ദുറൂസുല്‍ ഹദീസ് - ഭാഗം 111 دروس الحديث - മനുഷ്യന്‍റെ ശുദ്ധ പ്രകൃതിയില്‍ പെട്ട അഞ്ച് കാര്യങ്ങള്‍

 

عَنْ أَبِي هُرَيْرَةَ رَضِيَ اللَّهُ عَنْهُ، عَنِ النَّبِيِّ صَلَّى اللهُ عَلَيْهِ وَسَلَّمَ قَالَ: "الفِطْرَةُ خَمْسٌ: الخِتَانُ، وَالِاسْتِحْدَادُ، وَنَتْفُ الإِبْطِ، وَقَصُّ الشَّارِبِ، وَتَقْلِيمُ الأَظْفَارِ "- البخاري ومسلم

അബൂ ഹുറൈറ h നിവേദനം, നബി g പറഞ്ഞു: ശുദ്ധപ്രകൃതി (മനുഷ്യന്‍റെ ശുദ്ധ പ്രകൃതിയില്‍ പെട്ടവ) അഞ്ചെണ്ണമാണ്: ചേലാ കര്‍മം, ഗുഹ്യ രോമം വടിക്കല്‍, കക്ഷ രോമം പറിക്കല്‍, മീശ വെട്ടല്‍, നഖം വെട്ടല്‍ എന്നിവയാണവ. (ബുഖാരി, മുസ്ലിം).

 

വിവരണം

·  ശുചിത്വവുമായി ബന്ധപ്പെട്ട ഹദീസ് ആണിത്. മനുഷ്യന്‍റെ ശുദ്ധ പ്രകൃതിയില്‍ പെട്ട അഞ്ച് കാര്യങ്ങള്‍ ഈ ഹദീസില്‍ വിശദീകരിക്കപ്പെടുന്നു. ശുദ്ധപ്രകൃതിയില്‍ പെട്ട വേറെയും ചില കാര്യങ്ങള്‍ മറ്റു ഹദീസുകളില്‍ വന്നിട്ടുണ്ട്.

· فِطْرَة എന്നാല്‍ പ്രവാചകന്‍മാരുടെ ചര്യ എന്നാണ് അര്‍ത്ഥമാക്കുന്നത്.

ചേലാകര്‍മം:

·    പുരുഷന്‍മാര്‍ക്ക് ഇത് വാജിബ് ആണ്. മൂത്രത്തില്‍ നിന്നുള്ള പരിപൂര്‍ണ്ണ ശുചിത്വം ഉറപ്പു വരത്തുന്നതിന് ഇത് ചെയ്യല്‍ നിര്‍ബന്ധമാണ്. ഇസ്ലാമിലേക്ക് കടന്നു വരുന്നവരോട് നബി g  ചേലാ കര്‍മം ചെയ്യാന്‍ കല്‍പിക്കാറുണ്ടായിരുന്നു.

·    ഇത് ഈ ഉമ്മത്തിന്‍റെ അടയാളവും മുന്‍ സമുദായങ്ങളില്‍ അറിയപ്പെട്ടതുമായ കാര്യമാണ്. ചെറുപ്പ കാലത്ത് ചേലാ കര്‍മം ചെയ്യുന്നതാണ് ഉത്തമം. പ്രായപൂര്‍ത്തിയാകുമ്പോഴേക്ക് ചേലാകര്‍മം ചെയ്തിരിക്കണം.

ഗുഹ്യ രോമം കളയല്‍

·    اسْتِحْدَاد എന്ന് പേര് വരാന്‍ കാരണം ഇരുമ്പ് (حَدِيد) ഉപയോഗിച്ച് നീക്കം ചെയ്യുന്നതിനാലാണെന്ന് വിശദീകരിക്കപ്പെട്ടിട്ടുണ്ട്.

·   ഇത് പ്രബലമായ സുന്നത്താണ്. സ്ത്രീക്കും പുരുഷനുമെല്ലാം ഇത് ബാധകമാണ്. പുരുഷന് ഇത് നിര്‍ബന്ധവും സ്ത്രീക്ക് സുന്നത്തുമാണ്.

കക്ഷ രോമം കളയല്‍

·    ഇതും സുന്നത്താണ്. കക്ഷ രോമം പറിക്കുക എന്നാണ് ഹദീസില്‍ വന്നിട്ടുള്ളത്. കഴിയുന്നവര്‍ക്ക് അതാണ് നല്ലത് എന്ന് പണ്ഡിതന്‍മാര്‍ വിശദീകരിച്ചിട്ടുണ്ട്. വടിച്ചു കളഞ്ഞാലും മതിയാകുന്നതാണ്, അതിന്‍റെ ഉദ്ദേശ്യം അഴുക്ക് നീക്കം ചെയ്യലാണ്.

മീശ വെട്ടല്‍

·    മീശയുടെ ചുണ്ടിലേക്കിറങ്ങുന്ന ഭാഗം വെട്ടല്‍ സുന്നത്താണ്. പലരും അശ്രദ്ധരാകുന്ന ഒരു വിഷയമാണിത്. മേല്‍ചുണ്ട് വ്യക്തമായി കാണുന്ന വിധം മീശയുടെ അഗ്രമോ, അല്ലെങ്കില്‍ മുഴുവാനായോ ചെറുതാക്കാവുന്നതാണ്. മീശ വടിക്കല്‍ മത നിയമമായി വന്നിട്ടില്ല. ഇമാം മാലിക് رحمه الله പറഞ്ഞത് മീശ വടിക്കല്‍ ബിദ്അത്താണെന്നാണ്.

·    താടി വളര്‍ത്തുകയും മീശ വെട്ടുകയും വേണം എന്ന് ഹദീസുകളില്‍ കാണാം. താടി വളര്‍ത്താനാണ് മതം നിര്‍ദേശിക്കുന്നത്. അത് നിര്‍ബന്ധവുമാണ്.

നഖം വെട്ടല്‍

·     നഖം വെട്ടല്‍ പ്രബലമായ സുന്നത്താണ്. കാലിന്‍റേയും കയ്യിന്‍റേയും നഖങ്ങള്‍ വെട്ടല്‍ ഇതില്‍ ഉള്‍പ്പെടും. നഖം വളര്‍ത്തല്‍ പാടില്ലാത്ത കാര്യമാണ്. നഖം വെട്ടുന്ന കാര്യത്തില്‍ ഏത് വിരലിന്‍റേത് ആദ്യം വെട്ടണം എന്നൊന്നും സ്ഥിരപ്പെട്ടു വന്നിട്ടില്ല എന്ന് ഇബ്നു ഹജര്‍ رحمه الله പറഞ്ഞിട്ടുണ്ട്.

·    ഇതില്‍ പറഞ്ഞ ഗുഹ്യ രോമം കളയല്‍, കക്ഷ രോമം പറിക്കല്‍, മീശ വെട്ടല്‍, നഖം വെട്ടല്‍ എന്നിവ നാല്‍പത് ദിവസം കൂടുമ്പോള്‍ ചെയ്യണം എന്ന് റസൂല്‍ g പഠിപ്പിച്ചിട്ടുണ്ട്. നാല്‍പത് ദിവസത്തില്‍ കൂടുതല്‍ അവ നീക്കം ചെയ്യാതെ വെക്കരുത്.

·    നാല്‍പത് ദിവസത്തിനുള്ളില്‍ തന്നെ അത് വളര്‍ന്ന് വൃത്തികേടായാല്‍ ഉടന്‍ നീക്കം ചെയ്യാം. ഓരോ വ്യക്തിക്കനുസരിച്ച് നീക്കം ചെയ്യുന്ന സമയം വ്യത്യാസപ്പെടും. എന്നാല്‍ നാല്‍പത് ദിവസത്തില്‍ കൂടുതല്‍ അവ നീക്കം ചെയ്യാതിരിക്കരുത്.