ദുറൂസുല്‍ ഹദീസ് - ഭാഗം 243 دروس الحديث - ഇസ്‌ലാമില്‍ ഉപദ്രവങ്ങളും ഉപദ്രവിക്കലും പാടില്ല

 

الأربعون النووية-حديث: 32

ഇസ്‌ലാമില്‍ ഉപദ്രവങ്ങളും ഉപദ്രവിക്കലും പാടില്ല

عَنْ أَبِي سَعِيدٍ سَعْدِ بْنِ مَالِكِ بْنِ سِنَانٍ الْخُدْرِيّ رضي الله عنه أَنَّ رَسُولَ اللَّهِ صلى الله عليه وسلم  قَالَ: " لَا ضَرَرَ وَلَا ضِرَارَ" .

حَدِيثٌ حَسَنٌ، رَوَاهُ ابْنُ مَاجَهْ [راجع رقم:2341]، وَالدَّارَقُطْنِيّ [رقم:4/228]، وَغَيْرُهُمَا مُسْنَدًا. وَرَوَاهُ مَالِكٌ [2/746] فِي "الْمُوَطَّإِ" عَنْ عَمْرِو بْنِ يَحْيَى عَنْ أَبِيهِ عَنْ النَّبِيِّ صلى الله عليه وسلم مُرْسَلًا، فَأَسْقَطَ أَبَا سَعِيدٍ، وَلَهُ طُرُقٌ يُقَوِّي بَعْضُهَا بَعْضًا. 

അബൂ സഈദ് സഅ'ദു ബ്നു മാലികു ബ്നു സിനാന്‍ അല്‍ ഖുദ്'രി رضي الله عنه നിവേദനം, റസൂല്‍ صلى الله عليه وسلم പറഞ്ഞു: (ഇസ്‌ലാമില്‍) ഉപദ്രവവും ഉപദ്രവിക്കലും ഇല്ല.

വിവരണം

 വളരെ പ്രധാനപ്പെട്ട ഒരു ഹദീസ് ആണിത്. 

രണ്ട് കാര്യങ്ങളാണ് ഇതില്‍ വിരോധിക്കുന്നത്. 

ഒന്ന്: മറ്റുള്ളവര്‍ക്ക് ഉപദ്രവമുണ്ടാക്കല്‍

രണ്ട്: ഉപദ്രവമുണ്ടായാല്‍ പ്രതികാരമായി ഉപദ്രവിക്കാതിരിക്കല്‍.

എല്ലാ തരം ഉപദ്രവങ്ങളെയും ദ്രോഹങ്ങളെയും ഈ ഹദീസ് നിഷേധിക്കുന്നു. ആരും ആര്‍ക്കും ഒരു ദ്രോഹവും ഉണ്ടാക്കരുത് എന്നാണ് ഹദീസ് അറിയിക്കുന്നത്. 

ഉപദ്രവമുണ്ടാക്കലില്‍ രണ്ട് കാര്യങ്ങള്‍ അടങ്ങിയിരിക്കുന്നു. 

ഒന്ന്: നന്‍മ നഷ്ടപ്പെടുത്തല്‍ 

രണ്ട്: ദ്രോഹം ഉണ്ടാക്കല്‍

ഈ രണ്ടും മറ്റുള്ളവര്‍ക്ക് ദ്രോഹമുണ്ടാക്കുന്നവയാണ്. 

ഇടപാടുകളിലെ വഞ്ചനയും, കച്ചവടത്തില്‍ സാധനങ്ങളുടെ ന്യൂനതകള്‍ മറച്ച് വെക്കലും പോലെയുള്ള കച്ചവട-ഇടപാടുകളിലെ മോശം സമീപനങ്ങളെല്ലാം ഉപദ്രവങ്ങളില്‍ ഉള്‍പ്പെടും.

ഒരാള്‍ തന്‍റെ സ്വന്തത്തിനും മറ്റുള്ളവര്‍ക്ക് മേലെയും ഉപദ്രവങ്ങള്‍ ഉണ്ടാക്കാന്‍ പാടില്ല. അരുതായ്മകളിലും, നിഷിദ്ധങ്ങളിലും ഒരാള്‍ ഇടപെടുന്നത് സ്വന്തത്തിന് ദ്രോഹമുണ്ടാക്കലാണ്. അത് മുഖേന മറ്റുള്ളവര്‍ക്കും ദ്രോഹമുണ്ടാകുന്ന അവസ്ഥയുണ്ടാകും. 

ഉപദ്രവങ്ങളുണ്ടാക്കല്‍ വിവിധ തരത്തിലാണ്, സമ്പത്തിലും, അഭിമാനത്തിലും, വ്യക്തികളിലുമെല്ലാം ഇതുണ്ടാകും. 

ഇസ്‌ലാം ഉപദ്രവങ്ങള്‍ ഉണ്ടാകുന്നതിനെ വെറുക്കുന്നു. അഥവാ ഉപദ്രവങ്ങളും ദ്രോഹങ്ങളും ഉണ്ടായാല്‍ ഉടന്‍ തന്നെ അത് ഇല്ലാതിരിക്കാനുള്ള വഴികള്‍ തേടാന്‍ ഇസ്‌ലാം നിര്‍ദേശിക്കുന്നു. 

ഒരാള്‍ മറ്റൊരാള്‍ക്ക് ഉപദ്രവമുണ്ടാക്കിയാല്‍ അയാള്‍ ഉപദ്രവമുണ്ടാക്കിയവന് വിട്ടുവീഴ്ച ചെയ്യണം എന്നാണ് ഇസ്‌ലാമിന്‍റെ നിര്‍ദേശം. 

ഇസ്‌ലാമിന്‍റെ കല്‍പനാ നിര്‍ദേശങ്ങളില്‍ ഒരു നിലക്കുമുള്ള ദ്രോഹങ്ങള്‍ ഇല്ല. എല്ലാ കാര്യങ്ങളും ഇസ്‌ലാമിന്‍റെ ആളുകള്‍ക്ക് ചെയ്യാന്‍ എളുപ്പമുള്ളവയാണ്. എന്നാല്‍ മതത്തില്‍ പുതുതായി കൂട്ടിച്ചേര്‍ക്കുന്ന ആചാരങ്ങളില്‍ കൂടുതലും മനുഷ്യന് ദ്രോഹമുള്ളവയാണ് എന്ന് കാണാന്‍ കഴിയും. അത്തരത്തില്‍ സ്വശരീരങ്ങളെ ബുദ്ധിമുട്ടിക്കുന്നവര്‍ ചെയ്യുന്നത് റസൂല്‍ صلى الله عليه وسلم യുടെ ഈ പ്രസ്താവനക്ക് വിരുദ്ധമായാണ്. 

മതം എന്നത് എളുപ്പമാണ്. ഒരാളോടും അവന് സാധിക്കാത്തത് ഇസ്‌ലാം കല്‍പിച്ചിട്ടില്ല. മതത്തില്‍ അതിരുവിടല്‍ പ്രതിഫലങ്ങള്‍ നഷ്ടപ്പെടാനും ശിക്ഷക്ക് അര്‍ഹാരാകാനും അവസരമൊരുക്കും.

വഴിയില്‍ നിന്ന് ഉപദ്രവങ്ങളെ നീക്കം ചെയ്യുന്നത് വരെ ഇസ്‌ലാം വലിയ കാര്യമായി കണ്ടിട്ടുണ്ട്. അതിനെ ഈമാനിന്‍റെ ശാഖകളില്‍ പെട്ട ഒരു ശാഖയായിട്ടാണ് ഇസ്‌ലാം പരിചയപ്പെടുത്തിയത്. അത്തരത്തിലെ ഉപദ്രവങ്ങള്‍ പോലും പാടില്ലെന്നാണ് ഇസ്‌ലാം നിര്‍ദേശിക്കുന്നത്. 

വിശുദ്ധ ക്വുര്‍ആനില്‍ വിവിധ സ്ഥലങ്ങളില്‍ വിവിധ ഉപദ്രവങ്ങളെ വിമര്‍ശിക്കുന്നതും എതിര്‍ക്കുന്നതുമായ നിരവധി ആയത്തുകള്‍ നമുക്ക് കാണാന്‍ സാധിക്കും. 

അവയില്‍ ചിലത് താഴെ കൊടുക്കുന്നു:

·     ﴿ وَلَا تُضَارُّوهُنَّ لِتُضَيِّقُوا عَلَيْهِنَّ ﴾ [الطلاق: 6]

·     ﴿ لَا تُضَارَّ وَالِدَةٌ بِوَلَدِهَا وَلَا مَوْلُودٌ لَهُ بِوَلَدِهِ ﴾ [البقرة: 233]

·     ﴿ مِنْ بَعْدِ وَصِيَّةٍ يُوصَى بِهَا أَوْ دَيْنٍ غَيْرَ مُضَارٍّ ﴾ [النساء: 12]

·     ﴿ وَلَا يُضَارَّ كَاتِبٌ وَلَا شَهِيدٌ وَإِنْ تَفْعَلُوا فَإِنَّهُ فُسُوقٌ بِكُمْ ﴾ [البقرة: 282]

·     ﴿ وَالَّذِينَ اتَّخَذُوا مَسْجِدًا ضِرَارًا وَكُفْرًا وَتَفْرِيقًا بَيْنَ الْمُؤْمِنِينَ وَإِرْصَادًا لِمَنْ حَارَبَ اللَّهَ وَرَسُولَهُ مِنْ قَبْلُ ﴾ التوبة: 10

പരസ്പരം ദ്രോഹമുണ്ടാകരുതെന്നും അഥവാ ഉണ്ടായാല്‍ തന്നെ ഉടന്‍ പരിഹരിക്കണമെന്നും പരസ്പരം വിട്ടുവീഴ്ച ചെയ്യണം എന്നുമാണ് ഇസ്‌ലാം പഠിപ്പിച്ചത്. അതിലൂടെ ഉപദ്രവങ്ങളുടെ വ്യാപനം തടയാന്‍ സാധിക്കും എന്നും സമാധാനവും നല്ല അവസ്ഥകളുമാണ് വേണ്ടതെന്നും ഇസ്‌ലാം അറിയിക്കുന്നു.