ദുറൂസുല്‍ ഹദീസ് - ഭാഗം 255 دروس الحديث - മുലകുടിബന്ധം രക്ത ബന്ധം പോലെയാണ്

 

الأربعون النووية-حديث: 44

മുലകുടിബന്ധം 

രക്ത ബന്ധം പോലെയാണ്

عَنْ عَائِشَةَ رَضِيَ اللَّهُ عَنْها عَنْ النَّبِيِّ صلى الله عليه وسلم  قَالَ: " الرَّضَاعَةُ تُحَرِّمُ مَا تُحَرِّمُ الْوِلَادَةُ".

رواه البخاري [رقم:2646]، ومسلم [رقم:1444].

ആഇശ رَضِيَ اللَّهُ عَنْهُا നിവേദനം. നബി  صلى الله عليه وسلم പറഞ്ഞു: പ്രസവം കൊണ്ട് (രക്തബന്ധം കൊണ്ട്) നിഷിദ്ധമാക്കുന്നതെല്ലാം മുലകുടി ബന്ധം കൊണ്ടും നിഷിദ്ധമാകും. 

വിവരണം

    മുലകുടി ബന്ധത്തെ ഇസ്‌ലാം രക്തബന്ധം പോലെ ആക്കിയിരിക്കുന്നു എന്ന് വ്യക്തമാക്കുന്ന ഹദീസ് ആണിത്. രക്ത ബന്ധത്തില്‍ നിഷിദ്ധമായവയെല്ലാം മുലകുടി ബന്ധത്തിലും നിഷിദ്ധമാകും, അഥവാ രക്ത ബന്ധത്തില്‍ വിവാഹം നിഷിദ്ധമായവരെ പോലെയാണ് മുലകുടി ബന്ധത്തിലുള്ളവരും. 

    ഒരു സ്ത്രീക്ക് രക്തബന്ധത്തില്‍ ഉള്ള സഹോദരനെ പോലെയാണ് മുലകുടി ബന്ധത്തിലുള്ള സഹോദരന്‍. അവന്‍ അവള്‍ക്ക് മഹ്റം ആയിരിക്കും. 

    മുലകുടി ബന്ധത്തിലൂടെ മഹ്റം ആയ ആളുമായി തനിച്ചിരിക്കാനും, കാണാനും, യാത്ര ചെയ്യാനുമെല്ലാം ഒരു സ്ത്രീക്ക് അനുവാദമുണ്ട് എന്ന് ഈ ഹദീസില്‍ നിന്ന് മനസ്സിലാക്കാം. എന്നാല്‍ രക്ത ബന്ധത്തിലെ പോലെ അനന്തരാവകാശം, ചിലവിന് നല്‍കല്‍ പോലെയുള്ളവ ഇതിലൂടെ നിര്‍ബന്ധമാകില്ല.

    ഒരു സ്ത്രീ തന്‍റെതല്ലാത്ത ഒരു കുഞ്ഞിന് മുലപ്പാലൂട്ടിയാല്‍ ആ കുഞ്ഞ് അവളുടെ കുഞ്ഞിനെ പോലെ ആയിരിക്കും എന്നാണ് ഈ ഹദീസ് അറിയിക്കുന്നത്. അപ്പോള്‍ ആ സ്ത്രീയുടെ മക്കള്‍ ഈ മുലയൂട്ടപ്പെട്ട കുഞ്ഞിന്‍റെ സഹോദരങ്ങളാകും. അത് പോലെ അവളുടെ ഭര്‍ത്താവ് ഈ കുഞ്ഞിന്‍റെ പിതാവിനെ പോലെയും അയാളുടെ മക്കള്‍ ഈ കുഞ്ഞിന്‍റെ സഹോദരങ്ങളെ പോലെയും ആയിരിക്കും. ഇമാം നവവി رحمه الله ഈ കാര്യം ശര്‍ഹു മുസലിമില്‍ രേഖപ്പെടുത്തിയിട്ടുണ്ട്. 

രക്തബന്ധം കൊണ്ടും മുലകുടി ബന്ധം കൊണ്ടും വിവാഹ ബന്ധം നിഷിദ്ധമായവര്‍ ആരൊക്കെയാണെന്ന് വിശുദ്ധ ഖുര്‍ആനില്‍ വിശദീകരിച്ചിട്ടുണ്ട്. അല്ലാഹു പറയുന്നു: 

وَلَا تَنْكِحُوا مَا نَكَحَ آبَاؤُكُمْ مِنَ النِّسَاءِ إِلَّا مَا قَدْ سَلَفَ إِنَّهُ كَانَ فَاحِشَةً وَمَقْتًا وَسَاءَ سَبِيلًا (22) حُرِّمَتْ عَلَيْكُمْ أُمَّهَاتُكُمْ وَبَنَاتُكُمْ وَأَخَوَاتُكُمْ وَعَمَّاتُكُمْ وَخَالَاتُكُمْ وَبَنَاتُ الْأَخِ وَبَنَاتُ الْأُخْتِ وَأُمَّهَاتُكُمُ اللَّاتِي أَرْضَعْنَكُمْ وَأَخَوَاتُكُمْ مِنَ الرَّضَاعَةِ وَأُمَّهَاتُ نِسَائِكُمْ وَرَبَائِبُكُمُ اللَّاتِي فِي حُجُورِكُمْ مِنْ نِسَائِكُمُ اللَّاتِي دَخَلْتُمْ بِهِنَّ فَإِنْ لَمْ تَكُونُوا دَخَلْتُمْ بِهِنَّ فَلَا جُنَاحَ عَلَيْكُمْ وَحَلَائِلُ أَبْنَائِكُمُ الَّذِينَ مِنْ أَصْلَابِكُمْ وَأَنْ تَجْمَعُوا بَيْنَ الْأُخْتَيْنِ إِلَّا مَا قَدْ سَلَفَ إِنَّ اللَّهَ كَانَ غَفُورًا رَحِيمًا- النساء 22-23

നിങ്ങളുടെ പിതാക്കൾ വിവാഹം ചെയ്ത സ്ത്രീകളെ നിങ്ങൾ വിവാഹം കഴിക്കരുത്; മുമ്പ് ചെയ്തുപോയതൊഴികെ. തീർച്ചയായും അത് ഒരു നീചവൃത്തിയും വെറുക്കപ്പെട്ട കാര്യവും ദുഷിച്ച മാർഗവുമാകുന്നു. * നിങ്ങളുടെ മാതാക്കൾ, പുത്രിമാർ, സഹോദരിമാർ, പിതൃസഹോദരിമാർ, മാതൃസഹോദരിമാർ, നിങ്ങളെ മുലകുടിപ്പിച്ച പോറ്റമ്മമാർ, മുലകുടി മുഖേനയുള്ള നിങ്ങളുടെ സഹോദരിമാർ, നിങ്ങളുടെ ഭാര്യാമാതാക്കൾ എന്നിവർ (അവരെ വിവാഹം ചെയ്യൽ) നിങ്ങൾക്ക് നിഷിദ്ധമാക്കപ്പെട്ടിരിക്കുന്നു. നിങ്ങൾ ലൈംഗികവേഴ്ചയിൽ ഏർപെട്ടിട്ടുള്ള നിങ്ങളുടെ ഭാര്യമാരുടെ സന്താനങ്ങളായി നിങ്ങളുടെ സംരക്ഷണത്തിലുള്ള വളർത്ത് പുത്രിമാരും (അവരെ വിവാഹം ചെയ്യുന്നതും നിഷിദ്ധമാക്കപ്പെട്ടിരിക്കുന്നു). ഇനി നിങ്ങൾ അവരുമായി ലൈംഗികവേഴ്ചയിൽ ഏർപെട്ടിട്ടില്ലെങ്കിൽ (അവരുടെ മക്കളെ വേൾക്കുന്നതിൽ) നിങ്ങൾക്കു കുറ്റമില്ല. നിങ്ങളുടെ മുതുകിൽ നിന്ന് പിറന്ന പുത്രൻമാരുടെ ഭാര്യമാരും (നിങ്ങൾക്ക് നിഷിദ്ധമാക്കപ്പെട്ടിരിക്കുന്നു.) രണ്ടു സഹോദരിമാരെ ഒന്നിച്ച് ഭാര്യമാരാക്കുന്നതും (നിഷിദ്ധമാകുന്നു.) മുമ്പ് ചെയ്ത് പോയതൊഴികെ. തീർച്ചയായും അല്ലാഹു ഏറെ പൊറുക്കുന്നവനും കരുണാനിധിയുമാകുന്നു.- നിസാഅ': 22-23