425 ദുറൂസുല്‍ ഹദീസ് - ഉംദതുല്‍ അഹ്കാം- ഹദീസ് 165- دروس الحديث - കഫ്ന്‍ പുടവ

عمدة الأحكام من كلام خير الأنام صلى الله عليه وسلم
المؤلف: عبد الغني بن عبد الواحد بن علي بن سرور المقدسي الجماعيلي الدمشقي الحنبلي، 

أبو محمد، تقي الدين (المتوفى: 600هـ)  

കഫ്ന്‍ പുടവ 

165 - عَنْ عَائِشَةَ رضي الله عنها: (أَنَّ رَسُولَ اللَّهِ صلى الله عليه وسلم كُفِّنَ فِي أَثْوَابٍ بِيضٍ يَمَانِيَةٍ، لَيْسَ فِيهَا قَمِيصٌ وَلا عِمَامَةٌ) . 

ആഇശ رضي الله عنها നിവേദനം ചെയ്യുന്നു: "നിശ്ചയം റസൂലുള്ളാഹി صلى الله عليه وسلم യെ യമനിൽ നിർമ്മിച്ച (യമാനിയ) വെള്ള നിറത്തിലുള്ള മൂന്ന് വസ്ത്രങ്ങളിലാണ് കഫ്ന്‍ ചെയ്യപ്പെട്ടത്. അതിൽ  കുപ്പായമോ തലപ്പാവോ ഉണ്ടായിരുന്നില്ല."

أَثواب يمانية: نسجت في اليمن، فنسبت إِليهِ.

(أثواب يمانية): യമനിൽ നെയ്യപ്പെട്ട വസ്ത്രങ്ങൾ. അത് നിർമ്മിച്ച സ്ഥലത്തേക്ക് ചേർത്താണ് അങ്ങനെ വിളിക്കുന്നത്.

വിവരണം

    മയ്യിത്തിനെ അന്തസ്സായി കുളിപ്പിക്കുന്നതും ഉത്തമമായ രീതിയിൽ കഫ്ന്‍ ചെയ്യുന്നതും ഉൾപ്പെടെ മരണാനന്തര കർമ്മങ്ങൾ ഭംഗിയായി നിർവ്വഹിക്കുന്നത് ഇസ്‌ലാമിക ചിഹ്നങ്ങളിൽ പെട്ട ഉത്തമമായ കാര്യമാണ്.

    ഈ ഹദീസിൽ ആയിഷ رضي الله عنها നബി صلى الله عليه وسلم യെ കഫ്ന്‍ ചെയ്ത രീതിയെക്കുറിച്ച് വിവരിക്കുന്നു. യമനിൽ നിർമ്മിച്ച, പരുത്തി കൊണ്ടുണ്ടാക്കിയ വെള്ള നിറത്തിലുള്ള മൂന്ന് കഫ്ന്‍ പുടവകളിലാണ് അവിടുത്തെ കഫ്ന്‍ ചെയ്തത്. ശരീരത്തിന്‍റെ ആകൃതിയിലുള്ള കുപ്പായമോ,  തലപ്പാവോ അതിൽ ഉണ്ടായിരുന്നില്ല. നബി صلى الله عليه وسلم യെ രണ്ട് വസ്ത്രങ്ങളിലും ഒരു 'ബുർദിലും' (യമനിൽ നിർമ്മിക്കുന്ന വരകളുള്ള പുതപ്പ്) ആണ് കഫൻ ചെയ്തതെന്ന് ജനങ്ങൾക്കിടയിൽ സംസാരമുണ്ടായപ്പോൾ ആയിഷ رضي الله عنها അത് തിരുത്തി. അത്തരമൊരു പുതപ്പ് കൊണ്ടുവരപ്പെട്ടിരുന്നു എങ്കിലും അത് ഒഴിവാക്കുകയാണ് ചെയ്തതെന്നും അതിൽ അവിടുത്തെ കഫൻ ചെയ്തിട്ടില്ലെന്നും അവർ വ്യക്തമാക്കി.

    നബി صلى الله عليه وسلم ആയിഷ رضي الله عنها യുടെ വീട്ടിൽ വെച്ചാണ് വഫാത്തായത് എന്നതുകൊണ്ട് തന്നെ, അവിടുത്തെ കഫ്ന്‍ ചെയ്ത രീതിക്ക് ഏറ്റവും വിശ്വസനീയമായ സാക്ഷി അവരാണ്. മൂന്ന് വെള്ള ശീലകളിൽ അവിടുത്തെ ശരീരം പൊതിയുകയായിരുന്നു.     ജീവിച്ചിരിക്കുന്നവരേക്കാൾ കൂടുതൽ നഗ്നത മറയ്ക്കപ്പെടേണ്ടതും ശ്രദ്ധിക്കപ്പെടേണ്ടതും മയ്യിത്തായതുകൊണ്ടാണ് വസ്ത്രങ്ങളുടെ എണ്ണം മൂന്നായി നിശ്ചയിച്ചത്.

ഹദീസില്‍ നിന്നുള്ള പാഠങ്ങള്‍

1- മയ്യിത്തിന് ഏറ്റവും അനുയോജ്യം വെള്ള വസ്ത്രമാണ്.

2- മയ്യിത്തിനെ പൊതിയാന്‍ പുരുഷന്മാർക്ക് മൂന്ന് വസ്ത്രങ്ങൾ (ശീലകൾ) ഉപയോഗിക്കൽ സുന്നത്താണ്.

3- കുപ്പായം, തലപ്പാവ് തുടങ്ങിയവ ഒഴിവാക്കി ലളിതമായ ശീലകൾ ഉപയോഗിക്കുന്നതാണ് നബിചര്യ.

4- നബി صلى الله عليه وسلم യെ കഫ്ന്‍ ചെയ്യാൻ പരുത്തിയിൽ നിർമ്മിച്ച ഗുണമേന്മയുള്ള യമനി വസ്ത്രങ്ങളാണ് തിരഞ്ഞെടുത്തത്.

5- നബി صلى الله عليه وسلم യെ മൂന്ന് വസ്ത്രങ്ങളിലാണ് കഫ്ന്‍ ചെയ്തത്; അവയോടൊപ്പം കുപ്പായമോ (ഖമീസ്) തലപ്പാവോ (ഇമാമത്ത്) ഉണ്ടായിരുന്നില്ല.

6- മയ്യിത്ത് കഫ്ന്‍ ചെയ്യാൻ വെള്ള നിറത്തിലുള്ളതും വൃത്തിയുള്ളതുമായ വസ്ത്രം ഉപയോഗിക്കുന്നത് പുണ്യകരമാണ് (മുസ്തഹബ്ബ്).

7- നബി صلى الله عليه وسلم യെ കഫ്ന്‍ ചെയ്യാന്‍  സ്വഹാബികൾ സ്വീകരിച്ച ഈ രീതിയാണ് ഏറ്റവും പരിപൂർണ്ണമായ രൂപം. അല്ലാഹു തന്‍റെ പ്രവാചകന് വേണ്ടി ഏറ്റവും ഉത്തമമായത് തിരഞ്ഞെടുക്കാൻ സ്വഹാബികൾക്ക് ഹിദായത്ത് നൽകുകയും, അവിടുത്തെ സുന്നത്തിലൂടെ അവർ അത് മനസ്സിലാക്കുകയും ചെയ്തു.

8- മനുഷ്യവർഗ്ഗത്തിന് അല്ലാഹു നൽകിയിട്ടുള്ള വലിയൊരു ആദരവാണിത്; മരിച്ച ശേഷവും അവന്‍റെ നഗ്നത മറയ്ക്കാനും അവനെ അന്തസ്സോടെ യാത്രയാക്കാനും മതം കൽപ്പിക്കുന്നു.

9- കഫ്ന്‍ വസ്ത്രത്തിന്‍റെ ഗുണമേന്മയിലോ, എണ്ണത്തിലോ, വിലയിലോ അനാവശ്യമായ ധൂർത്ത് (ഇസ്‌റാഫ്) പാടില്ല.