ഫോളോ ചെയ്യാം

Saturday, 17 May 2025

ദുറൂസുല്‍ ഹദീസ് - ഭാഗം 211 دروس الحديث - ഇസ്‌ലാമിലെ ആഘോഷങ്ങള്‍ ചെറിയ പെരുന്നാളും ബലി പെരുന്നാളും

 


ഇസ്‌ലാമിലെ ആഘോഷങ്ങള്‍:

ചെറിയ പെരുന്നാളും ബലി പെരുന്നാളും

عَنْ أَنَسٍ قَالَ قَدِمَ رَسُولُ اللَّهِ صلى الله عليه وسلم الْمَدِينَةَ وَلَهُمْ يَوْمَانِ يَلْعَبُونَ فِيهِمَا فَقَالَ «مَا هَذَانِ الْيَوْمَانِ». قَالُوا كُنَّا نَلْعَبُ فِيهِمَا فِى الْجَاهِلِيَّةِ. فَقَالَ رَسُولُ اللَّهِ صلى الله عليه وسلم «إِنَّ اللَّهَ قَدْ أَبْدَلَكُمْ بِهِمَا خَيْرًا مِنْهُمَا يَوْمَ الأَضْحَى وَيَوْمَ الْفِطْرِ»- رواه أبو داود-  صحيح

അനസ് رضي الله عنه പറഞ്ഞു: അല്ലാഹുവിന്‍റെ റസൂല്‍ صلى الله عليه وسلم മദീനയിലേക്ക് വന്നു, അവര്‍ക്ക് കളിക്കാന്‍ (ആഘോഷിക്കാന്‍) രണ്ട് ദിനങ്ങളുണ്ടായിരുന്നു. അപ്പോള്‍ റസൂല്‍ صلى الله عليه وسلم ചോദിച്ചു: ഈ രണ്ട് ദിവസങ്ങള്‍ ഏതാണ്? അവര്‍ പറഞ്ഞു: ഞങ്ങള്‍ ജാഹിലിയ്യത്തില്‍ ഈ രണ്ട് ദിവസങ്ങളിലും ആഘോഷിക്കാറുണ്ടായിരുന്നു. അപ്പോള്‍ അല്ലാഹുവിന്‍റെ റസൂല്‍ صلى الله عليه وسلم പറഞ്ഞു: നിശ്ചയം അവ രണ്ടിനേക്കാളും ഉത്തമമായത് അല്ലാഹു നിങ്ങള്‍ക്ക് പകരമാക്കിയിരിക്കുന്നു: അദ്വ്'ഹാ ദിനവും, ഫിത്വ്'ര്‍ ദിനവും. (ബലി പെരുന്നാളും, ചെറിയ പെരുന്നാളും)

വിവരണം

നമുക്ക് ആഘോഷിക്കാന്‍ രണ്ട് ആഘോഷങ്ങള്‍ മാത്രമേ ഇസ്‌ലാം അനുവദിച്ചിട്ടുള്ളൂ. അവ രണ്ടും നാം നല്ലനിലക്ക് ആഘോഷിക്കണം.. മറ്റു  മതാഘോഷങ്ങളില്‍ പങ്കാളിയാവാന്‍ നമുക്ക് പാടുള്ളതല്ല..

ജാഹിലിയ്യാ കാലത്ത് ആളുകള്‍ വിവിധ ആഘോഷങ്ങള്‍ ആഘോഷിച്ചിരുന്നു. എന്നാല്‍ ആ ആഘോഷങ്ങള്‍ എല്ലാം ഒഴിവാക്കി ഇസ്‌ലാമിന്‍റെ വിശ്വാസസംഹിതകളില്‍ ഒതുങ്ങി നില്‍ക്കുന്ന രണ്ട് ആഘോഷങ്ങള്‍ മാത്രം അനുവദിക്കുകയാണ് ഉണ്ടായിട്ടുള്ളത്. ഈ രണ്ട് ആഘോഷങ്ങള്‍ക്ക് പുറമേ മറ്റു ആഘോഷങ്ങള്‍ ഒരു മുസ്‌ലിമിന് പാടുള്ളതല്ല. 

ഇസ്‌ലാമിക നിയമങ്ങള്‍ക്ക് വിരുദ്ധമായ ഒരു ആഘോഷത്തിലും പങ്കെടുക്കാനോ സഹകരിക്കാനോ വിശ്വാസികള്‍ക്ക് പാടില്ലാത്തതാണ്. 

ബഹുദൈവാരാധകരുടെയും, ശിര്‍ക്ക് -ബിദ്'അത്തുകളില്‍ ജീവിക്കുന്നവരുടെയും ധാരാളം ആഘോഷങ്ങള്‍ പ്രചാരത്തിലുണ്ട്. അവ മനസ്സിലാക്കാനും അവയില്‍ നിന്ന് വിട്ടു നില്‍ക്കാനും വിശ്വാസിക്ക് സാധിക്കണം. 


ഇസ്‌ലാമിലെ ആഘോഷങ്ങള്‍ മതത്തിന്‍റെ മാര്‍ഗ്ഗനിര്‍ദേശങ്ങള്‍ക്ക് അനുസൃതമായാണ് ആഘോഷിക്കേണ്ടത്. അവ നമുക്ക് മനസ്സിലാക്കാം.


പെരുന്നാള്‍ നമസ്കാരത്തിന്‍റെ വിധിവിലക്കുകള്‍ ചുരുക്കത്തില്‍:

1- പെരുന്നാള്‍ നമസ്കാരം വാജിബ് (നിര്‍ബന്ധം ആണ്)

2-പെരുന്നാള്‍ നമസ്കാരത്തിന്‍റെ മുമ്പും പിമ്പും സുന്നത്ത് നമസ്കാരങ്ങളില്ല.

3- പെരുന്നാള്‍ നമസ്കാരം മുസ്വല്ലയില്‍ (മൈതാനത്ത്) വെച്ച് നിര്‍വഹിക്കലാണ് ഉത്തമം.

4- പെരുന്നാള്‍ നമസ്കാരം ദ്വുഹാ സമയത്താണ് നിര്‍വഹിക്കപ്പെടേണ്ടത്.

5- പെരുന്നാള്‍ നമസ്കാരം ഖുത്വ്ബക്ക് മുമ്പ് നിര്‍വഹിക്കപ്പെടണം.

6- പെരുന്നാള്‍ നമകാരത്തിന് ബാങ്കും ഇഖാമത്തും ഇല്ല.

7- പെരുന്നാള്‍ നമസ്കാരത്തില്‍ ഒന്നാമത്തെ റക്അത്തില്‍ തക്ബീറത്തുല്‍ ഇഹ്റാമിന് പുറമെ ഏഴ് തക്ബീറുകളും, രണ്ടാമത്തെ റക്അത്തില്‍ സുജൂദില്‍ നിന്ന് ഉയരുമ്പോഴുള്ള തക്ബീറിന് പുറമെ അഞ്ച് തക്ബീറുകളും ചൊല്ലണം. ഓരോ തക്ബീര്‍ ചൊല്ലുമ്പോഴും കൈ ഉയര്‍ത്തണം.

8- പെരുന്നാള്‍ നമസ്കാരത്തില്‍ ഒന്നാം റക്അത്തില്‍ ഫാതിഹക്ക് ശേഷം സൂറത്തു ക്വാഫോ, രണ്ടാമത്തെ റക്അത്തില്‍ സൂറത്തുല്‍ ക്വമറോ, അല്ലെങ്കില്‍ ഒന്നാമത്തെ റക്അത്തില്‍ സൂറത്തുല്‍ അഅ്ലയോ, രണ്ടാമത്തെ റക്അത്തില്‍ സൂറത്തുല്‍ ഗ്വാശിയയോ ഓതുന്നത് സുന്നത്താണ്.

9- സമയം തെറ്റിയതിന് ശേഷമാണ് പെരുന്നാള്‍ അറിഞ്ഞതെങ്കില്‍ അടുത്ത ദിവസമാണ് നമസ്കാരം നിര്‍വഹിക്കേണ്ടത്. മറ്റു കാരണങ്ങളാല്‍ നമസ്കാരം നഷ്ടപ്പെട്ടവന് പിന്നീട് അത് നിര്‍വഹിക്കേണ്ടതില്ല. ഇമാം അവസാന ഇരുത്തത്തില്‍ ആകുമ്പോള്‍ ആണ് ഒരാള്‍ നമസ്കാരത്തിന് എത്തിയതെങ്കില്‍ ഇമാം സലാം വീട്ടിയതിന് ശേഷം എഴുന്നേറ്റ് അവന്‍ രണ്ട് റക്അത്ത് (പെരുന്നാള്‍ നമസ്കാരം) നിര്‍വഹിക്കണം.

10-യാത്രയില്‍ പെരുന്നാള്‍ നമസ്കാരം നിര്‍വഹിക്കപ്പെടുന്ന സ്ഥലത്ത് എത്തിയവന് അത് നിര്‍വഹിക്കാവുന്നതാണ്. ഇല്ലെങ്കില്‍ അവന് അത് ഒഴിവാക്കുന്നത് കൊണ്ട് പ്രശ്നമില്ല.

11-ജുമുഅ ദിവസം പെരുന്നാള്‍ ആയാല്‍ പെരുന്നാള്‍ നമസ്കാരം നിര്‍വഹിച്ചവന് ജുമുഅ നമസ്കാരത്തിന് ഇളവുണ്ട്. ഇങ്ങനെ വന്നാല്‍ നബി صلى الله عليه وسلم ജുമുഅയും നിര്‍വഹിക്കാറുണ്ടായിരുന്നു.

12-പെരുന്നാള്‍ ഖുത്വ്'ബയില്‍ പങ്കെടുക്കല്‍ പ്രബലമായ സുന്നത്താണ്.

13- പെരുന്നാളിലെ ഖുത്വ്'ബ ഒറ്റ ഖുത്വ്'ബയാണ്.

14-പെരുന്നാള്‍ ഖുത്വ്'ബയില്‍ സ്ത്രീകളെ പ്രത്യേകം ഉപദേശിക്കല്‍ സുന്നത്താണ്.

15-പെരുന്നാള്‍ ഖുത്വ്'ബ തക്ബീര്‍ കൊണ്ട് തുടങ്ങാനോ, ഖുത്വ്'ബകള്‍ക്കിടയില്‍ തക്ബീര്‍ ചൊല്ലാനോ സ്വഹീഹായ ഹദീസ് തെളിവായില്ല.


പെരുന്നാളിന്‍റെ സുന്നത്തുകളും ശ്രദ്ധിക്കേണ്ട കാര്യങ്ങളും

1- തക്ബീര്‍ ചൊല്ലല്‍.

2- കുളിക്കല്‍, നല്ല വസ്ത്രം ധരിക്കല്‍.

3- ബലിപെരുന്നാള്‍ നമസ്കാരത്തിന് പുറപ്പെടുന്നതിന് മുമ്പ് ഭക്ഷിക്കാതിരിക്കലും, ഫിത്വ്ര്‍ പെരുന്നാള്‍ നമസ്കാരത്തിന് പുറപ്പെടുന്നതിന് മുമ്പ് വല്ലതും ഭക്ഷിക്കലും.

4- മുസ്വല്ലയിലേക്ക് നേരത്തെ പോകല്‍.

5- സ്ത്രീകള്‍, കുട്ടികള്‍ അടക്കം എല്ലാ മുസ്ലീംകളും മുസ്വല്ലയിലേക്ക് പുറപ്പെടല്‍.

6- മുസ്വല്ലയിലേക്ക് പോകുമ്പോഴും തിരിച്ച് വരുമ്പോഴും രണ്ട് വഴി സ്വീകരിക്കല്‍.

7- നമസ്കാര സ്ഥലത്തേക്ക് നടന്നോ വാഹനത്തിലോ പോകാം.

9- ഈദ് ആശംസ നേരല്‍ നല്ല കാര്യമാണ്.

No comments:

Post a Comment

നിന്നു കൊണ്ട് ഭക്ഷണവും വെള്ളവും കഴിക്കുന്നതിന്‍റെ വിധി

  നിന്നു കൊണ്ട് ഭക്ഷണവും വെള്ളവും കഴിക്കുന്നതിന്‍റെ വിധി  ചോദ്യം: നിന്നു കൊണ്ട് ഭക്ഷണവും വെള്ളവും കഴിക്കുന്നത് വിലക്കുന്ന ചില  നബിവചനങ്ങളുണ്...