ദുറൂസുല്‍ ഹദീസ് - ഭാഗം 109 دروس الحديث - നാല് കാര്യങ്ങളില്‍ നിന്ന് രക്ഷ ചോദിക്കല്‍

 

عن أَبي هُرَيْرَةَ، قال: قَالَ رَسُولُ اللهِ صَلَّى اللَّهُ عَلَيْهِ وَسَلَّمَ: إِذَا فَرَغَ أَحَدُكُمْ مِنَ التَّشَهُّدِ الآخِرِ، فَلْيَتَعَوَّذْ بِاللَّهِ مِنْ أَرْبَعٍ: مِنْ عَذَابِ جَهَنَّمَ، وَمِنْ عَذَابِ الْقَبْرِ، وَمِنْ فِتْنَةِ الْمَحْيَا وَالْمَمَاتِ، وَمِنْ شَرِّ الْمَسِيحِ الدَّجَّالِ. - مسلم

അബൂ ഹുറൈറ رضي الله عنه നിവേദനം. റസൂല്‍ صلى الله عليه وسلم പറഞ്ഞു: നിങ്ങളില്‍ ഒരാള്‍ അവസാനത്തെ തശഹ്ഹുദില്‍ നിന്ന് വിരമിച്ചാല്‍ അവന്‍ നാല് കാര്യങ്ങളില്‍ നിന്ന് അല്ലാഹുവിന കൊണ്ട് രക്ഷ ചോദിക്കട്ടെ: നരക ശിക്ഷയില്‍ നിന്നും, ക്വബ്റിലെ ശിക്ഷയില്‍ നിന്നും, ജീവിതത്തിലേയും മരണത്തിലേയും കുഴപ്പങ്ങളില്‍ നിന്നും, മസീഹുദ്ദജ്ജാലിന്‍റെ കുഴപ്പത്തില്‍ നിന്നും ആണ് അവ. (മുസ്ലിം).

 

വിവരണം

·    നമസ്കാരത്തില്‍ പ്രാര്‍ത്ഥിക്കേണ്ട കാര്യങ്ങളെ കുറിച്ചാണ് ഈ ഹദീസ് വിവരിക്കുന്നത്.

·       നമസ്കാരത്തില്‍ അല്ലാഹുവിനോട് നമുക്ക് പ്രാര്‍ത്ഥിക്കാം. അവസാനത്തെ തശഹ്ഹുദ് (അത്തഹിയ്യാത്ത്) ന് ശേഷം നബി صَلَّى اللَّهُ عَلَيْهِ وَسَلَّمَ യുടെ മേലുള്ള സ്വലാത്ത് കഴിഞ്ഞാല്‍ അല്ലാഹുവിനോട് നമുക്ക് പ്രാര്‍ത്ഥിക്കാവുന്നതാണ്.

·        പ്രാര്‍ത്ഥനകള്‍ നമസ്കാരത്തിലും ദിക്റുകള്‍ നമസ്കാര ശേഷവും എന്ന രീതിയിലാണ് അധ്യാപനങ്ങളുള്ളാത്. നമസ്കാര ശേഷവും ആവശ്യമുള്ള കാര്യങ്ങള്‍ പ്രാര്‍ത്ഥിക്കാവുന്നതാണ്.

·        അതില്‍ പ്രാര്‍ത്ഥിക്കാന്‍ ഏറ്റവും പ്രധാനപ്പെട്ടതും എല്ലാം ഉള്‍ക്കൊള്ളുന്നതുമായ ഒരു പ്രാര്‍ത്ഥനയെ കുറിച്ചാണ് നബി صَلَّى اللَّهُ عَلَيْهِ وَسَلَّمَ  പഠിപ്പിക്കുന്നത്.

·        നാല് കാര്യങ്ങളെ തൊട്ട് അല്ലാഹുവിനോട് രക്ഷ ചോദിക്കല്‍ നമസ്കരിക്കുന്നവന് സുന്നത്താണ്. ഇത് വാജിബല്ല.

1- നരക ശിക്ഷയില്‍ നിന്ന്

2- ക്വബ്റിലെ ശിക്ഷയില്‍ നിന്ന്

3- ജീവിതത്തിലേയും മരണത്തിലേയും ഫിത്നയില്‍ നിന്ന്

4- മസീഹുദ്ദജ്ജാലിന്‍റെ കുഴപ്പത്തില്‍ നിന്ന്

·     നരകശിക്ഷയെ തൊട്ട് നാം എല്ലായ്പ്പോഴും അല്ലാഹുവിനോട് രക്ഷ ചോദിക്കേണ്ടതാണ്.

·      ക്വബ്ര്‍ ശിക്ഷ യാഥാര്‍ത്ഥ്യമാണ്. അതിനെ നിഷേധിക്കുന്നവര്‍ക്കുള്ള മറുപടി കൂടിയാണ് ഈ ഹദീസ്. വിവിധ തരത്തിലുള്ള ശിക്ഷകള്‍ ക്വബ്റില്‍ ഉണ്ടാവുമെന്ന് ഹദീസുകള്‍ വ്യക്തമാക്കിയിട്ടുണ്ട്.

ജീവിതത്തിലേയും മരണത്തിലേയും കുഴപ്പങ്ങള്‍ എന്താണ്?

·      ജീവിതത്തിലെ കുഴപ്പങ്ങള്‍: ജീവിതത്തില്‍ അഭിമുഖീകരിക്കുന്ന വിവിധ കുഴപ്പങ്ങളുണ്ട്, തിന്‍മകള്‍ ചെയ്യലും, നന്‍മ ചെയ്യതിരിക്കലും തുടങ്ങി ധാരാളം പ്രശ്നങ്ങള്‍ ഇതില്‍ പെടുന്നു.

·      മരണത്തിന്‍റെ കുഴപ്പങ്ങള്‍: അഥവാ മരണ വേളയില്‍ ഒരു അടിമക്ക് അനുഭവിക്കേണ്ടതായ പ്രയാസങ്ങളുണ്ട്. നല്ല ആള്‍ക്ക് ആ സന്ദര്‍ഭം വളരെ എളുപ്പമായിരിക്കും. എന്നാല്‍ തിന്‍മകളില്‍ കഴിഞ്ഞ ആളുകള്‍ക്ക് വലിയ പ്രയാസം തന്നെയാണ് ആ സന്ദര്‍ഭം.

·      മരണ ശേഷമുള്ള വിവിധ ഫിത്നകളും കുഴപ്പങ്ങളും ഇതില്‍ പെടും.

·     മസീഹുദ്ദജ്ജാല്‍ മനുഷ്യരെ വഴി തെറ്റിക്കാനും നരകത്തിലേക്ക് നയിക്കാനും ശ്രമിക്കും. അവന്‍റെ പക്കലുള്ള വിവിധ തന്ത്രങ്ങളിലൂടെ മനുഷ്യരെ അവന്‍ വഴി തെറ്റിക്കും. ആദം عليه السلام നെ സൃഷ്ടിച്ചത് മുതല്‍ അന്ത്യദിനം വരെയുള്ള കാലത്തെ ഏറ്റവും വലിയ ഫിത്നയാണ് മസീഹുദ്ദജ്ജാലിന്‍റെ ഫിത്ന. ആയതിനാല്‍ അതില്‍ നിന്നും രക്ഷ തേടാന്‍ നബി صَلَّى اللَّهُ عَلَيْهِ وَسَلَّمَ കല്‍പിച്ചിരിക്കുന്നു.

·      പ്രാര്‍ത്ഥിക്കേണ്ട രൂപം:

اللهم إِنِّيي أَعُوذُ بِكَ مِنْ عَذَابِ جَهَنَّمَ وَمِنْ عَذَابِ الْقَبْرِ وَمِنْ فِتْنَةِ الْمَحْيَا وَالْمَمَاتِ وَمِنْ شَرِّ الْمَسِيحِ الدَّجَّالِ.

അര്‍ത്ഥം: അല്ലാഹുവേ.. നരക ശിക്ഷയില്‍ നിന്നും, ക്വബ്റിലെ ശിക്ഷയില്‍ നിന്നും, ജീവിതത്തിന്‍റേയും മരണത്തിന്‍റേയും കുഴപ്പങ്ങളില്‍ നിന്നും, മസീഹുദ്ദജ്ജാലിന്‍റെ കുഴപ്പങ്ങളില്‍ നിന്നും നിന്നോട് ഞാന്‍ രക്ഷ ചോദിക്കുന്നു.