നാല് കാര്യങ്ങളില്
വിശ്വസിക്കല് നിര്ബന്ധമാണ്
عَنْ عَلِيٍّ، قَالَ: قَالَ رَسُولُ اللَّهِ صَلَّى اللهُ عَلَيْهِ وَسَلَّمَ: " لَا يُؤْمِنُ عَبْدٌ حَتَّى يُؤْمِنَ بِأَرْبَعٍ: بِاللَّهِ وَحْدَهُ لَا شَرِيكَ لَهُ، وَأَنِّي رَسُولُ اللَّهِ، وَبِالْبَعْثِ بَعْدَ الْمَوْتِ، وَالْقَدَرِ ". رواه ابن ماجه- صحيح
അലി رضي اللهُ عنه നിവേദനം. റസൂല് صَلَّى اللهُ عَلَيْهِ وَسَلَّمَ പറഞ്ഞു: നാലു കാര്യങ്ങളില് വിശ്വസിക്കുന്നത് വരെ ഒരു അടിമയും യഥാര്ത്ഥ വിശ്വാസിയാവുകയില്ല. അല്ലാഹു ഏകനാണെന്നും അവന് പങ്കുകാരില്ലെന്നും, ഞാന് അല്ലാഹുവിന്റെ റസൂല് ആണെന്നും, മരണത്തിന് ശേഷമുള്ള ഉയിര്ത്തെഴുന്നേല്പ്പിലും, ക്വദറിലും (വിധിയിലും) വിശ്വസിക്കലാണത്.
വിവരണം
ഇസ്ലാമിക വിശ്വാസ കാര്യങ്ങളിലെ ഏറ്റവും പ്രധാനപ്പെട്ട നാലു കാര്യങ്ങളാണ് ഈ ഹദീസില് അറിയിക്കപ്പെട്ടിരിക്കുന്നത്.
ഈ നാല് കാര്യങ്ങളിലും കൃത്യമായി വിശ്വസിക്കുന്നത് വരെ ഒരാളും യഥാര്ത്ഥ വിശ്വാസിയാവുകയില്ല. അവയിലെ ഓരോന്നും സംക്ഷിപ്തമായി നമുക്ക് മനസ്സിലാക്കാം.
അല്ലാഹുവില് വിശ്വസിക്കല്
അല്ലാഹുവിലുള്ള വിശ്വാസത്തെ സംബന്ധിച്ച് പഠിക്കുമ്പോള് നാല് കാര്യങ്ങള് നാം അറിഞ്ഞിരിക്കണം.
1- അല്ലാഹുവിന്റെ ഉണ്മയില് (വുജൂദില്) ഉള്ള വിശ്വാസം.
ബുദ്ധിയും ശുദ്ധപ്രകൃതിയും പ്രപഞ്ചത്തിലെ ഓരോ കാര്യങ്ങളും അല്ലാഹുവിന്റെ ഉണ്മയില് സൂചന നല്കുന്നുണ്ട്. ഈ പ്രപഞ്ചത്തിലെ ഓരോ കാര്യങ്ങള്ക്ക് പിന്നിലും അവന്റെ ശക്തി പ്രവര്ത്തിച്ച് കൊണ്ടിരിക്കുന്നു. പ്രപഞ്ചത്തിലെ ചരാചരങ്ങള് വെറുതെ ഉണ്ടായതല്ലെന്ന് അല്ലാഹു അറിയിക്കുന്നു: (അതല്ല, യാതൊരു വസ്തുവില് നിന്നുമല്ലാതെ അവര് സൃഷ്ടിക്കപ്പെട്ടിരിക്കുകയാണോ? അതല്ല, അവര് തന്നെയാണോ സ്രഷ്ടാക്കള്?. (സൂറത്തുത്വൂര്: 35)
2- അല്ലാഹുവിന്റെ റുബൂബിയ്യത്തിലുള്ള വിശ്വാസം.
എല്ലാ വസ്തുക്കളേയും സൃഷ്ടിച്ച് പരിപാലിക്കുന്നവന് അല്ലാഹു മാത്രമാണെന്ന് വിശ്വസിക്കല് നിര്ബന്ധമാണ്. എല്ലാ കര്യങ്ങളേയും നിയന്ത്രിക്കുന്നതും, ഭക്ഷണവിഭവങ്ങള് നല്കുന്നതും ജീവിപ്പിക്കുന്നതും മരിപ്പിക്കുന്നതും മഴ പെയ്യിക്കുന്നതും തുടങ്ങി എല്ലാ കാര്യങ്ങളും അല്ലാഹുവാണ് നടപ്പിലാക്കുന്നത്. ഈ കാര്യങ്ങള് പരിപൂര്ണ്ണമായി വിശ്വസിക്കല് നമുക്ക് ബാധ്യതയാണ്.
3- അല്ലാഹുവിന്റെ ആരാധ്യതയിലുള്ള (ഉലൂഹിയ്യത്ത്) വിശ്വാസം.
ആരാധനകള്ക്ക് അര്ഹന് അല്ലാഹു മാത്രമാണ് എന്ന വിശ്വാസമാണത്. ആരാധനകള് അല്ലാഹുവിനല്ലാതെ മറ്റാര്ക്കും ചെയ്യാന് പാടില്ല. അങ്ങനെ ചെയ്യുന്നവന് അല്ലാഹുവില് പങ്കു ചേര്ക്കുന്നവനായിത്തീരും. ഇതാണ് ശഹാദത്ത് കലിമയുടെ ഉള്ളടക്കം.
4- അല്ലാഹുവിന്റെ നാമങ്ങളിലും വിശേഷണങ്ങളിലുമുള്ള വിശ്വാസം.
ഏറ്റവും ഉന്നതമായ നാമങ്ങളുടേയും വിശേഷണങ്ങളുടേയും ഉടമ അല്ലാഹു മാത്രമാണ് എന്ന വിശ്വാസമാണത്. അല്ലാഹുവും അവന്റെ റസൂലും അല്ലാഹുവിന് സ്ഥിരപ്പെടുത്തിയ ഉന്നതമായ നാമങ്ങളും വിശേഷണങ്ങളും നാം അംഗീകരിക്കുകയും സ്ഥിരപ്പെടുത്തുകയും വേണം. അവ അല്ലാഹുവിന്റെ മഹത്വത്തിന് യോജിച്ച വിധമായിരിക്കണം നാം സ്ഥിരപ്പെടുത്തേണ്ടത്. അതിനെ ദുര്വ്യാഖ്യാനിക്കാനോ, നിഷേധിക്കാനോ, രൂപം നല്കാനോ നമുക്ക് പറ്റില്ല. അവ എങ്ങനെയാണോ തെളിവുകളില് വന്നത് അത് പോലെ തന്നെ നാം വിശ്വസിക്കണം.
റസൂല് صَلَّى اللهُ عَلَيْهِ وَسَلَّمَ യില് വിശ്വസിക്കല്
നബി صَلَّى اللهُ عَلَيْهِ وَسَلَّمَ യില് പരിപൂര്ണ്ണമായി വിശ്വസിക്കാന് നമുക്ക് കഴിയണം. ഈ വിശ്വാസം പരിപൂര്ണ്ണമാകാന് നാം നാല് കാര്യങ്ങള് ശ്രദ്ധിക്കുകയും നടപ്പിലാക്കുകയും വേണം.
1- റസൂല് صَلَّى اللهُ عَلَيْهِ وَسَلَّمَ അറിയിച്ച എല്ലാ കാര്യങ്ങളേയും നാം സത്യപ്പെടുത്തുകയും അംഗീകരിക്കുകയും വേണം
2- റസൂല് صَلَّى اللهُ عَلَيْهِ وَسَلَّمَ കല്പിച്ച എല്ലാ കാര്യങ്ങളും നാം അനുസരിക്കണം
3- റസൂല് صَلَّى اللهُ عَلَيْهِ وَسَلَّمَ വിരോധിക്കുകയും ജാഗ്രത കൈക്കൊള്ളണമെന്ന് അറിയിക്കുകയും ചെയ്ത കാര്യങ്ങളില് നിന്ന് നാം അകന്ന് നില്ക്കണം
4- റസൂല് صَلَّى اللهُ عَلَيْهِ وَسَلَّمَ അല്ലാഹുവിനെ ആരാധിച്ചത് എങ്ങനെയാണോ അത് പോലെ മാത്രം നമ്മളും അല്ലാഹുവിനെ ആരാധിക്കണം
ഈ നാല് കാര്യങ്ങള് പരിപൂര്ണ്ണമായെങ്കിലേ റസൂല് صَلَّى اللهُ عَلَيْهِ وَسَلَّمَ യിലുള്ള നമ്മുടെ വിശ്വാസം പരിപൂര്ണ്ണമാവുകയുള്ളൂ.
മരണ ശേഷമുള്ള ജീവിതത്തില് വിശ്വസിക്കല്
നമുക്കെല്ലാം മരണമുണ്ട്. മരണ ശേഷം നമുക്ക് മറ്റൊരു ജീവിതവുമുണ്ട്. വിചാരണക്കായി എല്ലാവരേയും അല്ലാഹു ഉയിര്ത്തെഴുന്നേല്പ്പിക്കും എന്ന് അല്ലാഹുവും റസൂല് صَلَّى اللهُ عَلَيْهِ وَسَلَّمَഴ യും അറിയിച്ചിട്ടുണ്ട്. അല്ലാഹു പറയുന്നു:
(തങ്ങള് ഉയിര്ത്തെഴുന്നേല്പിക്കപ്പെടുകയില്ലെന്ന് ആ അവിശ്വാസികള് ജല്പിച്ചു.(നബിയേ,) പറയുക: അതെ; എന്റെ രക്ഷിതാവിനെ തന്നെയാണ, നിങ്ങള് ഉയിര്ത്തെഴുന്നേല്പിക്കപ്പെടും. പിന്നീട് നിങ്ങള് പ്രവര്ത്തിച്ചതിനെപ്പറ്റി നിങ്ങള്ക്ക് വിവരമറിയിക്കപ്പെടുകയും ചെയ്യും. അത് അല്ലാഹുവെ സംബന്ധിച്ചിടത്തോളം എളുപ്പമുള്ളതാകുന്നു). (സൂറത്തുതഗാബുന്:7)
ക്വദറില് വിശ്വസിക്കല്
ഈ പ്രപഞ്ചത്തിലെ എല്ലാ കാര്യങ്ങളും അല്ലാഹുവിന്റെ നിര്ണ്ണയമനുസരിച്ചാണ് നടക്കുന്നത്. എല്ലാ കാര്യങ്ങളേയും കുറിച്ചുള്ള അല്ലാഹുവിന്റെ മുന്കടന്ന ജ്ഞാനവും ഹിക്മത്തും (യുക്തിയും) അനുസരിച്ചാണ് ആ നിര്ണ്ണയങ്ങള് അല്ലാഹു നിശ്ചയിച്ചിട്ടുള്ളത്.
ക്വദറിന്റെ നാല് ഘട്ടങ്ങള് (مراتب القدَر) നാം അറിഞ്ഞിരിക്കണം. അവ:
1- എല്ലാ കാര്യങ്ങളെ കുറിച്ചും അവ ഉണ്ടാകുന്നതിന് മുമ്പേ ഉള്ള അല്ലാഹുവിന്റെ അറിവ്. (العلم)
2- ആ കാര്യങ്ങള് അല്ലാഹു രേഖപ്പെടുത്തി വച്ചിരിക്കുന്നു. (الكتابة)
3- അല്ലാഹുവിന്റെ ഉദ്ദേശ്യങ്ങള്ക്കനുസരിച്ചേ പ്രപഞ്ചത്തില് ഏതൊരു കാര്യവും നടക്കൂ. (المشيئة)
4- അല്ലാഹു രേഖപ്പെടുത്തിയ കാര്യങ്ങള് അവന് ഉദ്ദേശിക്കുമ്പോള് പ്രപഞ്ചത്തില് സൃഷ്ടിക്കുകയും, നടപ്പിലാക്കുകയും ചെയ്യുന്നു. (الخلق)
No comments:
Post a Comment