മാസം കാണല്‍ നിര്‍ബന്ധം

നോമ്പും പെരുന്നാളും ഹജ്ജും നിര്‍ണ്ണയിക്കാന്‍ മാസം കാണല്‍ നിര്‍ബന്ധം

ഇസ്‌ലാമില്‍ മാസപ്പിറവി അനിവാര്യമാണ്, കാരണം ആരാധനകൾ, ആഘോഷങ്ങള്‍ തുടങ്ങിയവ ചന്ദ്രമാസം അടിസ്ഥാനമാക്കിയാണ് നിശ്ചയിക്കുന്നത്. അതുമായി ബന്ധപ്പെട്ട് ഇടക്കിടക്ക് വിവാദങ്ങള്‍ ഉണ്ടാകുന്നു. അതില്‍ നാം അറിഞ്ഞിരിക്കേണ്ട ചില കാര്യങ്ങള്‍ താഴെ കൊടുക്കുന്നു. 

1 - മാസം കണ്ടിട്ടാണ് നോമ്പും പെരുന്നാളും ഉറപ്പിക്കേണ്ടത് എന്നത് മതകൽപനയാണ്. അത് പ്രമാണമാണ്. അത് പിന്തുടരല്‍ നമുക്ക് നിര്‍ബന്ധമാണ്.

2- മാസപ്പിറവി ദൃശ്യമാകാൻ സംവിധാനങ്ങളൊരുക്കുന്ന വിശ്വാസയോഗ്യരുടെ അറിയിപ്പ് പരിഗണിക്കപ്പെടണമെന്നാണ് മതത്തിൻ്റെ നിർദ്ദേശം.

3- നാടുകളിൽ എല്ലായിടത്തും ഒരൊറ്റ സമയത്തല്ല ചന്ദ്രനുദിക്കുന്നത്. അതിൽ വ്യത്യാസമുണ്ട്.

4_ അതനുസരിച്ച് ഒരു പ്രദേശത്തിൻ്റെ ഉദയസ്ഥാനം (مطلع) അവിടുത്തെ ആളുകൾ നിർണ്ണയിക്കും. അങ്ങനെയാണ് പൂർവ്വികർ ചെയ്തത്. ചന്ദ്രപ്പിറവി മക്കയിൽ കണ്ടോ എന്ന് നോക്കിയല്ല.

5- ഇന്ന് നാം പറയുന്ന ശാസ്ത്രവും സാങ്കേതിക വിദ്യയും നാളെ മാറിയേക്കാം. പക്ഷെ ഇസ്ലാം മാറുന്നില്ല. അത് എന്നെന്നേക്കുമുള്ളതാണ്.

6. ഫോണും സംവിധാനങ്ങളും കണ്ട് പിടിക്കുന്നതിന് മുമ്പും ലോകത്ത് നോമ്പും പെരുന്നാളും ഉണ്ടായിരുന്നു. മക്കയിൽ മാസപ്പിറവി കണ്ടു എന്ന് പറയാൻ അവർക്ക് വഹ്‌യ് ഒന്നും വന്നിരുന്നില്ല. അവരുടെ നിർണ്ണിത പ്രദേശത്തെ മാസപ്പിറവി മാത്രമാണ് അവർക്ക് ആശ്രയമായിട്ടുണ്ടായിരുന്നത്.

7- നാം കണ്ടുപിടിച്ച ടെക്നോളജികളൊക്കെ എപ്പോൾ വേണമെങ്കിലും തകരാറിലാകാം അപ്പോഴും നോമ്പും പെരുന്നാളുമുണ്ടാകും. ഒരു യുദ്ധം അല്ലെങ്കിൽ സമാന സംഭവങ്ങൾ ഉണ്ടായാൽ ഈ വിനിമയ സംവിധാനങ്ങളെ ബ്ലോക്ക് ചെയ്യാൻ പറ്റും എന്നത് പുതുവിവരമല്ല. അപ്പോഴും നോമ്പും പെരുന്നാളുമുണ്ടാകും. മാസപ്പിറവിയും ഉണ്ടാകും.

8- അല്ലാഹുവിൻ്റെ അറിയിപ്പാണ് മാസപ്പിറവി. അത് വിട്ട് കണ്ടതിൻ്റെ പിറകെ പോകുമ്പോഴാണ് ഭിന്നിപ്പുകളുണ്ടാകുന്നത്. അപ്പോൾ പിന്നെ സമുദായത്തെയും 'മൊല്ല' മാരെയും കുറ്റം പറഞ്ഞിട്ട് കാര്യമില്ല.

9- പ്രമാണത്തിനൊപ്പമാണ് നിൽക്കേണ്ടത്. അത് മാസം കാണൽ തന്നെയാണ്. കണ്ടാലേ ഉറപ്പിക്കാവൂ. അത് കാണൽ ചന്ദ്രമാസം 29 നും ആയിരിക്കും. 28ന് ഉറപ്പിക്കാൻ ഒരു നിർവ്വാഹവുമില്ല

10- ചന്ദ്രപ്പിറവിയുണ്ടായാലും മേഘം മൂടി കാണാത്ത അവസ്ഥ വന്നാൽ പോലും എന്ത് ചെയ്യണമെന്നത് മതം പഠിപ്പിച്ചിട്ടുണ്ട്. 

    ഈ മതത്തിനും മതവിശ്വാസികൾക്കും ഇല്ലാത്ത വേവലാതി നമുക്ക് എന്തിന്?