പെരുന്നാളിന്‍റെ വിധിവിലക്കുകൾ ചുരുക്കത്തിൽ

പെരുന്നാളിന്‍റെ വിധിവിലക്കുകൾ ചുരുക്കത്തിൽ

1- പെരുന്നാൾ നമസ്കാരം വാജിബ് (നിർബന്ധം ആണ്)

2- പെരുന്നാൾ നമസ്കാരത്തിന്‍റെ മുമ്പും പിമ്പും സുന്നത്ത് നമസ്കാരങ്ങളില്ല.

3- പെരുന്നാൾ നമസ്കാരം മുസ്വല്ലയിൽ (മൈതാനത്ത്) വെച്ച് ആണ് നിർവഹിക്കപ്പെടേണ്ടത്.

4- പെരുന്നാൾ നമസ്കാരം ദ്വുഹാ സമയത്താണ് നിർവഹിക്കപ്പെടേണ്ടത്.

5- പെരുന്നാൾ നമസ്കാരം ഖുത്ബക്ക് മുമ്പ് നിർവഹിക്കപ്പെടണം.

6- പെരുന്നാൾ നമകാരത്തിന് ബാങ്കും ഇഖാമത്തും ഇല്ല.

7- പെരുന്നാൾ നമസ്കാരത്തിൽ ഒന്നാമത്തെ റക്അത്തിൽ തക്ബീറത്തുൽ ഇഹ്റാമിന് പുറമെ ഏഴ് തക്ബീറുകളും, രണ്ടാമത്തെ റക്അത്തിൽ സുജൂദിൽ നിന്ന് ഉയരുമ്പോഴുള്ള തക്ബീറിന് പുറമെ അഞ്ച് തക്ബീറുകളും ചൊല്ലണം. ഓരോ തക്ബീർ ചൊല്ലുമ്പോഴും കൈ ഉയർത്തണം.

8- പെരുന്നാൾ നമസ്കാരത്തിൽ ഒന്നാം റക്അത്തിൽ ഫാതിഹക്ക് ശേഷം സൂറത്തു ക്വാഫോ, രണ്ടാമത്തെ റക്അത്തിൽ സൂറത്തുൽ ക്വമറോ, അല്ലെങ്കിൽ ഒന്നാമത്തെ റക്അത്തിൽ സൂറത്തുൽ അഅ്ലയോ, രണ്ടാമത്തെ റക്അത്തിൽ സൂറത്തുൽ ഗ്വാശിയയോ ഓതുന്നത് സുന്നത്താണ്.

9- സമയം തെറ്റിയതിന് ശേഷമാണ് പെരുന്നാൾ അറിഞ്ഞതെങ്കിൽ അടുത്ത ദിവസമാണ് നമസ്കാരം നിർവഹിക്കേണ്ടത്. മറ്റു കാരണങ്ങളാൽ നമസ്കാരം നഷ്ടപ്പെട്ടവന് പിന്നീട് അത് നിർവഹി ക്കേണ്ടതില്ല. ഇമാം അവസാന ഇരുത്തത്തിൽ ആകുമ്പോൾ ആണ് ഒരാൾ നമസ്കാരത്തിന് എത്തിയതെങ്കിൽ ഇമാം സലാം വീട്ടിയ തിന് ശേഷം എഴുന്നേറ്റ് അവൻ രണ്ട് റക്അത്ത് (പെരുന്നാൾ നമസ്കാരം) നിർവഹിക്കണം.

10- യാത്രയിൽ പെരുന്നാൾ നമസ്കാരം നിർവഹിക്കപ്പെടുന്ന സ്ഥലത്ത് എത്തിയവന് അത് നിർവഹിക്കാവുന്നതാണ്. ഇല്ലെങ്കിൽ അവന് അത് ഒഴിവാക്കുന്നത് കൊണ്ട് പ്രശ്നമില്ല.

11- ജുമുഅ ദിവസം പെരുന്നാൾ ആയാൽ പെരുന്നാൾ നമസ്കാരം നിർവഹിച്ചവന് ജുമുഅ നമസ്കാരത്തിന് ഇളവുണ്ട്. ഇങ്ങനെ വന്നാൽ നബി صلى الله عليه وسلم ജുമുഅയും നിർവഹിക്കാറുണ്ടായിരുന്നു.

12- പെരുന്നാൾ ഖുത്ബയില്‍ പങ്കെടുക്കുന്നത് സുന്നത്ത് ആണ്.

13- പെരുന്നാളിലെ ഖുത്ബ ഒറ്റ ഖുത്ബയാണ്. ഫുക്വഹാക്കൾ പറഞ്ഞത് പോലെ ജുമുഅ പോലെ രണ്ട് ഖുത്ബ നടത്താവുന്നതുമാണ്.

14- പെരുന്നാൾ ഖുത്ബയിൽ സ്ത്രീകളെ പ്രത്യേകം  ഉപദേശിക്കൽ സുന്നത്താണ്.

15- പെരുന്നാൾ ഖുത്ബ തക്ബീർ കൊണ്ട് തുടങ്ങാനോ, ഖുത്ബകൾക്കിടയിൽ തക്ബീർ ചൊല്ലാനോ സ്വഹീഹായ ഹദീസ് തെളിവായില്ല.

പെരുന്നാളിന്‍റെ സുന്നത്തുകളും ശ്രദ്ധിക്കേണ്ട കാര്യങ്ങളും

1- തക്ബീർ ചൊല്ലൽ.

2- കുളിക്കൽ, നല്ല വസ്ത്രം ധരിക്കൽ.

3- ബലിപെരുന്നാൾ നമസ്കാരത്തിന് പുറപ്പെടുന്നതിന് മുമ്പ് ഭക്ഷിക്കാതിരിക്കലും, ഫിത്വ്'ര്‍ പെരുന്നാൾ നമസ്കാരത്തിന് പുറപ്പെടുന്നതിന് മുമ്പ് വല്ലതും ഭക്ഷിക്കലും.

4- മുസ്വല്ലയിലേക്ക് നേരത്തെ പോകൽ.

5- സ്ത്രീകൾ, കുട്ടികൾ അടക്കം എല്ലാ മുസ്ലീംകളും മുസ്വല്ലയിലേക്ക് പുറപ്പെടൽ.

6- മുസ്വല്ലയിലേക്ക് പോകുമ്പോഴും തിരിച്ച് വരുമ്പോഴും രണ്ട് വഴി സ്വീകരിക്കൽ.

7- ഈദ് ആശംസ നേരൽ.

8- നമസ്കാര സ്ഥലത്തേക്ക് നടന്നോ വാഹനത്തിലോ പോകാം.