الأربعون النووية-حديث:12
ആവശ്യമില്ലാത്തതില് ഇടപെടരുത്
عَنْ أَبِي هُرَيْرَةَ رضي الله عنه قَالَ: قَالَ رَسُولُ اللَّهِ صلى الله عليه وسلم "مِنْ حُسْنِ إسْلَامِ الْمَرْءِ
تَرْكُهُ مَا لَا يَعْنِيهِ".
حَدِيثٌ
حَسَنٌ، رَوَاهُ التِّرْمِذِيُّ [رقم: 2318] ، ابن ماجه [رقم:3976].
അബൂഹുറൈറ رضي الله عنه നിവേദനം, റസൂല് صلى الله عليه وسلم പറഞ്ഞു: ഒരു മുസ്ലിമിന്റെ നല്ല ഇസ്ലാമില് പെട്ടതാണ് അവന് അനുഗുണമല്ലാത്ത കാര്യങ്ങള് അവന് ഉപേക്ഷിക്കുക എന്നത്.
വിവരണം
ഒരു മുസ്ലിമിന്റെ ജീവിതം സമാധാന പൂര്ണ്ണവും സുരക്ഷിതത്വവും ഉള്ളതായിത്തീരുവാന് സഹായിക്കുന്ന നല്ലൊരു സ്വഭാവ ഗുണത്തെയാണ് ഈ ഹദീസ് അറിയിക്കുന്നത്.
ഇസ്ലാം എന്നാല് മതത്തിന്റെ പ്രത്യക്ഷവും പരോക്ഷവുമായ എല്ലാ നിയമ സംഹിതകളെയും ഒന്നിച്ച് അറിയിക്കുന്ന നാമമാണ്.
അതിന് രണ്ട് തലങ്ങളുണ്ട്:
ഒന്ന്: ഇസ്ലാം എന്ന സാധാരണ തലം. അഥവാ അഹ്ലുല് ക്വിബ്'ല എന്ന ഗണത്തില് ആണ് ഇതില് ആളുകള് ഉള്പ്പെടുക. لا إله إلا الله محمد رسول الله എന്നീ രണ്ട് സാക്ഷ്യവാക്യങ്ങള് പ്രഖ്യാപിക്കുന്നതിലൂടെ ഇതില് ഉള്പെടും.
രണ്ട്: ഇസ്ലാമിന്റെ പരിപൂര്ണ്ണതയും അതിനെ യഥാവിധി സാക്ഷാത്കരിക്കലുമാണ്. അഥവാ: അല്ലാഹുവിന്റെ നിരീക്ഷണമുണ്ട് എന്ന വിചാരത്തില് അടിമ മതനിയമങ്ങള് പ്രത്യക്ഷമായും പരോക്ഷമായും യഥാവിധി നടപ്പിലാക്കലാണ് അത്.
ഈ തലത്തിലാണ് ഇഹ്സാനിന്റെ സാക്ഷാത്കാരം നടക്കുന്നത്.
ഈ ഹദീസില് പറയുന്നത് ഈ ഒരു ഇസ്ലാമിനെ കുറിച്ചാണ്. അഥവാ പരിപൂര്ണ്ണമായ ഇസ്ലാം. ഒരാളുടെ ഇസ്ലാം പരിപൂര്ണ്ണവും ഉത്തമവും ആവാനുള്ള കാര്യത്തെയാണ് റസൂല് صلى الله عليه وسلم നമുക്ക് അറിയിച്ച് തന്നിരിക്കുന്നത്.
ഒരാള്ക്ക് മതപരമോ ഭൗതികമോ ആയി ഒരു ആവശ്യമില്ലാത്ത കാര്യത്തില് ഇടപെടാതിരിക്കല് നല്ല ഇസ്ലാമിന്റെ ലക്ഷണമാണ്. അയാള് നല്ല മുസ്ലിം ആണ് എന്നാണ് അത് അറിയിക്കുന്നത്.
മനുഷ്യന് ആവശ്യമില്ലാത്ത അല്ലെങ്കില് അനുഗുണമല്ലാത്ത കാര്യങ്ങള് ധാരാളമുണ്ട്. എന്നാല് അവയൊക്കെയും താഴെ പറയുന്ന നാല് കാര്യങ്ങളില് ഉള്ക്കൊള്ളും. അവ:-
ഒന്ന്: നിഷിദ്ധങ്ങള്
രണ്ട്: മക്റൂഹ് ആയവ (ചെയ്താല് കുറ്റമില്ലെങ്കിലും ചെയ്യുന്നത് വെറുക്കപ്പെട്ട കാര്യവും അത് ഉപേക്ഷിക്കല് അത്യാവശ്യവുമാണ്. ഉദാഹരണം: ഇശാഇന് ശേഷം ഗുണമില്ലാത്ത കാര്യങ്ങള് സംസാരിക്കലും, ഇശാഇന് മുമ്പ് ഉറങ്ങലും പോലെയുള്ളവ)
മൂന്ന്: സംശയമുള്ള കാര്യങ്ങള്
നാല്: അനുവദനീയമായവയില് തന്നെ അനാവശ്യമായവ. അഥവാ അനുവദനീയമാണെങ്കിലും ഒരാള്ക്ക് അത് ചെയ്യല് ആവശ്യമേ ഇല്ല, അങ്ങനെയുള്ള കാര്യങ്ങള്.
ഈ നാല് കാര്യങ്ങളിലേക്കാണ് ഒരാള്ക്ക് അനുഗുണമല്ലാത്ത കാര്യങ്ങള് മടങ്ങുന്നത്. അത് ചിലപ്പോള് നിഷിദ്ധമായതില് പെടുകയും ശിക്ഷക്ക് അര്ഹനാവുകയും ചെയ്തേക്കാം.
അല്ലാഹു ഒരാളെ അവഗണിച്ചു എന്നതിന്റെ ലക്ഷണമാണ് അവന് ആവശ്യമില്ലാത്തത്തില് ഇടപെടുക എന്നത് എന്ന് പൂര്വ്വികരായ പണ്ഡിതന്മാര് പറഞ്ഞിട്ടുണ്ട്. അവന് ആവശ്യമില്ലാത്തതില് ഇടപെടാതെ ശ്രദ്ധിച്ചാല് അല്ലാഹു അവനെ ശരിയായ കാര്യങ്ങളിലേക്ക് തിരിച്ചു വിട്ടേക്കാം.
ഇമാം ശാഫിഈ رحمه الله പറഞ്ഞു: 'മനസ്സിനെ നല്ലതില് പ്രവര്ത്തിപ്പിച്ചില്ലെങ്കില് അത് നിന്നെ നിരര്ത്ഥകമായതില് ചലിപ്പിക്കും'.
ആരെങ്കിലും മുസ്ലീംകളുടെ അഭിമാനത്തിലും ഏഷണിയിലും പരദൂഷണത്തിലും മുഴുകുന്നു എങ്കില് അവന് അല്ലാഹുവിനെ ഓര്ക്കുന്നതില് നിന്നും ക്വുര്ആന് പാരായണത്തില് നിന്നും പോലെയുള്ള നല്ല കാര്യങ്ങളില് നിന്ന് അകലുകയും തിന്മകളില് കഴിയുകയും ചെയ്യും. അപ്പോള് അവന്റെ ഇസ്ലാം ശരിയല്ലാതാവുന്നു.
അത് കൊണ്ട് തന്നെ മനുഷ്യന് പരമാവധി നല്ല കാര്യങ്ങളില് ഇടപെടാന് കഠിനാധ്വാനം ചെയ്യേണ്ടതുണ്ട്. നബി صلى الله عليه وسلم പറഞ്ഞിട്ടുണ്ട്: 'നിനക്ക് ഉപകാരമുള്ള കാര്യങ്ങളില് നീ അത്യാഗ്രഹം കാണിക്കുകയും അല്ലാഹുവിനോട് സഹായം ചോദിക്കുകയും ചെയ്യുക'.
ഉപകാരമില്ലാത്തതില് നിന്ന് അകന്ന് നില്ക്കുകയും അവ ജീവിതത്തില് വരാതിരിക്കാന് ശ്രമിക്കുകയും വേണം.
അനാവശ്യമായ ചോദ്യങ്ങള്, വാക്കുകള്, പ്രവര്ത്തനങ്ങള്, ഇടപെടലുകള്, പെരുമാറ്റങ്ങള്, ചിന്തകള് പോലെയുള്ള എല്ലാം ഒഴിവാക്കണം. ഓരോരുത്തര്ക്കും അനാവശ്യമായത് എന്ത് എന്ന് അവനവനാണ് ബോധ്യം ഉണ്ടാവുക. ഈ കാര്യത്തില് ഞാന് ഇടപെടുന്നത് ശരിയല്ല എന്ന് സ്വയം തോന്നിയാല് പിന്നെ അതില് ഇടപെടരുത്. അല്ലെങ്കില് ഇന്ന കാര്യം ചെയ്താല് എന്റെ മതത്തേയോ സ്വഭാവത്തേയോ ജീവിതത്തേയോ ബാധിക്കും എന്ന് മനസ്സിലായാല് അവ ഉപേക്ഷിക്കുക.
No comments:
Post a Comment