പായം, തലപ്പാവ്, പൈജാമ, തൊപ്പിയുള്ള വസ്ത്രങ്ങൾ, ഷൂസുകൾ തുടങ്ങിയ തുന്നിയ വസ്ത്രങ്ങള്‍ നിഷിദ്ധമാണ്. 

6- ശരീരത്തിന്‍റെയോ അവയവങ്ങളുടെയോ ആകൃതിയിൽ നിർമ്മിക്കപ്പെട്ട വസ്ത്രങ്ങളെയും തല മറക്കുന്നതിനെയും കാലുകൾ മറക്കുന്നതിനെയുമാണ് നബി صلى الله عليه وسلم ഇവിടെ വിലക്കിയത്.

7- സ്ത്രീകൾക്ക് തുന്നിയ വസ്ത്രങ്ങൾ ധരിക്കാനും തല മറക്കാനും അനുവാദമുണ്ട്.

8- നിരോധിക്കപ്പെട്ട വസ്ത്രങ്ങൾ അവയുടെ സാധാരണ രീതിയിൽ ധരിക്കാനാണ് വിലക്കുള്ളത്. ഉദാഹരണത്തിന്, ഒരു കുപ്പായം ധരിക്കാതെ പുതപ്പായി ഉപയോഗിച്ചാൽ അതിൽ തെറ്റില്ല.

9- കുങ്കുമമോ 'വറസോ' (ഒരുതരം ചെടി) പുരട്ടിയ സുഗന്ധമുള്ള വസ്ത്രങ്ങൾ ഇഹ്റാമിൽ പാടില്ല. മറ്റെല്ലാ സുഗന്ധദ്രവ്യങ്ങളും ഇതിൽ ഉൾപ്പെടും.

10- ഇഹ്റാമിൽ സ്ത്രീകൾ മുഖം മറയ്ക്കുന്നതും (നിഖാബ്), ആണുങ്ങളും പെണ്ണുങ്ങളും കൈയുറകൾ (ഗ്ലൗസ്) ധരിക്കുന്നതും നിഷിദ്ധമാണ്.

12- ചെരുപ്പ് ലഭ്യമല്ലെങ്കിൽ ഷൂസുകൾ കണങ്കാലിന് താഴെയായി മുറിച്ച് ഉപയോഗിക്കാൻ അനുവാദമുണ്ട്. ഇത് ഇസ്‌ലാമിക ശരീഅത്തിന്‍റെ ലളിതസ്വഭാവത്തെ കാണിക്കുന്നു.

13- എല്ലാവരും ഒരേപോലെയുള്ള വസ്ത്രം ധരിക്കുന്നത് ഇസ്‌ലാമിലെ സമത്വത്തെയും ലാളിത്യത്തെയും സൂചിപ്പിക്കുന്നു. 

14- അറിവ് നേടുന്നതിൽ സ്വഹാബികൾ കാണിച്ച അതീവ താല്പര്യവും ഇതിൽ വ്യക്തമാണ്.