عمدة الأحكام من كلام خير الأنام صلى الله عليه وسلم
المؤلف: عبد الغني بن عبد الواحد بن علي بن سرور المقدسي الجماعيلي الدمشقي الحنبلي،
أبو محمد، تقي الدين (المتوفى: 600هـ)
മഴക്ക് വേണ്ടിയുള്ള പ്രാര്ത്ഥന
158 - عَنْ أَنَسِ بْنِ مَالِكٍ رضي الله عنه ((أَنَّ رَجُلاً دَخَلَ الْمَسْجِدَ يَوْمَ الْجُمُعَةِ مِنْ بَابٍ كَانَ نَحْوَ دَارِ الْقَضَاءِ، وَرَسُولُ اللَّهِ صلى الله عليه وسلم قَائِمٌ يَخْطُبُ، فَاسْتَقْبَلَ رَسُولَ اللَّهِ صلى الله عليه وسلم قَائِمًا، ثُمَّ قَالَ: يَا رَسُولَ اللَّهِ، هَلَكَتْ الأَمْوَالُ، وَانْقَطَعَتْ السُّبُلُ فَادْعُ اللَّهَ تَعَالَى يُغِيثُنَا، قَالَ: فَرَفَعَ رَسُولُ اللَّهِ صلى الله عليه وسلم يَدَيْهِ ثُمَّ قَالَ: اللَّهُمَّ أَغِثْنَا، اللَّهُمَّ أَغِثْنَا، اللَّهُمَّ أَغِثْنَا. قَالَ أَنَسٌ: فَلا وَاَللَّهِ مَا نَرَى فِي السَّمَاءِ مِنْ سَحَابٍ وَلا قَزَعَةٍ، وَمَا بَيْنَنَا وَبَيْنَ سَلْعٍ مِنْ بَيْتٍ وَلا دَارٍ قَالَ: فَطَلَعَتْ مِنْ وَرَائِهِ سَحَابَةٌ مِثْلُ التُّرْسِ. فَلَمَّا تَوَسَّطَتْ السَّمَاءَ انْتَشَرَتْ ثُمَّ أَمْطَرَتْ، قَالَ: فَلا وَاَللَّهِ مَا رَأَيْنَا الشَّمْسَ سَبْتاً، قَالَ: ثُمَّ دَخَلَ رَجُلٌ مِنْ ذَلِكَ الْبَابِ فِي الْجُمُعَةِ الْمُقْبِلَةِ، وَرَسُولُ اللَّهِ صلى الله عليه وسلم قَائِمٌ يَخْطُبُ النَّاسَ، فَاسْتَقْبَلَهُ قَائِماً، فَقَالَ: يَا رَسُولَ اللَّهِ، هَلَكَتْ الأَمْوَالُ، وَانْقَطَعَتْ السُّبُلُ، فَادْعُ اللَّهَ أَنْ يُمْسِكَهَا عَنَّا، قَالَ: فَرَفَعَ رَسُولُ اللَّهِ صلى الله عليه وسلم يَدَيْهِ ثُمَّ قَالَ: اللَّهُمَّ حَوَالَيْنَا وَلا عَلَيْنَا، اللَّهُمَّ عَلَى الآكَامِ وَالظِّرَابِ وَبُطُونِ الأَوْدِيَةِ وَمَنَابِتِ الشَّجَرِ، قَالَ: فَأَقْلَعَتْ، وَخَرَجْنَا نَمْشِي فِي الشَّمْسِ. قَالَ شَرِيكٌ: فَسَأَلْتُ أَنَسَ بْنَ مَالِكٍ: أَهُوَ الرَّجُلُ الأَوَّلُ قَالَ: لا أَدْرِي)) .
അനസ് ബ്നു മാലിക് رضي الله عنه നിവേദനം: (അദ്ദേഹം പറഞ്ഞു) دَار الْقَضَاءِ* ന് നേരെയുള്ള ഒരു വാതിലിലൂടെ ഒരു വെള്ളിയാഴ്ച ദിവസം ഒരാൾ പള്ളിയിലേക്ക് പ്രവേശിച്ചു. അപ്പോൾ അല്ലാഹുവിൻ്റെ റസൂല് صلى الله عليه وسلم എഴുന്നേറ്റുനിന്ന് ഖുത്ബ നടത്തുകയായിരുന്നു. അയാള് നിന്ന് കൊണ്ട് അല്ലാഹുവിൻ്റെ റസൂല് صلى الله عليه وسلم യെ അഭിമുഖീകരിച്ചു പറഞ്ഞു: "അല്ലാഹുവിൻ്റെ ദൂതരേ, സമ്പത്തെല്ലാം നശിച്ചുപോയി, വഴികളെല്ലാം മുറിഞ്ഞുപോയി. അതിനാൽ ഞങ്ങൾക്ക് മഴ നൽകാനായി അല്ലാഹുവിനോട് പ്രാർത്ഥിക്കൂ." അനസ് رضي الله عنه പറയുന്നു: അപ്പോൾ അല്ലാഹുവിൻ്റെ റസൂല് صلى الله عليه وسلم തൻ്റെ കൈകൾ ഉയർത്തിക്കൊണ്ട് പറഞ്ഞു: "അല്ലാഹുവേ, ഞങ്ങൾക്ക് മഴ നൽകേണമേ, അല്ലാഹുവേ, ഞങ്ങൾക്ക് മഴ നൽകേണമേ, അല്ലാഹുവേ, ഞങ്ങൾക്ക് മഴ നൽകേണമേ." അനസ് رضي الله عنه പറയുന്നു: അല്ലാഹുവാണ് സത്യം, ഞങ്ങൾ ആകാശത്ത് ഒരു മേഘമോ മേഘത്തുണ്ടോ കണ്ടിരുന്നില്ല, ഞങ്ങൾക്കും സൽഅ് മലക്കും ഇടയിൽ ഒരു വീടോ ഭവനമോ ഉണ്ടായിരുന്നില്ല. അദ്ദേഹം (അനസ് رضي الله عنه) പറഞ്ഞു: അപ്പോൾ നബി صلى الله عليه وسلم യുടെ പിന്നിൽ നിന്ന് ഒരു പരിച പോലെ ഒരു മേഘം പ്രത്യക്ഷപ്പെട്ടു. അത് ആകാശത്തിൻ്റെ മധ്യഭാഗത്ത് എത്തിയപ്പോൾ പരന്നു, എന്നിട്ട് മഴ വർഷിച്ചു. അദ്ദേഹം പറഞ്ഞു: അല്ലാഹുവാണ് സത്യം, ഞങ്ങൾ ഒരാഴ്ചയോളം സൂര്യനെ കണ്ടില്ല. അദ്ദേഹം (അനസ് رضي الله عنه) പറഞ്ഞു: പിന്നീട് അടുത്ത വെള്ളിയാഴ്ച, പ്രസംഗിച്ചുകൊണ്ടിരുന്ന നബി صلى الله عليه وسلم യുടെ അടുത്തേക്ക് അതേ വാതിലിലൂടെ ഒരാൾ പ്രവേശിച്ചു. അയാൾ എഴുന്നേറ്റുനിന്ന് നബി صلى الله عليه وسلم യെ അഭിമുഖീകരിച്ചുകൊണ്ട് പറഞ്ഞു: "അല്ലാഹുവിൻ്റെ ദൂതരേ, സമ്പത്തെല്ലാം നശിച്ചു, വഴികളെല്ലാം മുറിഞ്ഞുപോയി, അതിനാൽ ഞങ്ങളിൽ നിന്ന് ഈ മഴ തടയാൻ അല്ലാഹുവിനോട് പ്രാർത്ഥിക്കൂ." അപ്പോൾ അല്ലാഹുവിൻ്റെ റസൂല് صلى الله عليه وسلم കൈകൾ ഉയർത്തിക്കൊണ്ട് പറഞ്ഞു: "അല്ലാഹുവേ, ഞങ്ങളുടെ ചുറ്റുപാടുകളിൽ മഴ വർഷിക്കേണമേ, ഞങ്ങളുടെ മേൽ (ദുരിതമായി) വർഷിക്കരുതേ. അല്ലാഹുവേ, കുന്നുകളിലും, ഉയർന്ന പ്രദേശങ്ങളിലും, താഴ്വരകളുടെ അടിഭാഗങ്ങളിലും, മരങ്ങൾ വളരുന്ന സ്ഥലങ്ങളിലും (വർഷിക്കേണമേ)." അനസ് رضي الله عنه പറയുന്നു: അപ്പോൾ മഴ നിന്നു, ഞങ്ങൾ സൂര്യപ്രകാശത്തിലൂടെ നടന്നുപോന്നു. ശരീക് പറഞ്ഞു: ഞാൻ അനസ് ബ്നു മാലിക് رضي الله عنه നോട് ചോദിച്ചു: "ഇത് (മഴ നിര്ത്താന് പ്രാര്ഥിക്കാന് ആവശ്യപ്പെട്ടത്) ആദ്യത്തെ ആളാണോ?" അദ്ദേഹം പറഞ്ഞു: "എനിക്കറിയില്ല."
| പദം | അര്ത്ഥം |
| دار القضاء | ഉമർ رضي الله عنه വിന്റെ വീട് ആയിരുന്നു ഇത്, അദ്ദേഹത്തിൻ്റെ മരണശേഷം കടം വീട്ടാനായി വിൽക്കപ്പെട്ടു. ഉമർ رضي الله عنه തന്റെ കടം വീട്ടുന്നതിനായി തന്റെ സ്വത്ത് വിൽക്കാൻ മകനോട് വസ്വിയ്യത്ത് ചെയ്തിട്ടുണ്ടായിരുന്നു. അങ്ങനെ അദ്ദേഹത്തിന്റെ കടം തീർക്കുന്നതിനായി ആ വീട് വിൽക്കപ്പെട്ടു. അതിനാലാണ് അതിന് 'ദാറുൽ ഖദാ' (കടം വീട്ടിയ വീട്) എന്ന് പേര് വന്നത്; അല്ലാതെ ന്യായാധിപന്റെ വിധി നടപ്പിലാക്കുന്ന ഇടമായതുകൊണ്ടല്ല. |
| قزعة | മേഘത്തിൻ്റെ നേരിയ ഒരു കഷ്ണം. |
| سَلْع | മദീനയുടെ പടിഞ്ഞാറ് ഭാഗത്തുള്ള ഒരു പർവതം. |
| التُّرس | പരിച |
| الآكام | കുന്നുകൾ, മൺകൂനകൾ (ഉയർന്ന ഭൂപ്രദേശങ്ങൾ). |
| الظِّراب | ചെറിയ കുന്നുകൾ. |
| أَقلعت | മഴ നിന്നു, മഴയിൽ നിന്ന് വിട്ടുനിന്നു. |
| مارأينا الشمس سبتاً | ഒരാഴ്ചയോളം ഞങ്ങൾ സൂര്യനെ കണ്ടില്ല. |
വിവരണം
നമ്മുടെ എല്ലാ കാര്യങ്ങളിലും, പ്രത്യേകിച്ച് ദുരന്തങ്ങൾ വരുമ്പോൾ, അല്ലാഹുവിനോട് ദുആ ചെയ്യണമെന്ന് നബി صلى الله عليه وسلم നമ്മെ പഠിപ്പിച്ചിട്ടുണ്ട്. അതുവഴി അല്ലാഹു നമ്മിൽ നിന്ന് പരീക്ഷണങ്ങൾ നീക്കിത്തരും. ഈ ഹദീസിൽ, അനസ് ബ്നു മാലിക് رضي الله عنه നിവേദനം ചെയ്യുന്നത്: ഒരു വെള്ളിയാഴ്ച ഒരാൾ മസ്ജിദുന്നബവി പള്ളിയിലെ ഒരു വാതിലിലൂടെ പ്രവേശിച്ചു. ഈ വാതിൽ മിമ്പറിന് നേരെ എതിർവശത്തായിരുന്നു. അല്ലാഹുവിൻ്റെ ദൂതൻ صلى الله عليه وسلم മിമ്പറിൽ നിന്ന് ഖുത്ബ നടത്തുകയായിരുന്നു. ആഗതൻ എഴുന്നേറ്റുനിന്ന് റസൂൽ صلى الله عليه وسلم യെ മുഖാമുഖം അഭിമുഖീകരിച്ചു കൊണ്ട് പറഞ്ഞു: "അല്ലാഹുവിൻ്റെ ദൂതരേ, മഴ ഇല്ലാത്തതിനാൽ ജീവിക്കാൻ ആവശ്യമായ ഭക്ഷണം കിട്ടാതെ കന്നുകാലികൾ നശിച്ചു, ജീവിതോപാതിക്കുള്ള വഴികൾ മുറിഞ്ഞുപോയി." അതായത്, മേച്ചിൽസ്ഥലങ്ങൾ ഇല്ലാത്തതിനാൽ ഒട്ടകങ്ങൾക്ക് (വഴികളിലൂടെ) സഞ്ചരിക്കാൻ കഴിയാതെ നശിക്കുകയോ ദുർബലരാകുകയോ ചെയ്തു. അല്ലെങ്കിൽ ഭക്ഷ്യവസ്തുക്കൾ എത്തിക്കാൻ കഴിയാതെ വന്നു. അതിനാൽ ഞങ്ങൾക്ക് സഹായം നൽകാനായി (മഴ വർഷിക്കാൻ) അല്ലാഹുവിനോട് പ്രാർത്ഥിക്കൂ. റസൂൽ صلى الله عليه وسلم ആ മനുഷ്യന് മറുപടി നൽകി, തൻ്റെ കൈകൾ ഉയർത്തിക്കൊണ്ട് "അല്ലാഹുവേ, ഞങ്ങൾക്ക് മഴ നൽകേണമേ" എന്ന് മൂന്ന് തവണ ആവർത്തിച്ച് പ്രാർത്ഥിച്ചു.
ഇബ്നു മസ്ഊദ് رضي الله عنه വിൽ നിന്ന് സ്വഹീഹു മുസ്ലിമിൽ വന്നതുപോലെ, നബി صلى الله عليه وسلم പ്രാർത്ഥിച്ചാൽ മൂന്ന് തവണ പ്രാർത്ഥിക്കുമായിരുന്നു. ചോദിച്ചാൽ മൂന്ന് തവണ ചോദിക്കുമായിരുന്നു.
അനസ് ബ്നു മാലിക് رضي الله عنه തുടർന്നു പറയുന്നു: നബി صلى الله عليه وسلم മിമ്പറിൽ നിന്ന് പ്രാർത്ഥിക്കുമ്പോൾ, ആകാശത്ത് ഒരു മേഘക്കൂട്ടമോ നേരിയ മേഘത്തുണ്ടോ, മഴയെ സൂചിപ്പിക്കുന്ന കാറ്റ് പോലെയുള്ള യാതൊരു അടയാളമോ അവർ കണ്ടിരുന്നില്ല. അവർക്കും 'സൽഅ്' മലയ്ക്കും (മദീനയിലെ ഒരു പർവതം) ഇടയിൽ, കാഴ്ച മറയ്ക്കുന്ന ഒരു വീടോ ഭവനമോ ഉണ്ടായിരുന്നില്ല. അപ്പോൾ സൽഇൻ്റെ പിന്നിൽ നിന്ന് ഒരു 'തുർസ്' (പരിച) പോലെ വൃത്താകൃതിയിൽ ഉള്ള ഒരു മേഘം പ്രത്യക്ഷപ്പെട്ടു. അത് ആകാശത്തിൻ്റെ മധ്യഭാഗത്ത് എത്തിയപ്പോൾ, അത് പരന്നു, എന്നിട്ട് മഴ വർഷിച്ചു. ഇതിലൂടെ, മഴ ഭൂമിയിൽ മുഴുവൻ വ്യാപിച്ചു എന്നതിലേക്ക് സൂചന നൽകുന്നു.
തുടർന്ന്, അനസ് رضي الله عنه സത്യം ചെയ്തു പറയുന്നു: തുടർച്ചയായ മേഘങ്ങളുടെയും മഴയുടെയും കാരണം കൊണ്ട് അവർ ആറു ദിവസത്തേക്ക് സൂര്യനെ കണ്ടില്ല. അടുത്ത വെള്ളിയാഴ്ച, (അത് അതേ ആളായിരിക്കാം അല്ലെങ്കിൽ മറ്റൊരാളായിരിക്കാം) ആദ്യം ചോദിച്ച ആൾ പ്രവേശിച്ച അതേ വാതിലിലൂടെ മറ്റൊരാൾ പ്രവേശിച്ചു. റസൂൽ صلى الله عليه وسلم ഖുത്ബ നടത്തുകയായിരുന്നു. അയാൾ എഴുന്നേറ്റുനിന്ന് നബി صلى الله عليه وسلم യെ അഭിമുഖീകരിച്ചുകൊണ്ട് പറഞ്ഞു: "അല്ലാഹുവിൻ്റെ ദൂതരേ, കന്നുകാലികൾ (സമ്പത്ത്) നശിച്ചു; കാരണം വെള്ളം അധികരിച്ചതിനാൽ മേച്ചിൽസ്ഥലം ഇല്ലാതായി, അതിനാൽ കന്നുകാലികൾ മേയാൻ സ്ഥലമില്ലാതെ നശിച്ചു. വഴികൾ മുറിഞ്ഞുപോയി; കനത്ത മഴ കാരണം അതിലൂടെ സഞ്ചരിക്കാൻ കഴിയുന്നില്ല. അതിനാൽ ഈ മഴ ഞങ്ങളിൽ നിന്ന് പിടിച്ചുനിർത്താൻ അല്ലാഹുവിനോട് പ്രാർത്ഥിക്കൂ."
അപ്പോൾ നബി صلى الله عليه وسلم കൈകൾ ഉയർത്തിക്കൊണ്ട് പറഞ്ഞു: "അല്ലാഹുവേ, ഞങ്ങളുടെ ചുറ്റുപാടുകളിൽ മഴ വർഷിക്കേണമേ, ഞങ്ങളുടെ മേൽ (ദുരിതമായി) വർഷിക്കരുതേ." അതായത്, വീടുകളുള്ള സ്ഥലങ്ങളില് നിന്നും ഞങ്ങൾക്ക് ഉപദ്രവകരമായ സ്ഥലങ്ങളിൽ നിന്നും മഴയെ തിരിച്ചുവിടുകയും, ഞങ്ങൾ ഉപദ്രവിക്കപ്പെടാത്ത സ്ഥലങ്ങളിൽ മഴ നൽകുകയും ചെയ്യേണമേ. "അല്ലാഹുവേ, കുന്നുകളിലും, ഉയർന്ന പ്രദേശങ്ങളിലും, ഉയർന്ന സ്ഥലങ്ങളിലും, പർവതങ്ങളിലും അല്ലെങ്കിൽ ചെറിയ കുന്നുകളിലും, താഴ്വരകളിലും, മരങ്ങൾ വളരുന്ന സ്ഥലങ്ങളിലും (വർഷിക്കേണമേ)." അതായത്, കന്നുകാലികൾക്ക് മേയാനുള്ള പുല്ലും മരങ്ങളും വളരുന്ന സ്ഥലങ്ങളിൽ മഴ നൽകുക.
അനസ് رضي الله عنه പറയുന്നു: അപ്പോൾ മഴ നിന്നു, അവർ പള്ളിയിൽ നിന്ന് പുറത്തിറങ്ങി സൂര്യപ്രകാശത്തിലൂടെ നടന്നു. ഇത് നബി صلى الله عليه وسلم ക്ക് അല്ലാഹു നൽകിയ മഹത്തായ അനുഗ്രഹത്തെയും അവിടുത്തെ മഹത്വത്തെയും സൂചിപ്പിക്കുന്നു.
ഹദീസില് നിന്നുള്ള പാഠങ്ങള്
ഉപജീവനം തേടിക്കൊണ്ടുള്ള ദുആ, അവ തേടി ഭൂമിയിൽ സഞ്ചരിക്കൽ തുടങ്ങിയ കാരണങ്ങൾ ചെയ്യൽ, അല്ലാഹുവിലുള്ള ഭരമേൽപ്പിക്കലിന് (തവക്കുൽ) എതിരല്ല.
മഴ ലഭിക്കാൻ വേണ്ടിയുള്ള പ്രാര്ത്ഥന പതിവാക്കല്.
മഴ ദോഷകരമാകുമ്പോൾ മഴ നിർത്തിവെക്കാൻ ആവശ്യപ്പെടുന്നത് അനുവദനീയമാണ്. കുന്നുകൾ, ഉയർന്ന പ്രദേശങ്ങൾ, താഴ്വരകളുടെ അടിഭാഗങ്ങൾ എന്നിവിടങ്ങളിൽ മാത്രം മഴ നിലനിർത്താൻ പ്രത്യേകം ആവശ്യപ്പെടുന്നത് കൃഷിക്കും മേച്ചിലിനും കൂടുതൽ അനുയോജ്യമായതിനാലാണ്.
ജീവിച്ചിരിക്കുന്നതും ഹാജരുള്ളതുമായ, സദ്വൃത്തരും ഭക്തരുമാണ് എന്ന് കരുതപ്പെടുന്നവരോട് ദുആ ചെയ്യാൻ ആവശ്യപ്പെടുന്നത് അനുവദനീയമാണ്. ഇതാണ് അനുവദനീയമായ തവസ്സുൽ (ഇടതേടൽ). എന്നാൽ, ജീവിച്ചിരിക്കുന്നവരോ മരിച്ചവരോ ആയ ഏതെങ്കിലും സൃഷ്ടിയുടെ പദവി മുൻനിർത്തി തവസ്സുൽ ചെയ്യുന്നത് അനുവദനീയമല്ല. കാരണം അത് ശിർക്കിലേക്കുള്ള വഴികളിൽപ്പെട്ടതാണ്.
ദുആയിൽ ഇൽഹാഹ് (നിർബന്ധിച്ച് ചോദിക്കൽ) സുന്നത്താണ്.
ആവശ്യത്തിന് വേണ്ടി വെള്ളിയാഴ്ച ഖത്വീബുമായി സംസാരിക്കുന്നത് അനുവദനീയമാണ്.
മഴ വർഷിക്കുന്നതിലും അത് പിടിച്ചുനിർത്തുന്നതിലും അല്ലാഹുവിൻ്റെ അത്ഭുതകരമായ കഴിവ് വെളിപ്പെടുന്നു.
ദോഷകരമായതിൽ നിന്ന് മഴ പിടിച്ചുനിർത്താനും, ദോഷകരമല്ലാത്തതിൽ നിലനിർത്താനും വേണ്ടി നബി صلى الله عليه وسلم ദുആ ചെയ്തതിലെ യുക്തി.
ആവശ്യമുള്ളപ്പോള് ഖുത്ബയിൽ മഴയ്ക്ക് വേണ്ടി പ്രാർത്ഥിക്കൽ (ഇസ്തിസ്ഖാഅ്) സുന്നത്താണ്.
മഴക്ക് വേണ്ടി പ്രാർത്ഥിക്കുമ്പോൾ കൈകൾ ഉയർത്തുന്നതില് പണ്ഡിതന്മാർ ഏകാഭിപ്രായക്കാരാണ്.
നബി صلى الله عليه وسلم യുടെ ദൃഷ്ടാന്തങ്ങളിൽപ്പെട്ടതും അവരുടെ പ്രവാചകത്വത്തെ സൂചിപ്പിക്കുന്നതുമായ കറാമത്തുകളിൽപ്പെട്ടതാണ്: മഴ വരുത്തുന്നതിലും അത് നീക്കുന്നതിലും അവിടുത്തെ ദുആക്ക് തൽക്ഷണം ഉത്തരം ലഭിച്ചു എന്നത്.
No comments:
Post a Comment